باسم عەبادی وەزیری نەوتی عێراق بە عەلی زەیدی سەرۆك وەزیرانی راگەیاند، پڕۆژەی وەستاندنی سووتانی گازی سروشتیی عێراق لە 2029دا تەواو دەبێت، كەچی لە سەرەتای ئەمساڵ عێراق بە فەرمی رای گەیاند، پڕۆژەكە 2028 تەواو دەبێت، تا ئێستە هیچ بەرپرسێكی عێراق روونكردنەوەی لەسەر دواكەوتنی ئەو پڕۆژەیە نەداوە.
ئەمڕۆ چوارشەم 20ی ئایار،
عەلی زەیدی سەرۆك وەزیرانی عێراق لەگەڵ وەزیری نەوت و بەرپرسانی باڵای وەزارەتەكە كۆبووەوە. لە كۆبوونەوەكەدا باس لە چەند تەوەرێك كراوە، لەوانە زیادكردنی هەناردەی نەوت لە رێگەی دۆزینەوەی دەروازەی نوێی هەناردن، هەروەها باسی ئەو گازەیش كراوە كە لەگەڵ پرۆسەی بەرهەمێنانی نەوت دەردەچێت و ساڵانە بە بەهای 10 ملیار دۆلار بە فیڕۆ دەچێت.
لە راگەیەنراوێكی نووسینگەی زەیدیدا هاتووە، لە كۆبوونەوەكەدا باسی پڕۆژەكانی گاز كراوە لەگەڵ باسكردنی دیارترین ئاڵنگاری كە رووبەڕووی دەبێتەوە، لە راگەیەنراوێكی وەزارەتی نەوتیشدا هاتووە، عەبادی بۆ سەرۆك وەزیرانی عێراق باسی لەوە كردووە، وەزارەت بەردەوامە لەسەر پڕۆژەكان و لە كۆتایی 2029 پڕۆژەكە تەواو دەبێت، ئەوكات هیچ گازێكی عێراق ناسووتێ و بە فیڕۆ ناچێت.
وەك ساڵانی رابردوو لە
راپۆرتەكاندا باس كراوە، فەرامۆشكردنی گازی سروشتی لە عێراق لە بەرژەوەندیی ئێرانە، چونكە بۆ بەكارخستنی وێستگەكانی كارەبا، ئێران گازی سروشتی بە عێراق دەفرۆشێت.