نێچیرڤان بارزانی سەرۆكی هەرێمی كوردستان، پێشوازیی لە جۆشوا هاریس هەڵسووڕێنەری باڵوێزخانەی ئەمەریكا لە عێراق و شاندێكی یاوەری كرد.
لە كۆبوونەوەیەكدا پێوەندییەكانی ئەمەریكا لەگەڵ عێراق و هەرێمی كوردستان، دوا پێشهاتەكانی پرۆسەی سیاسی لە وڵات و دۆخی ناوخۆی هەرێمی كوردستان، تاوتوێ كران.
بە گوێرەی راگەیەنراوی سەرۆكایەتی هەرێمی كوردستان، هەردوولا دووپاتیان لە برەودان بە پێوەندییەكانی ئەمەریكا لەگەڵ عێراق و هەرێمی كوردستان كردەوە، هەروەها هاوڕا بوون كە بەرژەوەندی و بەهای هاوبەش ئەمەریكا لەگەڵ عێراق و هەرێمی كوردستان دەبەستێتەوە. هەر لەمبارەیەوە باسیان لە بوارەكانی هاریكاریی نێوان هەردوولا كرد.
پێوەندییەكانی هەولێر ـ بەغدا، گرنگیی یەكدەنگیی لایەنە كوردستانییەكان لە هەرێمی كوردستان و عێراق و دۆخی ناوچەكە بەگشتی، تەوەرێكی تری كۆبوونەوەكە بوو.