كۆماری ئیسلامیی ئێران هێزی زیاتری ڕەوانەی سنووری باشوور و ڕۆژهەڵاتی كوردستان كردووە، دەیەوێت سنوورەكەش بەدیوار و تەل جێگیرتر بكات.
ئێران لە سنووری باشوور و رۆژهەڵاتی كوردستان هێزی زۆری جێگیر كردووە، خەریكی دروستكردنی دیوارە، تەلەبەندی ناوچەكەش دەكات.
لەگەڵ وەستانی شەڕی ئەمەریكا و ئیسرائیل، كۆماری ئیسلامیی ئێران لە نێوان پێنجوێن و مەریوان و بانە، هێزێكی زۆری جێگیر كردووە و بەپێی سەرچاوە خۆجێیەكانی ناوچەكە، بە دیوار و تەلبەند بەتەواوی نێوانی باشوور و رۆژهەڵاتی كوردستان دادەخات.
خەڵكی ناوچەی پێنجوێن بە "وشە"یان راگەیاند، بەیانووی هێزی پژاك و دیموكرات و كۆمەڵە، ئێران دەستی كردووە بە دابڕینی تەواوەتی هەردوو بەشەكەی كوردستان، جگە لە مەرزەكان هیچ رێگەیەكی بۆ هاتوچۆ نەهێشتووەتەوە.
ئەگەرچی 100 ساڵە ئەو دوو پارچەیە لە نێوان وڵاتانی داگیركەری كورد دابەش كراون و سنوورێكی دەسكردیان بۆ دانراوە، بەڵام خەڵكی ناوچەكە ئەو سنوورانەیان بەزاندووە و بەردەوام هاتوچۆیان كردووە و ژن و ژنخوازی هەبووە و پێوەندیی كۆمەڵایەتی بەردەوام بووە.
بەڵام ئێستە ئێران دەیەوێت هەردوو بەشەكەی كوردستان بەتەواوی لێكداببڕێت و جگە لە پچڕانی پێوەندیی خەڵكی هەردوو سنوورەكە، بەم هەنگاوە فشاری تەواوەتی خستووەتە سەر كۆڵبەرانیش.