نێچیرڤان بارزانی سەرۆكی هەرێمی كوردستان، بەشداریی لە ڕێوڕەسمی دەرچوونی خولی پێنجەمی پێگەیاندنی ئەفسەران لە كۆلێژی سەربازیی سێی قەڵاچوالاندا لە سلێمانی كرد.
لە وتارێكدا، نێچیرڤان بارزانی سەرۆكی هەرێمی كوردستان رای گەیاند، ناو و پێناسەی پێشمەرگە، زۆر پیرۆزن. پێشمەرگایەتی بەشێكی زێڕین و سەرەكیی ناسنامەی نیشتمانی و نەتەوایەتیمانە. ئەركی هەموومانە كە پارێزگاری لە ناوبانگ و لە شكۆ و لە مێژووی پڕ لە شانازی، لە خەبات و قوربانییەكانی پێشمەرگە بكەین.
هەروەها سەرۆكی هەرێمی كوردستان گوتی، دەبێ هەستی ئاسایشی نەتەوەیی و نیشتمانیتان بەهێز بێت و خوێندنەوەتان بۆ هەڕەشە و مەترسییەكانی دەوروبەر هەبێت، لە هەر بوارێكدا بێت. لە مەترسییەكانی تیرۆر و توندڕەوی و گوتاری ڕقوكینەوە، تا دەگاتە مەترسییە ئەمنییەكان. پێویستە ئاگایی و هۆشیاریتان لەمبارەیەوە بەهێز بكەن.
دەرچووانی ئازیز،
ئامادەبووانی خۆشەویست،
ڕۆژتان باش،
هەمووتان زۆر بەخێر بێن، بۆ ڕێوڕەسمی دەرچوونی خولی پێنجەمی پێگەیاندنی ئەفسەران لە كۆلێژی سەربازیی سێی قەڵاچوالان لە شاری سلێمانیی خۆشەویست. ئەم دیمەنە پڕ لە دیسپلین و ڕێكخراو و شكۆدارە، جێگەی شانازیی ئێمە و خێزانەكانتان و تەواوی گەلی كوردستانە.
زۆر خۆشحاڵ و سەربەرزین كە ئەمڕۆ پێكەوە شایەدی دەرچوونی (210) ئەفسەری گەنج و هۆشیار و لێهاتووی كوردستانین. ئەم ئەفسەرانە دوای (9) مانگ لە ماندووبوون و شەونخونی، خولی مەشقی سەربازی، ئەكادیمی و پراكتیكیی خۆیان سەركەوتووانە بەكۆتا هێناوە. ئەوان ئیتر وەك هێزێكی نوێ و زانستی دێنە ناو پەیكەری وەزارەتی پێشمەرگە، تا پەرە بە سیستەمی بەرگریی نیشتمانیی وڵاتەكەمان بدەن.
جێگەی دەستخۆشی و مایەی گەشبینییە كە دوای تەواوكردنی خوێندنی زانكۆ، ئێوە، ئێوەی خۆشەویست خۆبەخشانە، بە ویست و بڕیاری خۆتان هاتوونەتە ناو ڕیزەكانی خوێندنی سەربازی. ئەمە بەرزترین ئاستی دڵسۆزی، ئاگایی و نیشتمانپەروەریی ئێوە پیشان دەدات بۆ گەلی خۆتان.
ئێمە و دایكوباوكتان، دڵسۆزەكانتان، كەسوكارتان و هاوكارەكانتان، بەم بڕیارەی ئێوە سەربەرز و دڵخۆشین و هیوای سەركەوتنتان بۆ دەخوازین. لە ناخی دڵەوە بە گەرمی پیرۆزبایی لە ئێوە و لە خێزانە ئازیزیەكانتان دەكەم بۆ ئەم سەركەوتنەی كە بەدەستتان هێناوە. خوای گەورە پشتیوانتان بێت لە ژیان و كارەكانتان سەركەوتوو و سەرفراز و سەربڵند بن.
