ئەژی ئەمین لەبارەی گیراوانی لالەزار پەیامێكی بڵاو كردەوە و رای گەیاند، سەرانی یەكێتی چۆن تەواوی ئەندامانی سەركردایەتی و مەكتەب سیاسییان شكان، دەیانەوێت بەم شێوەیەش حورمەتی دادگا بشكێنن.
ئەمڕۆ یەكشەم 17ـی ئایار، ئەژی ئەمین پەیامێكی بڵاو كردەوە و رای گەیاند، ئەوەی لە میانەی بەڕێوەچوونی دادگاییكردنی ڕاگیراوانی لالەزار ڕووی دا و بیسترا، مایەی هەڵوەستە لەسەركردنە. سەرانی یەكێتیی ئێستەی دەباشان، وەك چۆن تەواوی ئەندامانی سەركردایەتی و مەكتەبی سیاسیی حزبەكەیان زەلیل كردووە، دەیانەوێت ئەو زەلیلی و حوكمڕانییەی جووتبراكە لەناو شار پیادە بكەن و حورمەتی دادگا بشكێنن.
دەشڵێت، دوای سێ جار دادگاییكردنی ڕاگیراوانی لالەزار، دەركەوت دادگاییكردنەكە گاڵتەجاڕانەیە، چونكە سەرانی یەكێتیی ئێستا دەیانەوێت وا پێشانی خەڵك بدەن، كە ئەوە دادپەروەری و حوكمی یاسایە بەسەریاندا جێبەجێ دەكرێت، لە كاتێكدا بافڵ حیسامەدین و قوباد حیسامەدین دوور لە بەهاكانی مرۆڤایەتی و ڕەوشتی كوردانە، دەیانەوێت بە ئەشكەنجەدان و سووكایەتی پێكردن و ئازاردانی نامرۆڤانەی ڕووشكێنەوە، لە دوای پەلاماردانی هۆتێل و ماڵ و موڵكی خەڵك و هاوسەرۆكی پێشووی یەكێتی و شەهیدكردنی چەند پێشمەرگەیەكی ئەنجوومەنی ئاسایش، هێشتا دڵیان ئاوی نەخواردووەتەوە و دەیانەوێ بەزۆر ددانپێدانان بە ڕاگیراوان واژوو بكەن و لەسەر كارێك تاوانباریان بكەن كە نەیانكردووە. دوای شایەتییەكەی یەكێك لە شاهیدەكان لەناو هۆڵی دادگا و بەربەرچاوی دەیان كەس لە ئامادەبووی دادبینییەكە و پارێزەر و دادوەر و نوێنەری وڵاتانی بیانی، ئەوە بە زیادەوە پشتڕاست كرایەوە كە لە ژێر ئەشكەنجەدا، ئەو ددانپێدانانەی پێ واژوو كراوە و سووكایەتییان بەجەستەشی كردووە، ڕووی ڕاستی و ڕاستەقینەی ئەو ترسنۆكانە بۆ كۆمەڵانی خەڵكی كوردستان و شاری هەڵمەت و قوربانی بەتەواوی ئاشكرابوو.
باس لەوەش دەكات، لەبەرئەوە ئەم پرسە پرسێكی ترسناكە و تاقیكردنەوەی پرۆسەی دادوەرییە. ئەمە لە كاتێكدایە كە یاسای نێودەوڵەتی لە ڕێگەی بڕوانامەی مافەكانی و پەیماننامە نێودەوڵەتییەكان، زۆر ڕاشكاوانە دووپاتی لێ دەكاتەوە نەك هەر بەتاوانی دەزانێت، بەڵكو هەر لە دەستپێكەوە، وازهێنان و ڕاگرتنی هەر ئازار و ئەشكەنجەیەكی دەروونی و جەستەیی هەر دیل و گیراوێك، بە پرەنسیپێكی سەرەكی و باڵای خۆی دەزانێت، واتە بەهیچ شێوەیەك نابێت ئەم سەرەتایە پێشێل بكرێت تەنانەت لە باری ناكاو و جەنگیشدا.
روونی كردووەتەوە، لە ژێر ڕۆشنایی ئەم ڕێسا فەرمانبەردارە، كە دەبێتە مایەی پاراستنی شكۆی مرۆڤ لە دژی هەر ئازار و ئەشكەنجەیەكی دەروونی یان جەستەیی لە كاتی لێكۆڵێنەوە. كۆمەڵێك بڕوانامە و ڕێككەوتننامەی نێودەوڵەتی هەن لەوانە: بڕگەی پێنجەمی جاڕنامەی مافەكانی مرۆڤی ساڵی ١٩٤٨، مادەكانی (٧ و ١٠ و ١٤) پەیماننامەی نێودەوڵەتیی مافە مەدەنی و سیاسییەكانی ساڵی ١٩٦٦، مادەكانی (١ و ٢ و ١٥)ی پەیماننامەی نەتەوە یەكگرتووەكانی دژە ئەشكەنجە، مادەكانی (٢ و ١٥) ڕێساكانی ماندێلای ساڵی ٢٠١٥، هەروەها یاسای نێودەوڵەتی مرۆیی، واتە هەر چوار ڕێكەوتننامەكەی جنێڤی ساڵی ١٩٤٩.
ئاماژە بەوەش دەكات، ئەوەی جێگەی سەرسوڕمانە، هێزێك بە سەرپەرشتیی چەند تۆمەتبارێك كە پێشتر تۆمەتبار بوون بە تیرۆر و كاری تێكدەرانە، بە چەندان چەك و تەقەمەنیی قەدەغەكراو و تۆپ و هاوەن و درۆن لە ناوجەرگەی شار، هێرشیان كردەسەر برازاكانی مام جەلال و ئەندامانی ئەنجوومەنی ئاسایشی هەرێمی كوردستان، كەچی ئێستە دادگا لە جیاتی لێپرسینەوە لە خوێنی قوربانیانی ئەو كارەساتەی ئەو شەوە ڕووی دا، هاتووە دادگایی ئەو كەسانە دەكات كە هێرشیان كراوەتەسەر، كورد گوتەنی: هەتا خاوەن ماڵ دزی گرتە دەست، دز خاوەن ماڵی گرت و دەستی بەست.
"لێرەدا بەپێویستی دەزانم داوا لە هەموو ڕێكخراوە نێودەوڵەتییەكان و دادگا و دادوەرانی بە ویژدان و پارێزەران و خەڵكی بەشەرەفی كوردستان بكەم، لەو تاوانە قێزەونانە بێدەنگ نەبن و تا زووە بێنە دەنگ، چونكە ئەوە پرسێكە و هەموو تاكێكی ئەو نیشتمانە دەگرێتەوە، دەبێت ڕێگری بكرێت لە هەڕەشەی حوكمڕانیی جووتبرا قوباد و بافڵ حیسامەدین، بۆ سەر شكۆی دادگا و شاری هەڵمەتی قوربانی و دیموكراسیی هەرێمی كوردستان"، ئەژی ئەمین وا دەڵێت.
لە كۆتایی قسەكانی دەڵێت، لە كاتێكدا لە ساڵوەگەڕی یەكێتییەكەی ڕەوانشاد مام جەلال نزیك دەبینەوە، بەداخەوە بافڵ و قوباد حیسامەدین حزبەكەیان كردووە بە كۆمپانیایەكی مقاوەلاتی بەرژەوەندییە شەخسییەكانی خۆیان و گرێبەستی بەكرێدانی مەوقیف و سیاسەتیان بە ئەملا و ئەولا.