رەحمان غەریب رێكخەری سەنتەری میترۆ بۆ داكۆكی لە رۆژنامەنووسان كە ئەمڕۆ لە دانیشتنی دادگاییكردنی لاهوور شێخ جەنگی ئامادە بووە، چەند سەرنجێكی لەبارەی دانیشتنەكە خستە ڕوو.
رەحمان غەریب نووسیویەتی، لاهوور شێخ جەنگی كاتێ تەماشای ئەو وێنانەی دەكرد كە دادوەر لەگەڵیدا روونكردنەوەی دەدا، پێڵووی چاوەكانی لە یەكتر نزیك دەكردەوە، بەوردی تەماشای وێنە و ڤیدیۆكانی دەكرد، بە ئاماژە بێئاگابوونی خۆی لەو دیمەنانە دەردەبڕی، چەند جارێكیش تەماشای رێبواری هاوڕێی دەكرد، هەردووكیان زەردەخەنەیان دەگۆڕییەوە.
"ئەمڕۆ 7ی ئایار 2026، بە رووخسارێكی گەشەوە خۆی كرد بە هۆڵی تاوانەكانی دادگای سلێمانی، بەدەستی راستی سڵاوی بۆ ئامادەبووان بەرز كردەوە، هەستی بەشێك لە ئامادەبووان تێكەڵەیەك بوو لە دڵخۆشی و نائومێدی، هەمووان بە پێوە وەستان بۆ پێشوازییە گەرمەكەی لاهووری شێخ جەنگی، رێبوار لەلای دەستی راستی، پۆڵاد لە پشتییەوە، 10 تۆمەتباری تریش لەگەڵی وەستابوون كە بچووكتریانیان لەدایكبووی ساڵی 2000 بوو، ئەو گەنجە لەوە نەدەچوو تەندروستیی چاوەكانی باش بن، زۆری دەتوركاند"، رەحمان غەریب وای نووسیوە.
ئەو باسی لەوە كردووە كە لەگەڵ عەزیز رەئووف و هێمن مەحموود چوونەتە هۆڵەكە، دانیشتنی ئەمڕۆی دادگا تەنیا خوێندنەوەی وتەی هەردوو سكاڵاكار بافل تاڵەبانی و قوباد تاڵەبانی بوو، دژ بە لاهووری شێخ جەنگی و هاوڕێكانی كە تۆمەتەكان هەوڵی كوشتنیان بووە، بە قەناس و خستنە خوارەوەی هەلیكۆپتەر.
ئەوە دەگێڕێتەوە كە ڤیدیۆ و فۆتۆكان بە داتاشۆ بە دیواری لای چەپی هۆڵەكە پێشانی ئامادەبووان درا، رەنگە شتێكی نوێی تێدا نەبێ، دیمەنی ئەو زەلامەیشی تێدابوو كە بە دوو كومباری قەدكراو خۆی دەكات بە مەسعدی باڵەخانەیەكی نیشتجێبوون، دەگوترێت بەشێكی هەوڵی كودەتاكەیە.
هەروەها نووسیویەتی، دادوەر لەگەڵ ئەوەی لائیحەی تۆمەتەكانی پێشكەش دەكرد، مامەڵەیەكی ئاسایی لەگەڵ تۆمەتباران، پارێزەران، ئامادەبووانی ناو هۆڵەكەدا كرد، هەرچەندە رێوشوێنی تەناهیی زیادەڕۆیی پێوە دیاربوو، بەڵام مامەڵەی ئەو هێزانە، هەروەك پۆلیس و فەرمابەرانی ناو دادگا، شارستانی بوون هیچ رواڵەتێكی توندوتیژی پێوە دیار نەبوو.
رەحمان غەریب دەڵێ، هۆڵەكە تا دەهات گەرم دەبوو، ئاوات خانی خوشكی، لاپەڕە سپییەكەی دەستی بۆ نارد، رووخساری پێ باوەشێن كرد، بەڵام ئەو دەكوڵا و خۆی بۆ نەگیرا، رووی كردە دادوەر و گوتی، دادوەر پێش ئەم رووداوانە من كێشەم لەگەڵ سكاڵاكاران هەبووە، پێنج كەسی نزیكم كوژراون، سكاڵا كراوە، بەڵام دۆسیەكانیان نەچوونەتە پێشەوە، داوا دەكەم دۆسیەكەم بنێرنە دادگای تەمیز.
لە كۆتاییشدا نووسیویەتی، كاتێك كەیسێك قاچێكی لەناو چڵپاوی سیاسەتدا بێت و ئەوی تریشی لەناو دەقی یاسایی لاستیك ئاسادا، لەم جۆرە كەیسانەدا گواستنەوەی دۆسیەكەی ناكاتە چاوەڕوانی موعجیزە، یان گۆڕانی دنیا، لەم كەیسانەدا ئەوە سیاسەتە بڕیار دادەڕێژێ، نەك دادوەری، ئەوە بەرهەمی سیاسەتە كە یاسا دەكاتە موعجیزە و لە شەو و ڕۆژیكدا تۆمەتبار دەكاتە شەریك و هاوپەیمانی سیاسی.