هەر لێرەدا جەنابی سەرۆك مام جەلال بە ڕێزەوە بەبیر دەهێنینەوە كە لە ساڵی 1992 ئەم كۆلێژە بە فەرمانی جەنابیان دامەزرا بۆ ئەوەی خزمەت بە وڵات و خزمەت بە كوردستان و خزمەت بە تەواوی عێراق بكرێت.
دەرچووانی هێژا،
ناو و پێناسەی پێشمەرگە، زۆر پیرۆزن. پێشمەرگایەتی بەشێكی زێڕین و سەرەكیی ناسنامەی نیشتمانی و نەتەوایەتیمانە. ئەركی هەموومانە كە پارێزگاری لە ناوبانگ و لە شكۆ و لە مێژووی پڕ لە شانازی، لە خەبات و قوربانییەكانی پێشمەرگە بكەین. ئەمەش بەوە دەكرێت كە ئێوەی ئازیز و خۆشەویست دەبێ لە چوارچێوەی هێزێكی یەكگرتوو، پیشەیی و نیشتمانیدا، خزمەت بكەن.
لەم سەردەمە نوێیەدا، ئەركی ئێوە تەنیا لە مەیدانەكانی ڕووبەڕووبوونەوەی كلاسیكدا كورت ناكرێتەوە، بەڵكوو پێویستە ئێوە بە گۆڕانكارییەكانی سەردەم، نوێگەری و ڕۆحی داهێنان ڕابێن.
خۆپێگەیاندنی بەردەوام لەڕووی زانستی و پیشەیییەوە، دەبێ ببێتە ستراتیژی كاركردنتان لە كاروانی داهاتووی ژیانتان، گرنگیی پێویست بە فێربوونی تەكنەلۆژیای سەربازیی هاوچەرخ بدەن بۆ ئەوەی هاوتەریبی پێشكەوتنەكانی جیهان بن.
دەبێ هەستی ئاسایشی نەتەوەیی و نیشتمانیتان بەهێز بێت و خوێندنەوەتان بۆ هەڕەشە و مەترسییەكانی دەوروبەر هەبێت، لە هەر بوارێكدا بێت. لە مەترسییەكانی تیرۆر و توندڕەوی و گوتاری ڕقوكینەوە، تا دەگاتە مەترسییە ئەمنییەكان. پێویستە ئاگایی و هۆشیاریتان لەمبارەیەوە بەهێز بكەن.
بێگومان، لەپاڵ ئەم ئەركە پیرۆزەدا، گرنگیدان بە بژێویی ژیانی پێشمەرگە قارەمانەكان و باشتركردنی گوزەرانیان، هەمیشە لە پێشینەی كارەكانی ئێمەدا دەمێنێتەوە، چونكە ئێوە شایەنی ژیانێكی سەربەرزن.
دەرچووانی ئازیز،
ئێوە سەركەوتووانە قۆناغێكی گرنگتان تێپەڕاند، بەڵام بەرپرسیاریەتیتان لەمڕۆوە فراوانتر و قورستر دەبێت. ئێوە دەبێ لە ناو هێزی پێشمەرگەدا ببنە پارێزەری سەرەكیی چەمكەكانی پێكەوەژیان، لێبوردەیی و یەكترقبووڵكردن.
ئەو كولتوورەی شانازیی پێوە دەكەین و هەرێمی كوردستانی كردووەتە لانكەی ئارامی بۆ هەموو ئایین و نەتەوە جیاوازەكان و بووەتە مایەی ڕێز و پێزانینی تەواوی كۆمەڵگەی نێودەوڵەتی.
ئێوە دەبێ پارێزەری چەمك و بەها مەدەنییەكان، دیموكراسی، مافەكانی مرۆڤ و ئازادییە گشتییەكان بن. هیچ كات مەبنە بەشێك و لایەنێكی كێشە و ململانێ سیاسییەكان، بەڵكوو هەمیشە دەبێ وەك هێزێكی نیشتمانیی كوردستانی بمێننەوە و بەرگری لە شكۆی مرۆڤ بكەن بێ جیاوازی لەم وڵاتەدا.
