هەر چەندە ئەڤ سالە بەرهەمێ توتنێ ل دەڤەرا شنگالێ کێمبویە، بەلێ ل گەل هندێ ژی نێزیکێ 40 جوتیار هەنە و بەرهەمێ وان دگەهیتە نێزیکێ 600 ملیون دیناران.
ئەلیاس قەیرانی، ئێک ژ وان جوتیارایە کو رێژەییەکا توتنێ چاندیە بۆ وشە گوت، دەڤەرا شنگالێ ئێک ژ وان دەڤەرێن کوردستانێ یە کو ئاخا وێ ب کێر چاندنێ دهێت، د نوکە دا چەندین جورێن چاندن و دەرامەتی هاتینە چاندن و خەلک پێڤە مژول بویە وداهاتەک ژی بۆ وان دهێت و خێزانێن خوە د ژینن.
زێدەتر گوت، ئەڤ سالە نێزیکێ 40 جوتیاران دەست ب چاندنا توتنێ کریە، وەکو دیارە توتنا دەڤەرا شنگالێ ل بەر ئاڤا سار و شیرین دهێتە چاندن و ب سروشتی دهێتە بەرهمئینان بێی کۆ مادەیێن کێمیای تێدا بهێنە بکارئینان، هەر چەندە ئەڤ سالە ژ ئەگەرێ کەوهەوایی و کێمبونا ئاڤێ بەرهەمێ توتنێ کێم بویە، بەلێ ئەڤ سالە نێزیکێ 20 تەنێن توتنێ ژلایێ جوتیاران هاتیە بەرهەمئینان.
ناڤبری دیارکر ژی کو توتن ب دوو جورا دهێتە فڕوتن و گوت ژی، جورێ ئێکێ ب شێوەیێ بەلگ دهێتە فروتن کو کیلویا وێ نێزیکێ 20 هزار دیناراییە، شێوەیێ دویێ ب شیوەیێ هشک و ڤاڤارتی دهێتە فروتن کو کیلویا وێ نێزیکێ 40 هزار دینارایە، ب گشتی بەرهەمێ ئەڤ سالە نێزیکێ 600 ملیون دینارایە، ئەڤ یەک ژی تا رادەیەکێ باشە و داهاتەک بو خەلکی پێڤە دهێت.
پرانیا بەرهەمێ توتنا شنگالێ هەر ل شنگال و دەوروبەر دهێتە فروتن، تامەکا خوش و جیاواز هەیە و رەنگێ و جوانە، ب باشترین توتنا عەرەبی دهێتە هژمارتن، بەلێ هەتا نوکە نەهاتیە رەوانەکرن بو دەرڤە و باشور و نافەراستا عیراقێ، ئەوی جوتیاری هوسا گوت.
جوتیارێ ناڤبری خواست کو کارگەهێن داگرتن و چێکرنا جگارا ل دەڤەرێ بهێنە چێکرن و گوت ژی، ئەگەر کارگەهـ ل دەڤەرێ بهێنە چێکرن و پشتەڤانیا جوتیاران بهێتەکرن، دێ بەرهەمئینانا توتنێ ل شنگالێ زۆر زێدە بیت و هزاران گەنج و وەلاتی ژی بکارکەڤن.
پشتی سالا 2014ێ و هاتنا داعش بۆ دەڤەرێ، بەرهەمێ چاندنێ ل دەڤەرێ سفربو، ڤان دوو سێ سالێن بوری، هنووەک ژ ئاوارەیان ڤەگەریانە و دەست ب چاندنێ کریە، بەلێ رەوشا ئەمنی و گورانکاریێن کەشوهەوایی کارتێکرن ل سەر پێشڤەچۆنا چاندنێ کریە.