ب پشتەڤانیا حکومەتا هەرێما کوردستانێ، هژمارەکا بنگەهێن وەرگرتنا تری بۆ جوتیاران ل دەڤەرێن جودایێن پارێزگەها دهۆک و ئیدارا سەربەخۆیا زاخۆ هاتنە دانان.
ئەحمەد جەمیل، رێڤەبەرێ گشتی یێ چاندنێ ل پارێزگەها دهۆکێ بۆ "وشە"گوت، ب مەرەما پشتەڤانیکرنا جوتیاران و پەیداکرنا بازاری بۆ بەرهەمێ خومالی یێ جوتیاران، ئەڤرۆ ل سنورێ پارێزگەها دهۆکێ و ئیدارا سەربەخۆیا زاخۆ ژی هەشت بنگەهێن وەرگرتنا تری هاتنە دانان و دەست ب وەرگرتنا تریێ جوتیاران کریە.
زێدەتر گوت، ئەڤ بنگەهـە ب پشتەڤانیا حکومەتا هەرێما کوردستانێ ژلایێ کومپانیەکا خومالی ل دەڤەرێن جودایێن دهۆک و زاخۆ هاتینەدانان ب تایبەتی ل زاویتە، باگێرا، کورا، مانگێش و باتیفا و چەند جهێن دی ژبەرکو زورترین هژمارا جوتیاران و زورترین تریێ پارێزگەهن دهوکێ دکەڤێتە ڤان دەڤەران.
رێڤەبەرێ گشتی یێ چاندنێ ل پارێزگەها دهۆکێ دیارکر ژی کو حکومەت بۆ پشتەڤانیکرنا جوتیاران دێ بەردەوام بیت و گوتژی، روژانە ل ڤان بنگەهان دێ تریێ جوتیاران ب بهایەکێ گۆنجای کو جوتیار ژی رازی بن، هێتە کرین، پاشان ب رێیا ترومبێلێن سارکەر دێ هێتە ڤەگوهاستن بو بازاڕێن کوردستانێ و عیراقێ ژی.
ل سنورێ پارێزگەها دهۆکێ نێزیکێ 120 جوتیار هەنە و پتری 60 جورێن تری بەرهەمدئینن، زورترین رێژا تری ل کوردستانێ دکەڤیتە پارێزگەها دهۆکێ.
ئەڤ سالە هەمبەر سالا بوری تری کێمترە، بەلێ بها باشترە، رێژەیەکا زور یا تریێ دهۆکێ دچیتە پارێزگەهێن عیراقێ و پارێزگەهێن دی یێن کوردستانێ.
دهۆک، نەوزاد هلۆری: