دەما چەند رۆژاییە وەرزێ چنینا سماقێ ل گوندەوارێن پارێزگەها دهۆکێ ب تایبەتی سنورێ قەزایێن ئاکرێ و ئامێدیێ دەستپێکر، ئامارێن دەڤەرێ ئاماژە دکەن کو سالانە نێزیکێ شەش هزار تەنێن سماقێ ل پارێزگەها دهۆکێ دهێنە بەرهەمئینان، ژلایەکێ دنڤە بۆردمانێن تورکیا زیانێن هەری زور ب رەزڤانێن سماقێ ل دەڤەرا ئامێدیێ و پشکەکا دەڤەرا زێبارێ گەهاندیە.
نزار زادە، وەلاتیەکێ گوندێ هلورا یا سەر ب دەڤەرا زێبارێ یە دیارکر کو ل گوندێ وان پتری 100 رەزێن تایبەت ب سماقێ هەنە و گوت، هەر ئێک ژ وان رەزێن سماقێ دناڤبەرا 100کگم هەتا 5000 کگم بەرهەم هەیە، هەر چەندە وەکو بەرهەم ئەڤ سالە گەلەک باش نیە ژبەرکو گەرم پترە و نەخوشی هەبوینە، بەلێ بهایێ وێ باشە و کیلو نێزیکێ پێنج هزار دیناران دهێتە فڕۆتن.
زێدەتر گوت، ئەگەر حوکمەت هەڤکاربیت بو جوتیاران دشیان دایە زێدەتر بهێتە چاندن، زێدەباری کو بازاڕەک بۆ بەرهەمێ سماڤێ بهێتە دیتن و بهێتە رەوانەکرن بۆ پارێزگەهێن عیراقێ.
مێهڤان رێکانی، وەلاتیەکێ ناحیا شێلادزێ یە دیارکر کو ژ کوما 92 گوندێن سنورێ ناحیا شێلادزێ، جوتیار و رەزڤانێن 85 گوندان نەشێن بچنە سماقێن خوە ژبەر بالەفرێن تورکیا و گوت، جهێ داخێ یە ئەڤە چەند سالەکە خەلکێ مە ژ داهات و بەرهەمێ سماقێ بێ بەهر بویی و زیانێن هەری زور ب وان کەفتنە، ئەگەر رێی بهێتەدان خەلک ڤەگەرن سەر گوندێن خوە دێ هزاران دەلیڤێن کاری بۆ خەلکی ڤەبن و هاتن و نەهاتن و گیروبونا موچەیی کارتێکرنێن خراپ ل سەر خەلکێ وان گوندان نەدکر، چونکی دا ب داهاتێ بەرهەمێن چیایی ژین.
بەختیار زێباری، ئەو ژی وەلاتیەکێ سنورێ ناحیا دینارتێ یە دیارکر کو دەڤەرا دینارتە پشکا شێری یا بەرهەمێ سماڤێ ل کوردستانێ هەیە و گوت، دینارتە پتری 80ێ گوندێن ئاڤەدان هەنە، هەر هەموو گوندان ژی سماق هەیە و سالانە داهاتەکێ باش دفروشن، بەلێ ئەڤ سالە بەرهەم ژ سالێن بوری کێمترە، ئێک ژ ئەگەرێن سەرەکی گەرم و هەبونا روودانێن ئاگری یە ل هندەک جها ب ئەگەرێ بوردمانێن تورکیا.
ئەحمەد جەمیل، رێڤەبەرێ گشتی یێ چاندنێ ل پارێزگەها دهۆکێ بۆ "وشە" گوت، ل سنورێ پارێزگەها دهۆکێ 11 هزار دونەمێن ئەردی ب بەرهەمێ سماقێ هاتیە چاندن، سالانە پێنج هزار و 481 تەنێن سماقێ دهێنە بەرهمئینان کو ئەڤ یەک ژی رێژەییەکا باشە.
زورترین سماقا پارێزگەها دهۆکێ دکەڤیتە هەردوو قەزایێن ئاکرێ و ئامێدیێ، بناڤ و دەنگترین سماقا کوردستانێ ژی ل گوندێ دوستەکاییە ل دەڤەرا دینارتە کو سەنگا هندەک ژ گولیێن وێ نێزیکێ کیلوییەکێ بویە.