پرسیارێكی زۆر سادەیە، ئەگەر پەكەكە بەڕاستی خەبات دەكات، بۆ ناچێت شەڕی رووبەڕوو لەگەڵ توركیا بكات و لەناو خاكی ئەو وڵاتە چالاكی پارتیزانی ئەنجام بدا و پارچەیەكی تری كوردستان ئازاد بكات؟، لەبری هەوڵی تێكدانی ئەزموونی هەرێمی كوردستان، پسپۆڕ و چاودێرانی سیاسی پێیان وایە كە پەكەكە هیچ چالاكییەكی لە خزمەتی كوردستان و دۆزی رەوای گەلی كورد نییە و نەكردووە و تەنیا كار بۆ نانەوەی ئاڵۆزی و ئاژاوە دروستكردن دەكات.
لەوبارەوە ئیدریس ئیسماعیل، ئەندامی خولی پێنجەمی پەرلەمانی كوردستان بە "وشە"ی گوت، گومانی تیادا نییە كە پەكەكە پارتی كرێكارانی كوردستان نیيە، بەڵكو پارتی كرێكارانی دوژمنانە، چونكە دەیەوێ كورد لە هەر شوێنێكی ئەم دنیایە ئەزموونێكی هەبێت، تێكی بدات و لەباری بەرێت، بۆیە چاوەڕوانی هیچ كارێكی باشی لێ ناكرێت، چونكە كار بۆ دۆزی رەوای گەلی كورد ناكا و ناتوانێت هیچ ناوچەیەكی كوردستان ئازاد بكات.
زیاتر گوتی، پەكەكە بەس ئەوە دەزانێت كە هەرێمی كوردستانی داگیر بكات و زیانی لێ بدات، چونكە نموونەی بەرخۆدان و تێكۆشانی كوردە لە هەموو دنیا و قەوارەیەكی سەربەخۆی و جوان و بەهێزە، بۆیە هیچ كات ئامادە نییە گورز لە دوژمن و ناحەزی كورد بوەشێنێت، چونكە كاری ئەو تەنیا زیانگەیاندن بە كورد و سوودبەخشینە بە دوژمنان و لە دژایەتیكردنی هەرێمی كوردستان و گەلی كورد بەردەوام دەبێت.
لای خۆیەوە هەورامان عەلی تۆفیق، پسپۆڕی بواری سیاسەت بە "وشە"ی راگەیاند، سیاسەت و خەباتی چەكداری و پارتیزانی لە پارچەكانی كوردستان و لایەنە سیاسییەكانی كوردستان جیاوازی هەیە، چۆن وڵاتانی داگیركەری كوردستان جیاوازیان هەیە و مامەڵە و كردار و سیاسەتیان وەك یەك نییە، ئاوهاش سیاسەت و بەرنامە و شێوازی بیركردنەوەی كوردیش بۆ دۆزی خۆی جیاواز.
روونی كردەوە، خەباتی چەكداری و شۆڕش و بەرخودانی باشووری كوردستان، هەمیشە لە چوارچێوە و پرەنسیپی شۆڕشگێڕی و سیاسەتی حەكیمانەدا بووە، زیاتر ئاراستەكان بۆ ژیان و گوزەران و دەستكەوتی نەتەوەیی بۆ هاونیشتمانی كورد بووە و بە پێی دۆخی سیاسی ناوچەكە و دنیا هەنگاوی ناوە و هیچ كات پێچەوانەی ئەو ئاراستەیە كاری نەكردووە، بۆیە دەبینین هەرێمی كوردستان وەك دەوڵەت مامەڵە دەكات، لەكاتێدا ئەو هەموو دژایەتییەی دەكرێت.
