چالاكێكی سیاسیی رای دەگەیەنێت، ریبای سیاسی لە ریبای پارە مەترسیدارترە، چونكە ریبای پارە تاكێك لەناو دەبات، بەڵام ریبای سیاسی متمانەی نەتەوەیەك دەكوژێت و ئەوانەی متمانەی خەڵك دەفرۆشن، پێش هەر شتێك شەرەفی خۆیان دەفرۆشن.
فـەهـد رەحمان فەقێ مەركی چالاكی سیاسی، بۆ "وشە" گوتی، قەوارە و هەرێمی كوردستان نە بە بەخشین و نە بە بڕیاری تاكەكەسان دروست بووە، بەڵكو بە خوێنی هەزاران شەهید، قوربانیی بنەماڵەی پێشمەرگە و ساڵانێكی دوورودرێژی خەبات و بەرخودان پارێزراوە، نابێت كەس بە قسە یان بڕیارێكی نایاسایی لەسەری دەستدرێژی بكات.
"بەپێی مادەی 117 و 121ی دەستووری كۆماری عێراق، هەرێمی كوردستان و دامەزراوە دەستوورییەكانی ناسراون، مادەی 140 ڕێگای یاسایی چارەسەری ناوچەکانى دەرەوەى ئیدارەى هەرێمى کوردستان دیاری كردووە، بۆیە هیچ كەس و هیچ لایەنێك مافی ئەوەی نییە بە دژی دەستوور قەوارە و سنووری هەرێم بگۆڕێت یان لێی بدات". ئەو چالاكە وای گوت.
روونیشی كردەوە كە گەلی كورد لە مێژووی خۆیدا بەردەوام بەرگری لە خاك و مافەكانی كردووە و ئەو ئیرادەیە هەرگیز نابێت بشكێت، هەموو دەسكەوتەكانی ئەم گەلە بە خەبات و قوربانی و یەكگرتوویی بەدەست هاتوون.
دووپاتی كردەوە، هەرێمی كوردستان میراتی شەهیدانە؛ پاراستنی ئەو میراتە بە پابەندبوون بە دەستوور، یاسا و یەكڕیزی نیشتمانی دەبێت، چونكە ئەو خاكە بە خوێن پارێزراوە و بە خوێنیش نابێت مافی گەلەكەی لێ بسەنرێت.
لەبارەی هەڵسوكەوتەكانی شاسواریش دەڵێ، ریبای سیاسی لە ریبای پارە مەترسیدارترە، چونكە ریبای پارە تاكێك لەناو دەبات، بەڵام ریبای سیاسی متمانەی نەتەوەیەك دەكوژێت، ئەو كەسەی بە ناوی خەڵك دەنگ وەردەگرێت و پاشان لە ژێر فشار یان بۆ بەرژەوەندیی دەنگ و ویستی گەل دەفرۆشێت، نوێنەری خەڵك نییە، دەلالی ئیرادەی گەلە، بۆیە دەنگ ئامانەتە، نەك كاڵای بازاڕ و ئەوانەی متمانەی خەڵك دەفرۆشن، پێش هەر شتێك شەرەفی خۆیان دەفرۆشن.
وشە/ فەیسەڵ محەمەد شێخانی