ئەمڕۆ دووشەم 19ـی كانوونی دووەم، بە بەشداریی زیاتر لە هەزار سەرۆك و سەركردە و بەرپرسی وڵاتان، 56ـەمین كۆڕبەندی ئابووریی جیهان لە داڤۆس بەڕێوە دەچێت و تا ڕۆژی هەینی 23ـی ئەم مانگە بەردەوام دەبێ، سەرۆكی حكوومەتیش چەندان چالاكیی لە كۆڕبەندەكە دەبێت.
مەسروور بارزانی سەرۆكی حكوومەتی هەرێمی كوردستان، بەشداریی كۆڕبەندەكە دەكات و ژمارەیەك كۆبوونەوە و دیداری گرنگی لەگەڵ سەرۆك، سەركردە و گەورە وەبەرهێنەری وڵاتان دەبێت.
د. محەمەد شوكری سەرۆكی دەستەی وەبەرهێنانی هەرێمی كوردستان رای گەیاند، ئەمساڵ شاندەكەی هەرێمی كوردستان بۆ داڤۆس26 جیاواز و فراوانترە، جگە لە مەسروور بارزانی سەرۆكی حكوومەتی هەرێمی كوردستان، 20 وەبەرهێنەری كەرتی تایبەت بەشداریی كۆبوونەوەكانی كۆڕبەندی ئابووریی جیهانی دەبن.
دەڵێت: ئەم هەنگاوەش لە چوارچێوەی ستراتیجیی سەرۆك وەزیراندایە كە لە هەر گەشت و دیدارێكی نێودەوڵەتیدا، شاندێكی بازرگانی و وەبەرهێنەران یاوەری بن بۆ بەهێزكردنی پێوەندییە ئابوورییەكانی كوردستان.
ئامادەبوونێكی بەرچاوی ئەمەریكا بە سەرۆكایەتیی دۆناڵد ترەمپ، گەورەترین شاندی ئەمەریكا كە پێكهاتوو لە وەزیرانی دەرەوە و خەزێنەی ئەمەریكا و وزە و بازرگانی بەشداریی دەكەن.
جگە لە بەشداریی سەركردەكانی G7 و سەرۆكی كۆمسیۆنی ئەوروپا ئورسولا ڤۆن دێر لاین، سەرۆكی ئۆكرانیا ڤۆلۆدیمێر زیلینسكی و نوێنەرانی ئابوورییە گەورە و تازە پێگەیشتووەكان.
لەناو ئەم دیمەنە نێودەوڵەتییەدا، بەشداریی هەرێمی كوردستان و دەوڵەتمەدار مەسروور بارزانی، بەهۆی ڕەهەندە سیاسی و ئابوورییەكانی، بایەخێكی تایبەتی پێ دەدرێت و بایەخی گەورەشی بۆ كوردستان هەیە.
بەشداران پێشنیار و چارەسەری خۆیان بۆ رووبەڕووبوونەوەی ئاڵنگارییە هەنووكەییەكان دەخەنەڕوو. ئەم جگە لەوەی لە پەراوێزی كۆڕبەندەكەدا، دەیان رێككەوتنی ئابووری و تەناهیی لە نێوان حكوومەت و كۆمپانیاكاندا واژوو دەكرێت.
تەوەرەكانی كۆڕبەندەكە
تەوەرەی یەكەمی كۆڕبەندەكە، وەڵامی پرسیاری "چۆن دەتوانین لە جیهانێكی پڕ لە كێبەركێدا بە هەرەوەزی كار بكەین؟" دەداتەوە. لە كاتێكدا زلهێزەكانی دنیا لە كێبەركێ و ململانێی توند و بەردەوامدان بۆ گۆڕانكاری لە سەنگی هێز و سەپاندنی هەژموونی خۆیان، كۆڕبەندەكە دەیەوێت ببێتە دەرچەیەك بۆ كاركردنی هەرەوەزی، كۆمپانیا، حكوومەت و كۆمەڵگەی مەدەنی بۆ دۆزینەوەی چارەسەر و هەنگاوی پێویست.
تەوەری دووەم، قسەكردن دەبێت لەبارەی "چۆن دەتوانین سەرچاوەی نوێی گەشەكردن بدۆزینەوە؟"، دۆزینەوەی رێگەچارە بۆ ئەم پرسە گرنگە بۆ كۆمپانیا و حكوومەتەكان و خەڵك بەگشتی، چونكە ئێستە بەهۆی سیاسەتی نادڵنیایی وڵاتان و شەڕ لە زۆر لە ناوچەكانی دنیادا، ئاڵوگۆڕی بازرگانی سەخت بووە. وڵاتان سیاسەتی ئابووری بۆ سەپاندنی سزا و وەك چەك بۆ رووبەڕووبوونەوەی نەیارەكانیان بەكار دەهێنن.
هەرچی تەوەری سێیەمیشە، تایبەتە بە هەڕەشەكانی تەكنەلۆجیا، بە دیاریكراویش زیرەكیی دەستكرد. لەم چوارچێوەیەدا سەرنج دەخرێتە سەر ئەوەی "چۆن بتوانرێت باشتر وەبەرهێنان لە مرۆڤەكاندا بكەین؟"، بۆ ئەوەی توانا و بەهرەی تاكەكان بەرەوپێشەوە بچێت و مەترسی لەدەستدانی كار و بێكاری كەم بكرێتەوە، چونكە بەگوێرەی ئامارەكانی كۆڕبەندەكە، لە پێنج ساڵی داهاتوودا، 22%ـی كارەكان لە دنیا گۆڕانكارییان بەسەردا دێت، ئەمەش زۆربەی بەهۆی بەكارهێنانی زیرەكی دەستكرد لەلایەن كۆمپانیا و حكوومەتەكان.
لە تەوەری چوارەمدا، كۆڕبەندەكە هەوڵ دەدات وەڵامی ئەم پرسیارە بداتەوە، كە "چۆن دەتوانین داهێنان بە قەبارەیەكی پێویست و بە بەرپرسیارانە بڵاو بكەینەوە؟"، خێرایی گەشەكردن و بەكارهێنانی زیرەكی دەستكرد، خەریكە دەبێتە مەترسی بۆ سەر ژیانی خەڵك و كۆمەڵگە و گۆڕانی ژینگە و سیاسەتی كاركردنی كۆمپانیا و پیشەسازییەكان. زۆربەی وڵاتانیش داوای سنوورداكردنی دەستڕاگەیشتنی زیرەكی دەستكرد بە زانیارییەكان، بەتایبەت زانیارییە كەسییەكان دەكەن.
پێنجەمین تەوەری كۆڕبەندی ئابووریی جیهان، گفتوگۆكردن دەبێت لەبارەی ئەوەی "چۆن دەتوانین لە چوارچێوەی سنوورەكانی سەلامەتیی زەویدا خۆشگوزەرانی بنیات بنێین؟". گۆڕانی كەشوهەوا كاریگەریی راستەوخۆی لەسەر ژێرخانی ئابووری، سیستمی خۆراك و ئیكۆسیستمی سروشتی دروست كردووە. ئەمەش وایكردووە پێویستی چارەسەری دۆستی ژینگەیی زیاتر بكات.