ب مەرەما پێشڤەبرن و گرنگیدان ب کەرتێ چاندنێ، سێ پروژێن نوو یێن چاندنێ ب کوژمێ پتری سێ ملیون و 500 هزار دولاران دێ ل سێمێلێ هێنە چێکرن.
فەلاح حاجی، بەرپرسێ راگەهاندنێ ل رێڤەبەریا گشتی یا وەبەرهێنانێ ل پارێزگەها دهۆکێ بۆ "وشە" گوت،
سێ پڕۆژەیێن نوو یێن چاندنیێ ب سەرمایێ سێ ملیون و 610 هزار و 500 دۆلاران دێ ل دەڤەرا سێمێلێ ژلایێ سێ وەبەرهێنەران ڤە هێنە چێکرن.
زێدەتر وت، گرنگی یا ڤان پڕۆژەیان دوێ چەندێ دایە کو ئەردێ قەزا سێمێلێ یێ گونجایە بۆ چاندنیێ و بەری نۆکە ژی پڕانیا پڕۆژەیێن ڤی جوری هەر ل وێ دەڤەرێ بووینە، دگەلەک دەمان دا ڤێ دەڤەرێ ب بەرهەمێ گەنم و ڤەهـ و نیسک و نۆک و زەرزەواتی بازاڕێن هەرێما کوردستانێ ژ بەرهەمێ ناڤخۆ پڕ کرییە و ستراتیژیا کابینەیا نەهێ ئەوە کو ب تایبەتی دوارێ وەبەرهێنانێ دا هەر دەڤەرەکێ ل گۆڕی سروشت و شیانێن وێ مفا ژێ بهێتە وەرگرتن، هەر ب وێ مەرەمێ ژی دئێک دەم دا مۆلەت بۆ ڤان سێ پڕۆژەیان هاتە دان.
سەبارەت پرۆژان ژی گوت، پڕۆژیێ کاپتن یێ چاندنێ دناڤ خانیێن شیشەی دا، بۆ زێدەکرنا بەرهەمێن ناڤخۆیی ب رێکێن جودا جودا ژ وان کارانە کو کابینەیا نەهێ بجددی پشتەڤانیێ لێ دکەت، هەر دڤی چارچووڤەیدا مۆلەتا وەبەرهێنانێ دایە پڕۆژەیێ کاپتن یێ چاندنێ دناڤ خانیێن شیشەی دا ب سەرمایەیێ ملیوتەک و 250 هزار دولاران دهێتە بجهئینان، پێکدهێت ژ خانیێن شیشەی، کارگێڕێ و جهێ تایبەت بۆ کرێکاران و ژۆرا خزمەتێن کارەبێ و کەسکاتی و جاددە و دەڤەرین ڤەکری بو چاندنێ. بڕیارە دماوێ دوو ساڵان دا بدوماهیک بهێت، دیسان پڕۆژەیێ بەدران یێ چاندنێ دناڤ خانیێن پلاستیکی دا ب سەرمایێ ملیونەک و 224 هزار و 500 دولاران بۆ ماوێ 30 هەیڤان دێ هێتە چێکرن، ئەڤ پڕۆژەیە ژ 15 خانیێن پلاستیکی و دوو کۆگەهان و کارگێڕی و جهێ تایبەت بۆ کرێکاران و دەڤەرین ڤەکری بو چاندنێ و باخچە و پارکان پێک دهێت، هەر دیسان پڕۆژەیەکێ چاندنا دارێن فستەق و خۆخ و زەیتوونان مۆلەتا وەبەرهێنانێ وەرگرت و دێ ب سەرمایێ ملیونەک و 136 هزار دولاران د ماوێ 30 هەیڤان دا هێتە چێکرن، پرۆژە ژ سێ زۆنێن ڤەکری بۆ چاندنا دارێن فستەق، زەیتوون و خۆخان و کارگێڕیا پڕۆژەی و جهێ کرێکاران و خزمەتێن کارەبێ و دەڤەرێن کەسکاتی و جهی راوەستاندنا ترومبێلان پێکدهێت.