ئەمڕۆ هەینی 10ی نیسانی 2026، لە ڕاگەیەنراوێکی فەرمیدا کە دەست "وشە" کەوتووە، وەزارەتی ناوخۆی حكوومەتی هەرێمی کوردستان ڕای گەیاند، سەرەڕای ئەوەی هەڵوێستی حكوومەتی هەرێمی کوردستان لە سەرەتاوە پاڵپشتیکردن لە ئاشتی و سەقامگیری بووە و بەشێک نەبووە و نابێت لە شەڕ و گرژی، هەروەها سەرباری ڕاگەیاندنی ئاگربەست لە ناوچەکە، شەوی پێنجشەم نۆی نیسانی 2026 و لە چەند کاتێکی جیاوازدا، چەند هێرشێکی درۆنی کراونەتە سەر چەند شوێنێکی جیاواز لە هەرێمی کوردستان، بەڵام لە ئەنجامدا تێکشکێنراون و کەوتوونەتە خوارەوە.
لە ڕاگەیەنراوەکەدا هاتووە، هەرێمی کوردستان و هاووڵاتییان چاوەڕێی ئاساییبوونەوەی دۆخەکەیان دەکرد، بەڵام بەداخەوە تیرۆریستان و خراپەکاران کە چاویان بە ئارامی و پێشکەوتنی وڵاتەکەمان هەڵنایەت، لە نانەوەی پشێوی بەردەوامن.
لە کۆتاییدا وەزارەتی ناوخۆ دووپاتی لە پشتگیریکردنی ئاشتی و ئۆقرەیی کردەوە و داوای لە هەموو لایەک کرد کە ئەو هێرشانە ڕابگرن و چیتر سەقامگیری و ئۆقرەییی کوردستان و بەرژەوەندییەکانی هاووڵاتییان نەکەنە ئامانج.