مەسروور بارزانی سەرۆكی حكوومەتی هەرێمی كوردستان توانی لە ماوەی كابینەی نودا جوانترین مۆدێلی فەرمانڕەوایەتی و بەكارهێنانی دەسەڵات بۆ خزمەتگەیاندن بە خەڵك و دابینكردنی ژیان پێشان بدات، ژینگەیەكی ئارام برەخسێنێت و كار بۆ دروستكردنی ئابووری و پێگەیەكی بەهێز بۆ هەرێمی كوردستان بكات، نووسەرێكی عێراقی پێی وایە مەسروور بارزانی پێناسەیەكی تری بۆ سیاسەت نووسیەوە، نەك تەنیا بەیاننامە و كۆنگرە، بەڵكو پڕۆژەی بەرجەستەكراو، كە ماڵی خەڵك رووناك دەكاتەوە و تێنوێتیی ئەوان دەشكێنێت و باخەكانیان سەوز دەكات.
د. یاس خزەیر بەیاتی نووسەر كەسایەتیی ئەكادیمی كە لە ئیمارات دادەنیشێت، لە وتارێكی بە ناوی "وانەكانی كاك مەسروور"، دەڵێت، لە ساتێكی پڕ لە تەنگژە و پاساوی سیاسی و بێتوانایی ئیدارەدان، لەوكاتەی تا ئێستەش دەوڵەتی فیدراڵی خەریكی خولیا كۆنەكەیەتی بە دروستكردن و هێنانەوەی پاساو و بەهانە و بڕینی قووتی خەڵك، مەسروور بارزانی سەرۆك وەزیرانی هەرێمی كوردستان هات و پێناسەیەكی تری بۆ سیاسەت نووسیەوە، نەك تەنیا بەیاننامە و كۆنگرە، بەڵكو پڕۆژەی بەرجەستەكراو و زیندوو لە ناو ژیانی خەڵك، ماڵیان رووناك دەكاتەوە و تێنوێتییان دەشكێنێت و باخچەكانیان سەوز دەكات.
یەكەم پڕۆژە كە خەڵكی باسی دەكەن، درووشمێكی هەڵبژاردن و بەیاننامەیەكی داڕشتن نییە، بەڵكو رووناكییەكە لە تۆڕەكانی كارەباوە "پڕۆژەی رووناكی"، كە كارەبای 24 سەعاتی بێ پچڕان دابین دەكات، لە وڵاتێك ئاڵوودەی تاریكی بووە و ئەوەش وەك موعجیزە دەركەوت، ئەمڕۆ هاووڵاتیی كورد هەست بە شانازی دەكات، بەوەی چۆن ئەوەی دوو دەیە ساڵە دەوڵەتێكی نەوتی نەیتوانیوە بیكات، سەرۆكی هەرێمی كوردستان توانی دەستەبەری بكات؟، ئەو پڕۆژەكەی كردە وانەیەك لە بەرپرسیارەتی.
بەیاتی روونی كردەوە، هەرچی ئاوە، كە لە شارەكانی عێراق بووەتە خۆشگوزەرانییەكی دەگمەن، لە كوردستان بووە بە مافێكی بەردەوام، ئەوەش لە رێگەی پڕۆژەیەكی ستراتیجی، ئاوی زێی گەورە 24 سەعات و بۆ ماوەی 50 ساڵ بۆ ماڵی هاووڵاتییان دەگوازێتەوە، بەوەش لاپەڕەی چاوەروانی و تانكەری هەڵدایەوە، لەو كاتەی لە شوێنەكانی تر تا ئێستە وەزارەتەكان كۆنگرە لەبارەی ئاسایشی ئاو دەبەستن، وەك ئەوەی وەرزەكانی رۆمانێكی خەیاڵی بنووسن كە كەس باوەڕی پێ ناكات.
دوای ئەوە پڕۆژەی پشتێنەی سەوزایی دەوروبەری هەولێر دێت، لە رێگەی چاندنی هەزاران دار بۆ رووبەڕووبوونەوەی خۆڵبارین و پاككردنەوەی هەوا و گەڕاندنەوەی هەناسەیەك بۆ شارەكە، ئەوەش نەك لە چوارچێوەی هەڵمەتێكی دارچاندنی وەرزی، بەڵكو لە چوارچێوەی دیدێك بۆ شارێك كە رووبەڕووی بەبیابانبوون دەبێتەوە و پێوەندییەكانی بە سروشت دروست دەكاتەوە، لە كاتێكدا عێراق لە ناو خۆڵدا دەخنكێت و هەوا بووەتە كاڵایەكی دەگمەن.
