بەغدا لە دەستی دەستیكردن بە هەرێمی كوردستان بەردەوامە، دوای دوو مانگ لە نەناردنی مووچە و رێككەوتنی ساڵی رابردوو بۆ ناردنی مووچەی فەرمانبەران لەكاتی خۆیدا، كەچی لە ئازاردانی خەڵكی كوردستان بەردەوامە، لەكاتێكدا حكوومەتی هەرێمی كوردستان هەموو بیانووەكانی بەغدای بڕیوە و بۆ چارەسەركردنی كێشەكان بە ئەركی سەر شانی خۆی هەستاوە، شارەزا و سیاسەتوانان دەڵێن، بەغدا هەر بەو جۆرە مامەڵە دەكات و شتێك ناكات لە بەرژەوەندیی كورد بێت.
رەسووڵ رەئووف ئەندامی مەكتەبی سیاسیی پارتی سۆسیال دیموكراتی كوردستان بە "وشە"ی گوت، ئەو سیاسەتەی دەسەڵاتدارانی عێراق پێڕەوی دەكەن، زۆر جیاوازە لەگەڵ ئەو درووشمەی كە حكوومەتی عێراق باسی دەكات، بەرانبەر ئەو دەنگانەی دەیانگوت ئەگەر مووچە لەسەر بەغدا بێت دۆخەكە باشتر دەبێت و بەغدا مووچە و بودجە و شایستە داراییەكانی هەرێم رەوانە دەكات، دەركەوت بەو جۆرە نەبوو، هەرێم نیگەرانە لەو دۆخەی ئێستە كە بەغدا مامەڵەی خراپ دەكا و دەستی دەستی دەكات و دەبێت شاند لە دوای شاند بچێت، بۆیە پێمان وایە ئەوەی بەغدا دەیكات پێڕەوكردنی سیاسەتێكی خراپە بەرانبەر بە هەرێم.
روونی كردەوە، بەغدا دەیگوت وەرن رێككەوتن بكەین و بودجە دەنێرین، خێرە دوای دوو ساڵ، لەگەڵ ئەوەشدا دوای دوو مانگ لە نەدانی مووچە، بەغدا ئەوەی نەكردووە، هەموو هەوڵی بەغدا ئەوەیە قەوارەی هەرێم لاواز بكات، بەغدا بێ بەڵێنە و ناتوانێ ئەوە بكات كە دەیڵێت و لەسەری رێك دەكەوێت، چونكە لە عێراق پشێوی سیاسی هەیە و حكوومەت ناتوانێت ئەوە بكات كە دەیڵێت، بەڵكو رێگری هەیە، ناتوانێت لەسەر سیستمێكی سیاسی رێكخراو بێت، حكوومەتی دەڵێت ئێمە پابەندین و چەندان گفتوگۆ و ریككەوتن كراوە، لەوەش گرنگتر یاسای بودجە هەیە، بەڵام بەغدا پابەند نابێت.
لای خۆیەوە د. عومەر ئەحمەد مامۆستای زانكۆ بە "وشە"ی راگەیاند، لای هەمووان ئاشكرایە پێش ئەوەی حكوومەتی عێراق پێكبهێنرێت، رێككەوتن لە نێوان هەردوو حكوومەت كراوە و ئەوەی لە گفتوگۆكان باس كرا بەغدا مووچەی فەرمانبەرانی هەرێم و پابەندی خۆی بۆ هەرێم جێبەجێ دەكات بەپێی رێككەوتن، بەڵام لەگەڵ دەستبەكاربوونی حكوومەتی عێراق شتەكان پێچەوانە بوونەوە و بەغدا ئەوەی نەكرد كە كاتی خۆی بۆ پێكهێنانی حكوومەت رێككەوتنی لەسەر كرابوو، ماوەی زیاتر لە دوو ساڵە مووچەی هەرێمی كوردستان رادەگرێت و لەكاتی خۆی ناینێرێت.
ئەو باسی لەوەش كرد، ئەوەی هەیە دەستێكە بەرانبەر هەرێمی كوردستان و كارەكان بە سیاسی كراون بۆ سزادانی خەڵكی كوردستان و ئازاردانیان، كەسانێك لەپشت ئەو كارەن كە هیچكات بەرژەوەندیی كوردستانیان ناوێت و بەرژەوەندییان لەوەیە كە دۆخی هەرێم شێواو بێت و دژی هەرێم بن، بۆ ئەوەش پەنا بۆ بڕین و نەدانی مووچە فەرمانبەرانی هەرێم دەبەن، بەغدا سیاسەتی چەوت بەرانبەر بە هەرێم بەكار دێنێت، ئەمە راستییە و بەغدا بەو كارانە دژایەتیی هەرێم دەكات، لەكاتێكدا حكوومەتی هەرێم بە روونی دەڵێت، ئێمە پابەندین و ئەركی خۆمان جێبەجێ كردووە و نەرمیمان نواندووە و ئامادەی چارەسەرین، بەڵام بەغدا ئەوە نازانێت و دەیەوێ قسە قسەی خۆی بێت.
هەر لەوبارەوە سەرباز خۆشناو چاودێری سیاسی بە "وشە"ی گوت، دژایەتیكردنی هەرێمی كوردستان ناڕەوایە، چونكە لەسەر حیسابی خەڵكی كوردستانە، بەغدا هەرگیز نابێتە حكوومەتی هەرێم، دەسەڵاتدارانی بەغدا چەندان ساڵە گرفت بۆ هەرێمی كوردستان دروست دەكەن، ئەمە دۆخێكی قورسە بۆ هەرێمی كوردستان، دەبێت چاومان لە دەستی بەغدا بێت، ئێمە خاوەنی خۆمانبین لە هەموو كەس و وڵاتێك باشترە، رۆژانە دەبینین چۆن سەركردە و ئەوانەی دەسەڵاتیان هەیە دژی هەرێم قسە دەكەن.
وشە/ هۆشیار عەلی