بەشێك لەلایەنە شیعییەكان دوای ئەوەی ناچار كراون چەكی گرووپە میلشیاكان رادەستی دەوڵەت بكەن، ئێستە پرسی تێكەڵكردنی پێشمەرگەش دەورووژێنن، نووسەرێك رای گەیاند، بەپێی دەستوور پێشمەرگە هێزێكی یاساییە و ئەركی پاراستنی كوردستانە.
د. نەوزاد هیتوتی شرۆڤەكاری سیاسی، لە شرۆڤەیەكەدا ئاماژە بەوە دەكات كە ئەم بابەتە زیاتر لەلایەن نەیارانی كوردەوە دەورووژێنرێت.
د. نەوزاد هیتوتی حەوت هۆكاری سەرەكی و ڕەهەندی ناوخۆیی، بەغدا و هەرێمایەتی دەستنیشان دەكات كە لە پشت ورووژاندنی ئەم بابەتەوەن لەم كاتەدا:
بەبڕوای د. نەوزاد حكوومەتی فیدراڵ لە بەغدا، ئەگەر دەرفەتی بۆ بڕەخسێت، دەیەوێت هەموو دەسەڵاتەكان بە شێوەیەكی سەنتراڵی بەڕێوە ببات. وەك چۆن لە ماوەی ڕابردوودا لە ڕێگەی دۆسیەكانی مووچە، بودجە و نەوتەوە هەوڵی بۆ ئەم ناوەندگەرێتییە داوە، ئێستەش ئەگەر دۆخەكەی بۆ بڕەخسێت، دەیەوێت هێزی سەربازیش لە دەستی لایەنی كوردی دەربهێنێت.
لە خاڵی دووەمدا باسی لەوە كردووە، هێزە دەسەڵاتدارە شیعەكان لە بەغدا دەیانەوێت پرسی چەكی پێشمەرگە بكەنە بیانوو و كارتێكی گوشار، بۆ ئەوەی گرووپە چەكدارەكان و بەتایبەتی هێزە پرۆكسییەكانی ئێران لە عێراقدا، ناچار نەبن چەكەكانیان ڕادەستی حكوومەت بكەن.
ئاماژەی بەوەش داوە، زۆربەی ئەو هێز و لایەنە عێراقییانەی كە پرسی هەڵوەشاندنەوە یان گۆڕینی پێگەی پێشمەرگە دەورووژێنن، بە شێوەیەك لە شێوەكان دژی سیستمی فیدراڵین لە عێراقدا و پێیان وایە نابێت ئەم سیستمە بەردەوام بێت.
د. نەوزاد گوتی: پێشمەرگە بەپێی دەستووری عێراق هێزێكی فەرمی و ددانپێدراوە، بەڵام نەیارانی فیدراڵی دەیانەوێت پێگەكەی لاواز بكەن."
یەكێك لە خاڵە هەرە لاوازەكان لەم هاوكێشەیەدا ئەوەیە كە بەداخەوە هەندێك لە هێزە سیاسییە كوردییەكان، تەنیا بۆ دژایەتیكردنی یەكتر و ململانێی حزبی، هانی هێزە شیعەكان دەدەن و ڕێگەیان بۆ خۆش دەكەن كە بەو ئاراستەیەدا هەنگاو بنێن.
شكستی هەرێمی كوردستان لەوەدا كە نەیتوانیوە لە ماوەی زیاتر لە 30 ساڵی ڕابردوودا، هێزێكی پێشمەرگەی یەكگرتووی سەرانسەری و دامەزراوەیی دوور لە هەژموونی حزبی دروست بكات، هۆكار و بیانووی بەهێزتری داوەتە دەست بەغدا بۆ ئەوەی بوونی ئەم هێزە بخاتە ژێر پرسیارەوە.
دۆخی ناوچەكە و هەوڵەكانی حكوومەتی سووریا بۆ سەرلەنوێ كۆنترۆڵكردنەوەی ناوچە كوردییەكان، لەگەڵ لاوازبوونی پێگەی كورد لە ڕۆژئاوای كوردستان، كاریگەریی نەرێنیی ڕاستەوخۆی لەسەر ئەم پرسە داناوە. ئەم پاشەكشەیە هێزە عەرەبییەكانی لە عێراقیش زیاتر هان داوە بۆ ئەوەی هێرش بكەنە سەر پێگە و مافە دەستوورییەكانی كورد.
ڕەهەندێكی تری نێودەوڵەتی، پێوەستە بە سیاسەتی تۆم باراك لە سووریا و هەڵوێستە دژە كوردییەكانی كە كێشەكانی قووڵتر كردووەتەوە. ئەم گۆڕانكارییە لە هەڵوێستی هێزە نێودەوڵەتییەكاندا، ژینگەیەكی لەباری بۆ نەیارانی كورد ڕەخساندووە تا زیاتر باس لە چەككردن یان لاوازكردنی هێزی پێشمەرگە بكەن.
ماوەیەكە لایەنە عێراقییەكان زیاتر لەسەر ئاستی راگەیاندن و هەندێك شرۆڤەكار باسی تێكەڵكردنی پێشمەرگەش دەكەن، بەڵام لە ئاستی فەرمی عێراق هێشتا هیچ لە ئارادا نییە، ئەگەرچی بەپێی دەستوور پێشمەرگە ئەركی دیاری كراوە، بەڵام گومان دەكرێت شەڕێكی نوێی لایەنەكان بێت دژی كورد.