پرۆسەی گواستنەوەی حاجیانی هەرێمی كوردستان بۆ وڵاتی سعوودیە دەستی پێ كرد و یەكەم گەشتی ئاسمانی لە فڕۆكەخانەی نێودەوڵەتیی هەولێرەوە بەرەو جددە ئەنجام درا.
ئەمڕۆ پێنجشەم حەوتی ئایار، كاروان ستوونی گوتەبێژی بەڕێوەبەرایەتیی حەج و عومرەی هەرێمی كوردستان، بە "وشە"ـی راگەیاند، ئەمڕۆ یەكەم كاروانی حاجیانی هەرێمی كوردستان لە فڕۆكەخانەی نێودەوڵەتیی هەولێرەوە بەرەو سعوودیە بەڕێكەوتن.
زیاتر گوتی، ئەم هەنگاوە دوای هەوڵە بەردەوامەكانی سەرۆكی حكوومەتی هەرێمی كوردستان و وەزیری ئەوقاف دێت، كە لە رێگەی گفتوگۆوە لەگەڵ دەستەی گشتی حەج و عومرەی عێراقی و كۆمپانیای فڕۆكەوانی عێراقی گەیشتنە رێككەوتن بۆ ئەوەی گەشتەكان راستەوخۆ لە فڕۆكەخانەكانی هەرێمی كوردستان بن.
باسی لەوەشكرد، بڕیارە سبەی هەینی یەكەم گەشتی حاجیان لە فڕۆكەخانەی نێودەوڵەتیی سلێمانییەوە بەرەو سعوودیە ئەنجام بدرێت.