لەوكاتەی بڕیارە تا كۆتایی ئەم مانگە تەواوی هێزەكانی ئەمەریكا و هاوپەیمانان لە عێراق پاشەكشە بكەن، راپۆرتەكان وریایی لەو بۆشاییە تەناهییە دەدەن لە دوای كشانەوەكە دروست دەبێت و لە لایەن رێكخراوە تیرۆریستییەكان یان میلیشیاكان هەوڵی پڕكردنەوەی دەدرێت، ماڵپەڕێكی ئەمەریكی دۆخەكە وەك بێدەنگی بەر لە رەشەبا وەسف دەكات.
تۆڕی
"فۆربس"ی ئەمەریكی لە راپۆرتێكی وریایی لە دووبارەبوونەوەی هەمان سیناریۆی 2011 دەدات، ئەوكاتەی بێ ئامادەكاری سوپای ئەمەریكا لە عێراق كشایەوە و ئاڵۆزیی تەناهی سەری هەڵدا، راپۆرتەكە لە چەند شرۆڤەكارێكی سیاسی لە پەیمانگەی واشنتن و هیتری گواستەوە، بەوەی ئیدارەی ئەمەریكا درك بەوە دەكات كشانەوەی تەواوەتی لە عێراق، ئەو وڵاتە دەخاتە دەست ئێران و سامان و داهاتەكەی بۆ بنیاتنانەوەی ئابووری و توانا سەربازییەكانی خۆی بەكاردێنێت.
راپۆرتەكە ئاماژە بۆ ئەوەش دەكات كە كشانەوەی هێزەكانی ئەمەریكا بۆ هەرێمی كوردستان لە دوای بەڵێندانی ژمارەیەك سیاسەتوانی عێراقی بۆ واشنتن هات بە تێپەڕنەكردنی یاسای حەشدی شەعبی، كە ئەمەریكا بە ئامرازێكی دەزانێت بۆ بەهێزكردنی دەسترۆیشتوویی ئێران لە عێراق، هەندێك حزبی شیعەش ئەو كشانەوە بە سەركەوتنێكی ماناكی دادەنێن دەتوانن وەك 2011، لە بانگەشەی هەڵبژاردن سوودی لێ وەربگرن.
راپۆرتەكە وریایی لەوە دا كە لە سایەی بوونی گرووپی توندڕۆ لە سووریا رەنگە سوود لە هەر بۆشاییەكی تەناهی ببینن بۆ دروستكردنی هەڕەشە لەسەر دۆخی عێراق، دۆخی ئێستە زۆر لەوەی پێش 14 ساڵ مەترسیدارترە، هەروەها باسی ئەوەی كرد كە ئەو هێزە سەربازییانەی روویان لە هەرێمی كوردستان كردووە، دەستیان بە دامەزراندنی بنكەی نوێی ئاسمانی لەوێ كردووە، ئەوەش مانای نیازی مانەوەیە بۆ ماوەیەكی دوورودرێژ و ئەگەری بەكارهێنانی ئەو بنكانە بۆ كردنەئامانجی بارگەكانی حەشدی شەعبی و میلیشیاكان ئەگەر شەڕ لە نێوان ئیسرائیل و ئێران رووبدات.
لە كۆتایی راپۆرتەكە ئاماژە دەكات كە ئەو رەشەبایەی ئەگەری هەڵكردنی لە دوای كشانەوەی هێزەكانی ئەمەریكا لە عێراق هەیە تەنیا بوونی مەترسیی دەرەكی لە لایەن گرووپە توندڕۆكانی سووریا نییە، بەڵكو جموجۆڵی میلیشیا چەكدارەكانی ناوخۆی عێراقیشە، كە ئەوەش دەرگە بە رووی قۆناغێكی نوێی پشێوی لە عێراق دەكاتەوە.
لای خۆیەوە ماڵپەڕی "geopolitical monitor"، ئاماژە بۆ كشانەوەی سوپای ئەمەریكا لە عێراق دەكات و پێی وایە هەنگاوەكە بە رووكەش وەك كشانەوە دەردەكەوێت، لە راستیدا خۆرێكخستنەوەیەكی تەكتیكییە بە مەبەستی بەهێزكردنی دەسەڵات و هەژموونی ئەمەریكا لە ناوچەكە، لەگەڵ كەمكردنەوەی مەترسییە تەناهی و سیاسییەكان بۆ سەر هێز و بەرژەوەندییەكانی.
بەپێی راپۆرتێكی ماڵپەڕەكە، پێدەچێت واشنتن بەر لەو هەنگاوە حیساباتی خۆی كردووە، لەپێشەوەیان مانەوەی بۆ چاودێریكردنی سووریا و ئێران، ئەوەش لە چوارچێوەی رێوشوێنێكی ئاڵۆزی جیۆسیاسی، كاتێك واشنتن هەوڵی دروستكردنی هاوسەنگی لە نێوان پاراستنی بەرژەوەندییە ستراتیجییەكانی لە رۆژهەڵاتی ناوەڕاست و خۆلادان لە پەرەسەنەدنی سەربازی و ئاڵۆزییە سیاسییەكان دەدات.
زیاتر هاتووە، ئەمەریكا بەو هەنگاوە دەیەوێ چەند ئامانجێكی ستراتیجی بپێكێت، یەكەمیان پاراستنی هێزەكانی لە هێرشی میلیشیاكانی ئێران بۆ سەر هەردوو بنكەی عەین ئەسەد لە رۆژئاوای عێراق و ڤیكتۆریا لە بەغدا بە مووشەك و درۆن، بۆیە بە بردنی هێزەكانی بۆ هەولێر ئەو مەترسییانە كەم دەكاتەوە، كە بەهۆی هەڵوێستی حكوومەتی هەرێمی كوردستانەوە ژینگەیەكی زۆر ئارامترە.
دووەم ئامانج بێبەشكردنی ئێرانە لە بانگەشەی سەركەوتن، كاتێك بەهۆی هێرشی سەر بنكە سەربازییەكانی ئەمەریكا لە عێراق باسی موقاوەمەكردنی ئەمەریكا دەكات، بۆیە بە كشانەوەی هێزەكانی لەو ناوچانە ئەمەریكا ئەو گوتارەی ئێران بەتاڵ دەكاتەوە، لەگەڵ پارێزگاریكردن لە توانا سەربازییەكانی لە شوێنێكی ئارامتر.
جیا لەوانەی باس كران، ئەو هەنگاوەی ئەمەریكا گوشارەكانی سەر حكوومەتی عێراق كەمتر دەكاتەوە بە كۆتاهێنان بە بوونی لە عێراق، بەوەش سەركەوتنێكی شێوەیی بە حكوومەتی عێراق دەبەخشێت بەوەی كشاوەتەوە، كەچی هێزەكانی لە هەرێم، كە هاوپەیمانی واشنتنە، بێ هیچ توڕەییەكی بەغدا لەوێوە دەتوانن چاودێریی عێراق و سووریا و ئێران بكەن، لەگەڵ پارێزگاریكردن لە توانای پێشكەوتووی هەواڵگری و لۆجیستی.