ئامادەبووانی بەڕێز،
پەیامی هەمیشەییی ئێمە بۆ ناوخۆی كوردستان، یەكهەڵوێستی، تەبایی، پێكەوەیی و كۆدەنگییە لەنێوان سەرجەم هێز و لایەنە سیاسییەكان و پێكهاتەكانی كوردستاندا. هێز و مانەوەی هەرێمی كوردستان كاتێك مسۆگەر دەبێت كە ئێمە لە ناوخۆماندا تەبا بین و بەرژەوەندییە باڵاكانی نیشتمان بخەینە سەرووی هەموو ململانێ و جیاوازییەكی دیكەوە.
فرەڕەنگیمان دەوڵەمەندیمانە، هەموو پێكهاتەكانی كوردستان لە هەر نەتەوەیەك و ئایینێك بن، پێكەوە شوناسی جوانی ئەم نیشتمانە پێك دەهێنن. ئەمە جوانییەكی زۆر و هێزێكی گەورەیە بۆ كوردستان.
هەر لەم بۆنەیەدا، جارێكی تر سوپاس و پێزانینی هەرێمی كوردستان پێشكەش بە هێزەكانی هاوپەیمانیی نێودەوڵەتی بە سەرۆكایەتیی ئەمەریكا دەكەم كە لە شەڕی دژی داعشدا زۆر دڵسۆزانە پشتیوانیی سەربازیی عێراق و هەرێمی كوردستانیان كرد و هاوكارمان بوون لە تێكشكاندنی تیرۆردا.
سوپاس و پێزانینمان دووپات دەكەینەوە بۆ بەردەوامی و دڵسۆزیی وڵاتانی دۆست و هاوپەیمانان كە لە پرۆسەی چاكسازیی وەزارەتی پێشمەرگە و یەكگرتنەوەی هێزەكانی پێشمەرگەدا، هاوكار و یارمەتیدەرێكی گرنگ و جددیی ئێمەن.
ڕاستە هەنگاوی باش نراوە، بەڵام خواستی ئێمە لەوە زیاترە و پێویستە هەنگاوەكان زۆر خێراتر بكرێن. دەبێ سستییەكانی ئەم پرۆسەیە چارەسەر بكرێن. ئاڵنگارییەكان و ململانێكانی ناوچەكە، ئەوەمان لێ دەخوازێت ڕۆژێك زووتر ئەم ئەركە جێبەجێ بكەین كە خزمەت بە هەموو كوردستان و عێراق دەكات.
بۆیە هەموو لایەك دڵنیا دەكەینەوە، كە ئێمە بە ئیرادەیەكی جددی و بەهێزەوە بەردەوام دەبین بۆ تێپەڕاندنی ئاستەنگەكان و سەرخستنی ئەم پرۆسە چارەنووسسازە، چونكە یەكگرتووییی پێشمەرگە، گەرەنتی و بنەمایەكی سەرەكیی پاراستنی مافە دەستوورییەكان و قەوارەی فیدراڵیی هەرێمی كوردستانە.
دەرچووانی خۆشەویست،
ئەمڕۆ، بە شانازییەوە لەژێر سایە و شكۆی ئاڵای كوردستان و ئاڵای عێراقدا دەردەچن. ئەمە گوزارشتێكی ڕاستەقینەیە لەو واقیعەی كە هەرێمی كوردستانی فیدراڵ، وەك قەوارەیەكی ڕەوای دەستووریی دانپێدانراو، بەشێكی بەهێزی دەستووری، یاسایی و بنەڕەتییە لە چوارچێوەی دەوڵەتی عێراقی فیدراڵیدا.
بۆیە پێویستە حكوومەتی فیدراڵ لە بەغدا، هەموو ئەرك و پابەندییە یاسایی و دەستوورییەكانی خۆی بەرامبەر بە پێشمەرگە جێبەجێ بكات، بەتایبەتی دابینكردنی چەك و تەقەمەنی و تەواوی پێداویستییە سەربازییەكان، چونكە پێشمەرگە پارێزەری ئاشتی، ئاسایش و سەقامگیریی هەموو عێراقە، لە دەستووریشدا ئەم بەشە بە تەواوەتی باس كراوە.
