ئەمڕۆ چوارشەم نرخی نەوت لە بازاڕەكانی دنیا، جارێكی تر ڕووی لە دابەزین كردەوە و نزیك بووەوە لە نرخی بەر لە هەڵگیرسانی جەنگ لەلایەن ئەمەریكا و ئیسرائیل دژی ئێران، ئەمەیش بەهۆی دەركەوتنی ئاماژەی تێپەڕینی ژمارەیەكی زۆری كەشتی نەوتهەڵگر لە گەرووی هورمزەوە.
بەگوێرەی داتاكانی بازاڕی وزە، ئەمڕۆ چوارشەم خامی برنت 37 سەنت دابەزی و بەرمیلێكی بە 76 دۆلار و 71 سەنت فرۆشرا، هاوكات نەوتی خامی تێكساس 36 سەنت دابەزی و بەرمیلێكی گەیشتە 72 دۆلار و 85 سەنت. دوێنێ سێشەمیش نرخی هەردوو جۆرەكەی نەوتی خام دۆلارێك دابەزین و ئێستەیش نرخەكەی گەیشتووەتە نزمترین ئاست لە مانگی ئادار مارسەوە.
هۆی دابەزینی خێرا و بە پەلەی نرخی
نەوت، بەهۆی واژووكردنی یاداشتی لێكگەیشتن لە نێوان ئەمەریكا و ئێران و كردنەوەی گەرووی هورمز، هەروەها هەڵگرتنی گەمارۆی دەریایی و هەڵگرتنی سزاكانی سەر ئێران لە ماوەی 60 ڕۆژی داهاتوو دێت.
نۆمۆمیچی ئاكوتا پسپۆری بواری ئابووری لە كۆمپانیای میسۆبیشی یو ئێف جەی بۆ توێژینەوە و ڕاوێژ بەخشین گوتی، هێوربوونەوەی گرژییەكانی ئەمەریكا و ئێران و كرانەوەی گەرووی هورمز و جووڵەی كەشتییەكان، هۆی دابەزینی نرخی نەوتە، چاوەڕوانیش دەكرێت زیاتر نرخی نەوت داببەزێت و بگاتەوە بۆ ئاستی پێش دەستپێكردنی جەنگ.