ئەڤرۆ بەشەک ژ پێشمەرگەیێن بریندارێن سەنگەری ل هەمبەر رێکخستنا پارتی ل دهۆکێ خرڤەبونەک ئەنجام دا و تێدا داخوازا موچەیێن خۆ کرن کو ژلایێ عیراقێ ئاریشە بۆ هاتیە دروستکرن.
ئێقبال عومەر، ئێک ژ وان پێشمەرگەیێن بریندارێن سەنگەری یە بۆ "وشە" گوت، مە وەکو پێشمەرگەیێن بریندارێن سەنگەری سەرەدانا رێکخستنا پارتی ل دهوکێ کر و ب رەنگەکێ ئاشتیانە داخواز ژ وان کر کو ئاریشا مەیا مووچەیی چارەسەر بکەن، ب خوشحالیڤە رێکخستنا پارتی ژی داخواریێن مە وەرگرتن و سووزدا کو بگەهینن ئالیێن شولەژێ بۆ هندێ بهێتە چارەسەرکرن.
زێدەتر گوت، مە بۆ خزمەتا کوردستانێ گیانێ خۆ کریە قوربان و برینداربوینە، مە زور ئازار و نەخۆشی د شەران دا دیتیە، مە داخوازیێن خۆ گەهاندن پارتی ژبەرکو پارتی مالا مەیە و تنێ ئەو دشێن چارەسەریا ئاریشا مە بکەت و بگەهینیت ئالیێن شولەژێ.
دهێتە زانین کو ئاریشا وان پێشمەرگەیێن بریندارێن سەنگەری ئەوە کو مووچەیێ وان یێ هەیڤا نەهـ و دەهـ یێن سالا 2025ێ و هەیڤا ئێک یا سالا 2026ێ وەرنەگرتینە، دخوازن ل گەل هەیڤا سێ مووچەیێن وان بهێتە دابینکرن، بەلێ ژبەرکو حکومەتا عیراقێ ئاریشە بو وان دروستکرینە لەوا مووچەیێن وان گیروبوینە و نەهاتینەدان.