مەڵدیڤ چووە ناو ئەو وڵاتانەی تر كە پاسپۆرتی ئیسرائیلی قەدەغە كرد، پێشتر 12 وڵاتی تری وەك جەزائیر، بەنگلادیش، ئێران، عێراق، كوێت، لبنان، لیبیا، پاكستان، سعوودیە، سووریا و یەمەن چوونە ناو ئەم لیستەوە. زۆربەی ئەم قەدەغەكردنانە مێژووییەكی كۆنیان هەیە و دەگەڕێنەوە بۆ پێش ئاڵۆزییەكانی ئێستە.
گرنگی بڕیارەكەی مەڵدیڤ
ئەوەی بڕیارەكەی مەڵدیڤ جیادەكاتەوە، پشتبەستنی گەورەی وڵاتەكەیە بە كەرتی گەشتیاری، كە نزیكەی 21%ـی تێكڕای بەرهەمی ناوخۆیی (GDP) پێكدەهێنێت. پەرلەمانی وڵاتەكە بە كۆدەنگی ئەم بڕیارەی پەسەند كرد، وەك نیشاندانی هاوسۆزی بۆ گەلی فەڵەستین و سەركۆنەكردنی هێرشەكانی ئیسرائیل بۆ سەر غەززە. لە بەرانبەردا، ئیسرائیل هەموو تۆمەتەكانی پێوەست بە جینۆساید ڕەت دەكاتەوە.
ئەم هەنگاوەی مەڵدیڤ وەك یەكەم ناوچەی گەشتیاریی جیهانی بۆ قەدەغەكردنی پاسپۆرتی ئیسرائیلی، ئەو پرسیارە دەوروژێنێت كە ئایا وڵاتانی تری هاوشێوە هەمان ڕێچكە دەگرنە بەر؟.