"هەر لەم روانگەیەوە دەبینین ئەم كێشە و گرفتانەی پەكەكە لەگەڵ هەرێم هی ئەمڕۆ نییە، بەڵكو لە ماوەی 30 ساڵی رابردوو درێژەی هەیە، تەنانەت گەیشتووەتە ئاستی رووبەڕووبوونەوە و ململانێی و تەبایی و ئاشتیش، ئەوەی لێرەدا گرنكە بگوترێت پێویستە ئەو لایەنە سیاسییە كوردییانەی پارچەكانی تری كوردستان ئەو تایبەتمەندییەی هەرێم لەبەرچاو بگرن و نەبنە هۆكاری شكاندنی سەروەریی هەرێم، چونكە دەبینین توركیا بە پاساوی پەكەكە چەند لەناو خاكی كوردستاندایە و بەردەوایش تۆپباران و هێرشی سەربازی هەیە، بەوهۆیەشەوە هەزاران گوند و شارۆكەی هەرێم لەسەر ماڵ و حاڵی خۆیان ئاوارە بوون و تەواوی ئەو چیا و كوێستان و باخ و رەزی خەڵك سووتێنران و ئێستە خەڵك تیایاندا ناژین و ئاوەدانی لەو ناوچانە نەماوە"، هەورامان عەلی تۆفیق، پسپۆڕی بواری سیاسەت وا دەڵێت.
دووپاتی كردەوە، ئێستە ئەوەی لە شنگال دەبینرێت هەمان سیاسەت و بەرنامەیە و ئەوەی تیایدا زەرەرمەندە خەڵك و دانیشتووانی ئەو سنوورەن، كە لە سەردەمی داعش ئاوارە بوون و ئێستەش دوای نەمانی داعش هێشتا ئاوارەن و هیچ لە گوزەران و ژیانیان نەگۆراوە، بۆیە گرنگە پێداچوونەوە بەو شێوە سیاسەتە بكرێت و ئەو تایبەتمەندییەی هەرێم لەبەرچاو بگرن و چیتر رێگە نەدەن دوژمنانی كورد كوردستان داگیر بكەن، دەكرێ لە سنووری وڵاتی خۆیان كار و چالاكی بكەن، ئەوانەش بە پێی سیاسەتی ئێستەی ناوچەكە و دنیا و بەدوای چارەسەرێكی ئاشتییانەدا بگەڕین و لە ریگەی لۆجیكەوە مامەڵە بكەن.
هەر لەمبارەوە سەرتیپ مەحموود، چاودێری سیاسی بە"وشە"ی گوت، ئەگەر پەكەكە نیازی پاكە و كار بۆ ئازادی كوردستان و گەلی كورد دەكات، با بڕوات هەر بۆ ئەزموونی خۆی و خۆشحاڵی هاووڵاتییانی كوردستان، چەند ناوچە و شار و گوندێك ئازاد بكا و لەوێ حكومڕانی بكات، بەڵام كە نایكات ئەمە پرسیار و تێبینی قووڵ لای گەلی كورد دروست دەكات.
ئاماژەی كرد، پێم وایە پەكەكە هێزێكی لەو ئاستەدا نییە كە بتوانێت حكومڕانی و بەڕێوەبردنێكی باش پێڕەو بكا و هاووڵاتییانی ئاسوودە بكات، چونكە نموونەی رۆژئاوامان لەبەردەمە و هەر رۆژەی خیانەت و ناپاكییەكیان لێ ئاشكرا دەبێت، لەوێش دزێوترین و ناشیرنترین ئەزموونیان هەیە و هاووڵاتییان بێزارن لە سیاسە تەكانیان.
"هاوكات هەر رۆژئاوا كە نموونەیەكی زیندووی دەسەڵاتی پەكەكەیە، دیكتاتۆرانە مامەڵە لەگەڵ هەموو لایەنەكانی تر دەكا و كەسی قبووڵ نییە و دیموكراسی بوونی نییە و ئەوەی كە هاوبیری خۆیان نەبێت، دەربەدەر و پاكتاوی دەكەن و دواجار بەس رێگە بە دەسەڵات و حوكمی خۆیان دەدەن"، سەرتیپ مەحموود چاودێری سیاسی وای گوت.
وشە/ ئاسان محەمەد