حکومەتا هەرێما کوردستانێ کار ل سەر چیکرنا پروژەکێ ستراتیجی یێ ئاڤا ڤەخوارنێ دکەت ل سەر رووبارێ شین ل گەلیێ بالندا، پروژە دێ ئاڤا ڤەخوارنێ بۆ 51 گوندێن دەڤەرا بارزان دابین کەت، نوکە پرۆژە تمام بویە.
زیاب بارزانی، رێڤەبەرێ ئاڤا بارزان دیارکر کو کار ل سەر پرۆژێ ئاڤا بارزان ل گەلیێ بالندا دوماهی هاتیە و بۆ "وشە" گوت، حکومەتا هەرێما کوردستانێ، ئێک ژ مەزنترین پرۆژێن ستراتیجی یێن دابینکرنا ئاڤا ڤەخوارنێ ل گەلیێ بالندا ل سەر رووبارێ شین دروست دکەت و نوکە هەموو کارێن پروژەیی دوماهی هاتنە.
زێدەتر گوت، پروژە دێ ئاڤا ڤەخوارنێ بۆ 51 گوندێن دەڤەرا بارزان دابین کەت، ب کۆالێتیەکا باش و ساخلەم، نوکە پروژە وەکو تێست کار پێ دهێتەکرن و ئومێدەوارین ل نێزیک بکەڤیتە دخزمەتا وەلاتیان دا و ئاریشا ئاڤێ یا دەڤەرێ چارەسەر بیت.
پتری 15 سالە دەست ب چێکرنا پروژێ ستراتیجی یێ ئاڤا بارزان هاتیەکرن، بەلێ ژبەر چەند ئەگەرێن دارایی و تەکنیکی پرۆژە هاتبویە ڕاگرتن، ل سەر راسپاردێن مەلا موستەفا بارزانی، جارەکا دی دەست ب تمام کرنا پرۆژەی هاتیەکرن و دوماهی ئینان داکو ئاریشا ئاڤا ڤەخوارنێ و دابینکرنا ئاڤا پاقژ ل دەڤەرا بارزان چارەسەرکرن.
رێڤەبەرێ ئاڤا بارزان دیارکر ژی کو کار و بارێن سەرەکی یێن پروژەی هەموو تمام بوینە و گوتژی، نوکە کارپێکرنا ئەزموونی یا پڕۆژەی ب پالدان و ڤەگوهاستنا ئاڤا خاڤ ل یەکەیێن وەرگر بۆ یەکەیێن دی ل وێستگەها سەرەکی یا پاڵاوتنا پڕۆژەی کو ئەڤ قوناغە ب هەول و بزاڤێن شێخ بابو هاتیەکرن، دەستخوشیا کومپانیا GEG یا بجهکرنێ دکەین بۆ کارێن وان یێن گرنگ بۆ تمامکرنا پروژەی.
پروژە ل سەر رووبارێ شین ل گوندێ بالندا ل دەرێ گەلیێ بالندا هاتیە چێکرن، ئاڤا ڤەخوارنێ ژ گوندێ بالندا هەتا گوندێ شیڤەدزێ، هەموو گوندێن نزار و بەروژێ بارزان ل گەل گوندەوارێن دەوروبەرێن بلێ و بارزان و مێرگەسوورێ ژی دابین دکەت کو هژمارا وان 51 گوندن و هەموو دێ وەکو تورەک پێکڤە هێتە گرێدان.