ئەگەرچی بەشێك لە شارەزایان دەڵێن عێراقی چی وای نییە رەوانەی ئەمەریكای بكات جگە لە نەوت بۆ ئەوەی رسووماتی لەسەر زیاد بكرێت، كە ئەویش وەك پێشتر هاتە راگەیاندن زیادكردنی رسوومات نایگرێتەوە، ئەمڕۆ دۆناڵد ترەمپ سەرۆكی ئەمەریكا زیادكردنی رسووماتی گومرگی لەسەر چەند وڵاتێك لەوانە عێراق بە رێژەی 30% راگەیاند، شارەزایەك باسی كاریگەریی ئەو زیادكردنە لەسەر ئابووریی عێراق دەكات.
نەوار سەعدی مامۆستای ئابووریی نێودەوڵەتی ئاماژە دەكات، زیادكردنی رسووماتە گومرگییەكان لە لایەن ئەمەریكا كاریگەریی تێكهەڵكێشی لەسەر ئابووریی ناوخۆیی عێراق دەبێت، ئەو پێی وایە ئەوە سەرەتایەكە بۆ داڕشتنەوەی پێوەندیی بازرگانی لە نێوان واشنتن و بەغدا.
سەعدی ئاماژەی كرد، كاریگەریی بڕیارەكەی ترەمپ لەسەر عێراق تێكهەڵكێشە، لە لایەك هەناردەكارانی عێراق كە بەرهەمەكانیان هەناردەی ئەمەریكا دەكەن و ژمارەیان كەمە، زەرەر دەكەن، مەترسییەكە لێرە ئەوەیە عێراق بنكەیەكی هەناردەكردنی جۆراوجۆر یان بەهێزی نییە گفتوگۆی لەسەر بكات، چونكە زیاتر لە 90%ی هەناردەكردنی عێراق نەوتە.
زیاتر گوتی، دووەم، بڕیارەكە كار لە ناوبانگی عێراق لە بازاڕەكانی دنیا دەكات، چونكە سەپاندنی رسووماتی لەو جۆرە تەنیا بە هۆكاری بازرگانی نییە، بەڵكو زۆرجار پێوەستە بە هۆكاری سیاسی یان هەڵسەنگاندنی ئەمەریكی بۆ ئاستی پابەندبوونی عێراق بە پێوەرە بازرگانییەكان یان رۆڵی لە ناوچەكە و هەڵوێستی بەرانبەر بە سزاكانی ئەمەریكا لەسەر چەند لایەنێك وەك ئێران و رووسیا.
ئەو مامۆستایە دووپاتی كردەوە، بە مانایەكی تر رەنگە ئەو هەنگاوە سەرەتایەك بێت بۆ رێوشوێنی توندتر بۆ داڕشتنەوەی پێوەندیی بازرگانی لە نێوان واشنتن و بەغدا لە چوارچێوەیەكی فرەوانتری سیاسی، لێرەدا لێكەوتەكانی بڕیارەكە رەنگە بگاتە دیاریكردنی پێوەندیی عێراق لەگەڵ هاوبەشانی تر، جا لە رۆژئاوا یان لە ناوچەكە بێت.