سەرۆكی ژووری بازرگانیی سلێمانی رای دەگەیەنێت، زیادكردنی باج و گومرگ، نرخی كاڵا و شمەك لە بازاڕەكاندا بەرز دەكاتەوە، ئەوەش بڕیارێكی عێراقە.
ئەمڕۆ یەكشەم 11ی كانوونی دووەم، نەوزاد غەفوور سەرۆكی ژووری بازرگانی و پیشەسازیی سلێمانی، لە كۆنگرەیەكی رۆژنامەوانیدا رای گەیاند، ئەو سیستمەی بۆ زیادكردنی باج و گومرگ دانراوە لە عێراق، دەروازەكانی هەرێمی كوردستانیش دەگرێتەوە.
ئاماژەی بەوە كرد، زیادكردنی باج و گومرگ دەبێتە بارگرانی بۆ بازرگانان، نرخی هاوردەكردنی كیلۆیەك جلوبەرگ لە دۆلار و نیوێكەوە بووەتە هەشت دۆلار، ئەمەش ناڕەزایەتیی بازرگانانی هەرێم و عێراقیشی لێ كەوتووەتەوە.
باسی لەوەش كرد، بۆ پاراستنی بەرهەمی ناوخۆ دەبێت رسوومات بەپێی پێویست بێت، بۆیە حكوومەتی عێراق دەبێت پێداچوونەوە بە باج و گومرگدا بكات.
زیاتر گوتی، كاریگەریی ئەم بڕیارە ئێستە دیار نییە، چونكە ئەو كاڵایانەی كە ئێستە هەن لە بازاڕەكاندا بە باج و گومرگی پێشووتر هاتوون، بەڵام لە دوای ئەم بڕیارە هەندێك لە كاڵا و شمەك نرخەكانیان لە بازاڕدا زۆر بەرز دەبێتەوە، هەروەها ئەو بەرهەمانەی لە ناوخۆ زیاترن پشتگیریی زیادكردنی باجیان دەكەین.