پەرلەمانتارێكی كوردستان رای دەگەیەنێت، دوای پێكهێنانی حكوومەت هیچ لایەنێك گلەیی لەسەر شێوازی پێكهێنانی حكوومەت نەبوو.
ئەمڕۆ دووشەم هەشتی حوزەیران، مونا قاوەچی سكرتێری پێشووی پەرلەمانی كوردستان و ئەندامی پەرلەمانی كوردستان، بە "وشە"ـی راگەیاند، ئەزموونی كابینەی حكوومەتی هەرێمی كوردستان سەلماندی كە حكوومەتێكی بنكەفراوان و هاوبەش، دەتوانێت ژینگەیەكی گونجاو بۆ بڕیارە گرنگەكان دابین بكات.
زیاتر گوتی، تا ئێستەیش هیچ لایەنێكی سیاسی بەشێوەیەكی ڕوون گلەیی لە شێوازی پێكهێنان و كاركردنی ئەو كابینەیە نەكردووە.
مونا قاوەچی تیشكی خستووەتە سەر گرنگترین دەستكەوتەكانی ئەو قۆناغە و ڕای گەیاندووە، پەسندكردنی یاسای چاكسازی هەنگاوێكی گرنگ بوو بۆ نوێكردنەوەی دامەزراوەكان و بەرزكردنەوەی ئاستی خزمەتگوزارییەكان لە هەرێمی كوردستاندا.
باسی لەوەش كرد، جێبەجێكردنی پڕۆژەكانی چارەسەری كێشەی كەمیی ئاو و كارەبا، دروستكردنی ڕێگەوبان و ئەلیكترۆنیكردنی زۆربەی خزمەتگوزارییەكانی، هەموویان لە پێناو ئاسانكاری و خزمەتكردنی باشتر بە هاووڵاتییان ئەنجام دراون.
ڕوونی كردەوە، یەكڕیزی و هاوكاریی نێوان هێزە سیاسییەكان، باشترین ڕێگەیە بۆ پاراستنی بەرژەوەندیی گشتی، ئێستە كاتی ئەوەیە بە هەستكردن بە بەرپرسیارێتی و ڕاستگۆیی لەگەڵ گەل پەرە بە هەرێمی كوردستان بدرێت، چونكە مێژوو ناوی ئەوانە دەنووسێتەوە كە بەرژەوەندیی نیشتمانیان خستووەتە پێش هەموو شتێكەوە.