پاشەڕۆژی هەرێمی كوردستان و تەواوی عێراق پێكەوە گرێدراوە؛ سەركەوتنمان یەكە، ئاڵنگاری و چارەنووسیشمان لە عێراقدا هاوبەشن. ئێمە لە هەرێمی كوردستان بە گەشبینییەوە چاوەڕێی كاركردنی هاوبەشین لەگەڵ حكوومەتی سەرۆكوەزیران بەڕێز عەلی زەیدی، تا لەسەر بنەمای دەستوور، ڕێزگرتنی دوولایەنە و هاوبەشیی نیشتمانیی ڕاستەقینە، ئاوەدانی و پێشكەوتن بۆ هەموو عێراق بێ جیاوازی مسۆگەر بكەین.
ئەم ئاراستە نیشتمانی و ئاشتییانەی ئێمە، هاوتەریبە لەگەڵ ئەو دۆخە گەشبینە نوێیەی كە لە ناوچەكەمان و جیهاندا دروست بووە. ئێمە بە خۆشحاڵییەوە لە هەرێمی كوردستان پێشوازیمان لە كۆتاییهاتنی گرژی و شەڕی نێوان ئەمەریكا و ئێران كرد كە لە ڕێگەی ڕێككەوتن، دیالۆگ و دیپلۆماسییەوە هیوادارین كۆتایی پێی بێت.
دووپاتی دەكەینەوە كە هەرێمی كوردستان وەك هەمیشە بە فاكتەری ئارامی و پردی متمانە لە ناوچەكەدا دەمێنێتەوە. كارمان بۆ ئەوە كردووە و بەردەوام دەبین بۆ ئەوەی عێراق و هەرێمی كوردستان بە هیچ شێوەیەك نەبنە بەشێك لە كێشە و لە ئاڵۆزییەكان لە ناوچەكەدا.
ئێمە دەمانەوێت و كار بۆ ئەوە دەكەین هەمیشە بەشێك بین لە چارەسەر و لە هاریكاریی هاوبەش بۆ چەسپاندنی ئاشتی و سەقامگیری و پێشكەوتن و خۆشگوزەرانی. بۆ دۆزینەوەی ڕێگەكانی بەرژوەندیی هاوبەش و پێكەوەكاركردن لەم وڵاتەدا و لەم ناوچەیەدا كە ئێمە تێیدا دەژیین.
لە كۆتاییدا، سوپاس و پێزانینی زۆرمان پێشكەش بە بەڕێزان ڕاگر و مامۆستایانی ڕاهێنەر و سەرپەرشتیارانی كۆلێژی سەربازیی سێی قەڵاچوالان دەكەین كە ئەركێكی گەورە و پیرۆزیان كێشا بۆ پێگەیاندنی ئەم گەنجانەی كوردستان و سەرخستنی ئەم خولە سەربازییە. بە گەرمی دەستخۆشیتان لێ دەكەم.
سەری ڕێز و نەوازش بۆ گیانی پاكی شەهیدانی كوردستان دادەنوێنین كە ئەمڕۆ لە سایەی خوێنی ئەم شەهیدانە ئێمە كوردستانێكی ئازاد دەبینین و دەتوانین ئەم ڕێوڕەسمانە بگێڕین. ئەو شەهیدانە بەبیر دەهێنینەوە كە ژیانی خۆیان بەخت كرد تا ئەمڕۆ ئێمە لێرە بە ئارامی كۆببینەوە. سڵاو و ڕێز بۆ شەهیدانی زیندوو، بریندارە قارەمانەكانمان لە كوردستان لە هەر شوێنێك بن، سڵاو و ڕێز و خۆشەویستییان بۆ دەنێرین، هیوای چاكبوونەوەیان بۆ دەخوازم.
پیرۆزە لە ئێوە، پیرۆزە لە خێزانە خۆشەویستەكانتان، لە ژیان و لە ئەرك و بەرپرسیاریەتیی تازەتاندا، هیوای سەركەوتنتان بۆ دەخوازم، تەمەندرێژ بن، سەرفراز بن، سەركەوتوو بن، خوای گەورە لە ژیاندا پشتیوانتان بێت.
زۆر سوپاس.