بەو پێیەی ئاوەدانی رووێكی تری ژیانە، چەندان پڕۆژەی گەورە لە هەرێم دەستیان پێ كرا، بۆ رێكخستنی شارەكان لە رێگەی پرد و تونێل و پاركەكانەوە، كردنیان بە شاری هاوچەرخ بە متمانەوە بەرانبەر بە پایەتەختەكانی دنیا بوەستنەوە، ئەوەی جێی تێبینییە هەموو ئەوانە روو دەدەن و ساڵانێكە هەرێم لە پشكەكەی بە بودجەی عێراق بێبەش كراوە، مووچەی فەرمانبەرانی بڕدراوە وەك هەوڵێك بۆ خنكاندنی، كەچی ئەنجامەكان پێچەوانە بوون و ئەوان خۆیان خنكاند، خزمەتگوزارییەكانیان لە پاشی دا و دامەزراوەكانی دەوڵەت وەك كەلاوەی لێ هات، لێرەش چەندان پڕۆژەی وەك پارك دەكرێتەوە، كە ژیان دەبەخشنە ماڵ و شەقامەكان، لەوێ شەوەكانیان بە شەوقی مۆم رووناك دەكەنەوە، لێرەش تاكی كورد ماڵەكەی بە گڵۆپی كاركردنێكی زۆر رووناك دەكاتەوە، وەك ئەوەی وانەیەك لە رووناكی لەسەر دیواری تاریكی بنووسێتەوە.
مەسروور بارزانی بە بەدواداچوونی رۆژانەی بۆ ئەو پڕۆژانە، وانەیەكی پڕمانای لە سەركردایەتی پێشكەش كرد، بەوەی سیاسەت تەنیا بەیاننامەی سەروەری و درووشمی ئازادیخوازانە نییە، بەڵكو كار و كردەوەی بەرجەستەكراوە كە لە ژیانی خەڵك رەنگ بداتەوە، بۆیە ئەگەر ئێستە هاووڵاتیی عێراقی لە پارێزگاكانی تر شەوانە بە دەنگی موەلیدەی گەڕەكەكان بخەون، هاووڵاتیی كورد لە سایەی هەبوونی كارەبا و ئاو و هەوایەكی پاك دەخەوی و رۆژ دەكاتەوە.
ئەو نووسەرە دووپاتی كردەوە، ئەوەیە سیاسەتی گۆڕینی گوتار بۆ راستی و درووشم بۆ خزمەتگوزاری، سیاسەتێك بە گڵۆپی شەقامەكان و پاركی شارەكان پێوانە دەكرێت، نەك بە ژمارەی كۆنگرە و درووشمەكان، ئەوەش بەسە بۆ ئەوەی هاووڵاتیی ئێرە هەست بەوە بكات كە ئەو خاوەن شتێكە لە وڵاتە گەورەكە نییە، مەبەستی عێراقە، ئەویش ژیان بە سەربەرزییە لە وڵاتێك كە لە دنیا دەچێت.
نووسەر ئاماژە دەكات، من كە رۆڵەی بەغدام، قەدەر وای خواست كە لە هەولێر بژیم، لێرە كە بەهای مرۆڤ و ئاسایشم بینی، مێژوو و لەیەكترخۆشبوون و ئارامی، كە دوای ماوەیەكی زۆر لە غەریبی یادەوەریی كۆمەڵایەتیم بیر هاتەوە، سەرەڕای ئەوەی مافی مانەوەی درێژخایەنم لە وڵاتێكی گەشەسەندوو هەیە، كە هەموو مرۆڤێك خەونی پێوە دەبینێت، بۆیە ناچار نیم دووڕوویی بكەم، هەوڵیش بۆ دەستكەوت نادەم، داوای خانوو و باخ و نەوت و پێگە ناكەم، ئەوە راستیەكەیە، ئەگەرچی هەندێكم لەوانەی شۆڤینییەت چاوی كوێر كردوون شەرمەزار كردووە، بەڵام سوپاس كاك مەسروور، تۆ سیاسەتت كردە رووناكی لە ماڵەكان و ئاو لە بۆرییەكان و سەوزایی لە باخچەكان، "سوپاس كاك مەسروور".