لە بەردەوامیی كارنامەكەیدا لە كۆڕبەندی دیپلۆماسیی ئەنتالیا، نێچیرڤان بارزانی سەرۆكی هەرێمی كوردستان، لەگەڵ ڕەجەب تەیب ئەردۆغان سەرۆك كۆماری توركیا كۆبووەوە.
لە كۆبوونەوەكەدا، گفتوگۆیەكی تێروتەسەلیان لەبارەی بەهێزكردنی هاریكاریی توركیا لەگەڵ عێراق و هەرێمی كوردستان كرد و لەبارەى گۆڕانكارییەكانی ناوچەكە، بیروڕایان گۆڕییەوە. هەردوولا دووپاتیان لەسەر پابەندیی هاوبەشیان بۆ پێشخستنی گەشەپێدان و پاراستنی سەقامگیری، لە ناوچەكەدا كردەوە.
لە تەوەرێكی تری دیدارەكەدا، دووپات لە فراوانكردنی ئاسۆی هاریكاریی هاوبەش لە بوارە جیاجیاكاندا كرایەوە و هەردوولا دووپاتیان كردەوە كە دیالۆگ باشترین ڕێگەیە بۆ چارەسەركردنی قەیرانەكان و پاراستنی بەرژەوەندییە هاوبەشەكان.
لای خۆیەوە نێچیرڤان بارزانی سوپاسی ئەردۆغانی كرد بۆ سەركردایەتی و هەوڵە بەردەوامەكانی لەپێناو هێوركردنەوەی گرژییەكان و پاراستنی ئاسایش و ئارامیی ناوچەكە.