ئەمڕۆ چوارشەم 15ی نیسانی 2026، فراکسیۆنی پارتی دیموکراتی کوردستان لە ئەنجوومەنی پارێزگای کەرکووک، لە ڕاگەیەنراوێکدا هەڵوێستی فەرمیی خۆی سەبارەت بە بەشدارینەکردن لە کۆبوونەوەی سبەی پێنجشەم 16ی نیسانی ئەنجوومەنی پارێزگاکە ڕاگەیاند، و دووپاتی کردەوە کە ئامادە نین ببنە بەشێک لە هیچ ڕێککەوتنێک کە لە دەرەوەی ئیرادەی ڕاستەقینەی خەڵکی کەرکووک و لە "ژوورە تاریکەکاندا" ئەنجام درابێت.
لە ڕاگەیەنراوەکەدا هاتووە، ئێمە لە فراکسیۆنی پارتی، بایکۆتی کۆبوونەوەی سبەی ئەنجوومەنی پارێزگای کەرکووک دەکەین، ئەم بڕیارە تەنیا هەڵوێستێکی سیاسیی کاتی نییە، بەڵکو درێژەپێدەری هەڵوێستە نەتەوەیی و نەگۆڕەکانی پارتیمانە، هاوشێوەی بایکۆتی کۆبوونەوەکەی هۆتێل ڕەشید.
فراکسیۆنی پارتی دووپاتی لەوەش کردەوە کە بڕوای تەواویان وایە بڕیاردان لەسەر چارەنووسی کەرکووک لە ژوورە تاریکەکان و بەبێ گەڕانەوە بۆ ئیرادەی ڕاستەقینەی نوێنەرانی شەرعی، زیانێکی گەورە بە پێکەوەژیان و دەستکەوتە نەتەوەییەکان دەگەیەنێت. ئاماژەی بەوەش داوە کە ئەم بایکۆتە ڕەنگدانەوەی دووربینیی سیاسییانە و پابەندبوونە بە ڕێبازی پیرۆزی بارزانی، و دووپاتیشی کردەوە کە پارتی ئامادە نییە ببێتە بەشێک لە پڕۆسەیەک کە تێیدا نوێنەرانی ڕاستەقینەی خەڵک پەراوێز بخرێن و بڕیارەکان لە دەرەوەی ئیرادەی خەڵک بسەپێنرێن.
لە بەشێکی تری ڕاگەیەنراوەکەدا هاتووە، پارتی دیموکراتی کوردستان وەک هەمیشە ئامادەیە باجی کوردایەتی و هەڵوێستە نەتەوەییەکانی بدات و هەرگیز سازش لەسەر مافە ڕەواکان ناکات. وەرگرتنی پۆست و پلەکان بۆ ئێمە هیچ بایەخێکی نییە ئەگەر نرخەکەی پاشکۆیەتی و بێدەنگبوون بێت لە ئاست مافەکانی گەلەکەمان.
لە کۆتاییدا فراکسیۆنی پارتی دووپاتی کردەوە کە وەک چەتری کۆکەرەوەی گشت پێکهاتەکانی کەرکووک دەمێننەوە و تەنیا پشتگیری لەو جۆرە تەبایی و ڕێککەوتنانە دەکەن کە مافی هەمووان بە شێوەیەکی دادپەروەرانە دەپارێزێت و کەرامەتی هاووڵاتییانی کەرکووک دەخاتە سەرووی هەموو بەرژەوەندییەکی ترەوە.