دوێنێ محەمەد حەسان نێردراوی تایبەتی ئەمینداری گشتیی نەتەوە یەكگرتووەكان لە عێراق راپۆرتێكی سەبارت بە دۆخی عێراق لەبەردەم ئەنجوومەنی ئاسایش خستە روو، ئەو بە گشتی باسی دۆخی عێراق و رۆڵ و هەڵوێستەكانی لە ناوچەكە كرد، دیپلۆماتكارێكی پێشوو پێی وایە ئەو لە قسەكانی تەنیا باسی لایەنە ئەرێنییەكانی كرد و رێخۆشیی بۆ كۆتاهاتنی كاری نێردەی نەتەوە یەكگرتووەكان لە عێراق لە كۆتایی ئەمساڵ كرد.
د. غازی فەیسەڵ سەرۆكی ناوەندیی عێراق بۆ توێژینەوە و دیپلۆماتكاری پێشوو دەڵێت، حەسان لە راپۆرتەكەی لە ئەنجوومەنی ئاسایش تەنیا تیشكی خستە سەر لایەنە ئەرێنییەكان و پێ دەچێت ئەو رێخۆشیی بۆ كۆتاهاتنی ئەركی یۆنامی لە عێراق لە كۆتایی 2025 دەكات، لەگەڵ هێشتنەوەی پێوەندییەكی باش لە نێوان نێردەی نەتەوە یەكگرتووەكان و دەسەڵاتدارانی عێراق لەبارەی بەردەوامبوون لە پاڵپشتیكردنی هەوڵەكانی حكوومەتی عێراق و رێكخراوەكانی كۆمەڵە مەدەنی لە چوارچێوەی مسۆگەریی مافی مرۆڤ و دیموكراسیەت و مافی پێكهاتەكان و پەرەپێدانی بەردەوام، جیا لە پاڵپشتیكردنی هەوڵەكانی حكوومەت لە رووبەڕووبوونەوەی پرسەكانی بەبیابانبوون و وشكەساڵی و پیسبوونی ژینگە، كە نەتەوە یەكگرتووەكان گرنگی زۆریان لە عێراق و رۆژهەڵاتی ناوەڕاست پێ دەدات.
زیاتر گوتی، ئەوە لەوكاتەی راپۆرتەكانی پلاسخارت، سەرۆكی پێشووی یۆنامی، دیدێكی رەخنەگرانەی لەبارەی پشێوی و چەكی بەرەڵا و نەبوونی ئاسایش و سەقامگیریی لە عێراق تیادا بوو، راپۆرتەكەی پێش ئەویش لە لایەن گوبیچ رەخنەی ئاشكرای لە هەڵبژاردنی 2018 گرت، بەتایبەتی پێوەست بە پێشێلكاریی مافی مرۆڤ و ناچاركردنی ئاوارەكان لە رێگەی گوشار و ترس و بڕینی مادە خۆراكییەكان و دەرمان لەسەریان بۆ بەشداریكردن لە دەنگدان.
فەیسەڵ دووپاتی كردەوە، قسەكانی حەسان پێچەوانەی ئەوانەی پێشخۆی هێواش و لەسەرخۆ بوو و تیشكی خستە سەر لایەنە ئەرێنییەكانی دۆخی ئێستەی عێراق، وای پێشان دا كە دۆخی ئەمڕۆی عێراق سەقامگیر و ئارامە و هەوڵەكانی پەرەپێدان بەردەوامە و ئەوەی تا ئێستە بەدەست هاتووە رێگەی راستە بەرەو بنیاتنانی دەوڵەتێكی دیموكراسی لە عێراق.
