ل سەر بنەمایێ ستراتیژییەتا سەرکەفتی یا کابینەیا نەهێ یا حکومەتا هەرێما کوردستانێ بۆ بهێزکرنا ژێرخان و ئابوورا وڵاتی، رێڤەبەرییا گشتی یا وەبەرهێنانێ ل پارێزگەها دهۆکێ ئامار و داتایێن شەش هەیڤێن بووری یێن پروژێن وەبەرهێنانێ ب رێیا وشە ئەشکەرا دكەت.
هەڤال ئاکرەیی، رێڤەبەرێ گشتیی یێ وەبەرهێنانێ ل پارێزگەها دهۆکێ بۆ وشە گوت، ب پشتەڤانیا کابینا نەهێ یا حکومەتا هەرێما کوردستانێ، چێکرنا پروژێن وەبەرهێنانێ ب رەنگەکێ بەرفرەهـ و بلەز د پێشڤەچونەکا باش دایە.
زێدەتر گوت، قەبارێ وەبەرهێنانێ د شەش هەیڤێن بووری یێن ئەڤ سالە دا گەهشتیە 62 ملیون و 792 هزار و 530 دولاران، ئەڤ یەک دەستکەفتەکێ گرنگە و نیشانە ل سەر بەردەوامبوونا باوەریێ ب بازاڕێ دەڤەرێ و ئاسانکاریێن بەردەوام یێن دامودەزگەهێن حکومەتێ و کابینا نەهێ.
ناڤبری دیارکر ژی کو ئەو مۆلەتێن د شەش هەیڤێن ئەڤ سالەدا هاتینە دان، پرانیا وان د کەرتیێن جودا جودا یێن گرنگ دا بوون وەکو کەرتێ بازرگانی، کەرتێ فێرکرنێ و کەرتێ گەشتیاریێ و گوتژی، وەبەرهێنەران پتر بەرێ خۆدایە چاندن و ئابووری و بازرگانی، چێکرنا یەکەیێن ئاکنجیبوونێ پاشڤەچویە و تنێ ئێک مولەت هەبویە، هەر ژ دەسپێکا کارپێکرنا یاسایا وەبەرهێنانێ ل هەرێما کوردستانێ هەتا نوکە، ژمارا گشتیی یا مۆلەتێن وەبەرهێنانێ ل پارێزگەها دهۆكێ هاتینە دان گەهشتیە 363 مۆلەتان. سەرمایێ گشتیی یێ ڤان پڕۆژان هەموان پێکڤە دگەهیتە شەش ملیار و 552 ملیون و 128 هزار دولاران، ئەڤە ئاماژەكا مەزن یا گەشەپێدانێ یە ل دەڤەرێ.
رێڤەبەرێ گشتیی یێ وەبەرهێنانێ ل پارێزگەها دهۆکێ دیارکر ژی کو ل سالا 2025ێ زورترین ژمارا مۆلەتان د دیرۆکا وەبەرهێنانا دهۆکێ دا هاتبوویە دان کو گەهشتبویە 45 مۆلەتان و گوتژی، ئەڤ سەرکەفتنە راستی و دروستی و جدیبوونا کارنامەیا کابینەیا نەهێ د سەقامگیری و راکێشانا سەرمایەداران دا نیشان ددەت، هەروەسا پلانا حکومەتێ بۆ گەشەپێدانا پارێزگەها دهۆکێ بۆ سالا 2026ێ ئەوە کو پێشکەفتنەکا هێشتا مەزنتر بهێتە تۆمارکرن، ب ئاوایەکێ کو ژمارا مۆلەتێن وەبەرهێنانێ یێن ئەڤ سالە زێدەتر بن ژ سالا بوری، نۆكە گەلەك پڕۆژە دقۆناغا بڕێڤەبرنا ب دەستڤەئینانا مۆلەتێ دا نە دا کو دەلیڤەیێن کاری پتر ل دەڤەرێ پەیداببن و ئابوورێ نیشتیمانی بەرەو قۆناغەکا گەشتر بڕوێت و دەلیڤێن کاری بۆ گەنج و خەلکێ دەڤەرێ بهێنە دابینکرن.
زورترین پروژێن پارێزگەها دهۆکێ دڤان سالان دا دوارێ چاندن و بازرگانی و پێشەسازی دا هاتینە چێکرن و هزاران دەلیڤێن کاری بۆ وەلاتییان هاتینە دابینکرن.