ئەو دیپلۆماتكارە پێشووە دەڵێت، حەسان باسی گرنگیی هاوبەشیی نێوان بەغدا و هەولێری كرد بێ ئەوەی كێشەی مووچەی فەرمانبەرانی هەرێم بخاتە روو، جیا لە باسنەكردنی بابەتی دەركردنی یاسای نەوت و غاز و جێبەجێكردنی مادەی 140ی دەستوور لەبارەی كەركووك و ناوچە جێی ناكۆكەكان، لەوكاتەی پێویستە باسی ئەو رێككەوتنانەی نێوان بەغدا و هەولێر سەبارەت بە وەبەرهێنانی لە بواری نەوت و غاز بكرێت، كە بووە بنەمایەك بۆ دەركردنی یاسای نەوت و غاز، بەڵام هیچ رێككەوتنێك لەبارەی رێوشوێنەكانی چارەسەركردنی كێشەكە نەكرا.
فەیسەڵ ئاماژەی كرد، رێككەوتن لە نێوان هەولێر و بەغدا بۆ چارەسەركردنی دۆخی شنگال كرا، بۆ ئاساییكردنەوەی ژیان و گەڕانەوەی ئاوارەكان، بەڵام هیچ چوونەپێشێك لە جێبەجێكردنی رێككەوتنەكە نەبوو و بابەتەكە تا ئەمڕۆ بە هەڵپەسێردراوی مایەوە، بۆیە چەندان دۆسیەی هەڵپەسێردراو هەن و پێم وایە دۆسەی ناكۆكییەكانی بەغدا و هەولێر یەكێكە لە دۆسیە هەستیارەكان.
دوێنێ محەمەد حەسان نوێنەری تایبەتیی ئەمینداری گشتیی نەتەوە یەكگرتووەكان لە عێراق راپۆرتێكی لەبارەی دۆخی عێراق لەبەردەم ئەنجوومەنی ئاسایش خستە روو، ئەو باسی لە چارەنووسی نێردەی نەتەوە یەكگرتووەكان لە عێراق و دۆخی ناوخۆ و هەڵوێستەكانی عێراقی كرد، باسی پێوەندییەكانی هەرێمی كوردستان و عێراق و دۆخی ئێزدییەكانیشی كرد.
لەبارەی پرسە ناوخۆییەكانی عێراق، حەسان پێوەندییەكانی عێراق و هەرێمی كوردستانی بە هاوبەشی وەسف كرد و گوتی، پێویستە هاوبەشی و لێكتێگەیشتنی زیاتر لە نێوانیان هەبێت، دەبێت كێشەكانی نێوان هەولێر و بەغدا بە گوێرەی دەستوور چارە بكرێن، پێوەندیی بەغدا و هەولێر هاوبەشییەكە پێویستیی بە گفتوگۆی بەردەوام و پێكەوەكاركردن هەیە، هیوای خواست بەمزووانە حكوومەتی هەرێمی كوردستان بێتە پێكهاتن.
لەبارەی دۆسیەی ئێزدییەكان ئاماژەی كرد، تا ئێستە 100 هەزار ئێزدی بەهۆی ئاسایینەبوونەوەی دۆخی ناوچەكانیان نەیانتوانیوە بگەڕێنەوە سەر ماڵوحاڵی خۆیان و لە كەمپەكان ماون، ئەوان زۆر زیانیان بەر كەوتووە بە شێوەیەك ناتوانم پێناسەی بكەم، داوا لە عێراق و هەموو وڵاتانی دراوسێ دەكەم، كە هەموو رێككارەكان بگەرنەبەر بۆ ئەوەی ئێزدییەكان بپارێزرێن و بە سەربەرزی و كەرامەتەوە بگەڕێنەوە بۆ سەر ماڵوحاڵی خۆیان.
لەبارەی كۆتاهاتنی ئەركی یۆنامی لە عێراق گوتی، نووسینگەكانی نێردەی نەتەوە یەكگرتووەكان لە عێراق لە مووسڵ و كەركووك داخراون، وەك سەرەتایەك بۆ كۆتاهاتنی تەواوەتیی ئەركی یۆنامی لە عێراق لە ماوەی شەش مانگی داهاتوو، دووپاتی كردەوە كە رێكخراوەكە تا دوای كۆتاهاتنی ئەركەكانیشی لە عێراق لە پاڵپشتیكردنی عێراق بەردەوام دەبێت.