ڕاپۆرتێكی ڕۆژنامەوانیی بەریتانی پرسیار لەسەر توانای عێراق دەورووژێنێت بۆ بەردەوامبوون لە خۆبەدوورگرتن لە ڕووبەڕووبوونەوەیەكی ئەگەریی نێوان ئیسرائیل و ئێران، هەروەها باس لەوە دەكات كە حكوومەتی بەغدا چ سیاسەتێك پێڕەو دەكات لەژێر پێوەندییە ئاڵۆزەكەیدا لەگەڵ هێزەكانی چوارچێوەی هاوئاهەنگ بۆ ئەوەی دوور بێت لەم ململانێیە.
ماڵپەڕی "ئەمواج"ی بەریتانی لە ڕاپۆرتێكدا نووسیویەتی، عێراق "لەسەر پەتێكی تەنك لەنێوان دوو هێزی ڕكابەردا دەڕوات"، كە ئەوانیش تاران و واشنتنن.
ڕاپۆرتەكە پێی وایە كە پێكدادانە نوێیەكەی نێوان ئێران و ئیسرائیل ئێستا گەیشتووەتە قۆناغی "ئارامییەكی تەمومژاوی" كە لە هەمان كاتدا ئەگەری هەڵگیرسانەوەی هەیە، لە كاتێكدا عێراق هەوڵ دەدات خۆی لە تێوەگلانی ڕاستەوخۆ بەدوور بگرێت.
" بێدەنگی"ی سوودانی
بەپێی ڕاپۆرتەكە، ئەو " بێلایەنییەی" محەمەد شیاع سوودانی، سەرۆك وەزیرانی عێراق، دەری بڕیوە، سەرەڕای ناڕەزایەتیی هەندێك لە سەركردەكانی چوارچێوەی هاوئاهەنگی، نیگەرانیی سەرەكیی لەسەر هەڵوێستی فەرمیی عێراق دروست كردووە. هێشتا ڕوون نییە كە دەسەڵاتدارانی عێراق چۆن هەڵسوكەوت دەكەن ئەگەر ڕابكێشرێنە ناو ململانێیەكی داهاتووی نێوان ئێران، ئیسرائیل و ئەمەریكاوە.
ڕاپۆرتەكە بەدووری نازانێت كە سوودانی لەژێر فشاری بەردەوامی تێكەڵاوی هەرێمی و نێودەوڵەتیدا، بۆ پاراستنی ڕێڕەوێكی ناوەندیی سەربەخۆ ڕووبەڕووی سەختی ببێتەوە.
هاوپەیمانییەكی "ناسك"
ڕاپۆرتەكە لە زاری بەرپرسێكی باڵای نێو نووسینگەی سوودانییەوە، كە ناوی نەهێنراوە، دەڵێت، هەڵوێستی عێراق لەنێوان تاران و واشنتن وەك ڕۆیشتنە لەسەر پەتێكی تەنك لەنێوان دوو هێزی ڕكابەردا، لە كاتێكدا فشارە دەرەكییەكان زیاد دەكەن. ئەو بەرپرسە هاوپەیمانییەكانی ئێستای چوارچێوەی هاوئاهەنگی بە "ناسك" وەسف دەكات لەژێر ئەو دابەشبوونانەی كە لە سیستەمی حوكمڕانیدا هەن.
هەمان سەرچاوە دووپاتی كردووەتەوە، هەوڵە دیپلۆماسییەكانی سوودانی بۆ خۆپاراستن لەم دۆخە ئاڵۆزەی ناوچەكە، دەبێت وەك مانۆڕێكی كاتی سەیر بكرێت، نەك بژاردەیەكی ستراتیجی، ئەمەش بەهۆی دابەشبوونە قووڵەكانی ناو چوارچێوەی هاوئاهەنگییەوە.
ئێران هێشتا یاریزانێكی سەرەكییە
ڕاپۆرتەكە ئاماژە بەوە دەكات كە هەرچەندە پێگەی هەرێمیی ئێران گورزی بەركەوتووە، بەڵام هێشتا وەك یاریزانێكی باڵادەست لە عێراقدا ماوەتەوە. ئەم كاریگەرییە تەنیا لە بواری سەربازیدا نییە، بەڵکو درێژ دەبێتەوە بۆ بڕیاری سیاسی، هاوپەیمانییە ئەگەرییەكان لە هەر حكوومەتێكی داهاتوودا و دیاریكردنی كارە لەپێشینەكانی سیاسەتی نیشتمانی.
سەرچاوەیەكی سیاسیی عێراقی ئاگادار لە گفتوگۆكانی نێو "بەرەی مقاوەمە" بە ڕاپۆرتەكەی وتووە، تاران بە ئەنقەست خۆی لە كردنەوەی بەرەیەكی نوێ لە عێراقدا بەدوور گرتووە، لە ترسی لێكەوتە ستراتیجییەكانی فراوانبوونێكی لەو شێوەیە.
سوودانی و قۆستنەوەی هەل
بەپێی ڕاپۆرتەكە، وا دیارە سوودانی ئەم خۆپارێزییەی تارانی وەك هەلێك قۆستووەتەوە بۆ بەهێزكردنی پێگەی هەرێمیی خۆی، لە ڕێگەی دوورخستنەوەی عێراق لە ململانێی ڕاستەوخۆ، كە هەنگاوێكە پێدەچێت پێگەی لەلای سەركردەكانی كەنداو و توركیا بەهێزتر بكات.
سەرەڕای ئەوە، هەر گۆڕانكارییەك لە كارە لەپێشینە ستراتیجییەكانی ئێراندا دەتوانێت جارێكی تر عێراق بخاتەوە ناو دڵی ڕووبەڕووبوونەوەی هەرێمی.
فشارەكان و دابەشبوونە ناوخۆییەكان
ڕاپۆرتەكە باس لەوەش دەكات، حكوومەتی عێراق لەژێر فشاری توندی ئەمەریكادا، ڕەشنووسی پڕۆژەیاسای حەشدی شەعبی هەڵوەشاندووەتەوە، كە هەنگاوێكە پێدەچێت لە تاران وەك پاشەكشەیەك سەیر بكرێت.
لەلایەكی ترەوە، هەرچەندە باس لەوە دەكرێت كە هەندێك لە گرووپە چەكدارەكان دەستیان كردووە بە دووركەوتنەوە لە "بەرەی مقاوەمە"، بەڵام هێشتا توانای دەستوەردانی سەربازییان هەیە، وەك ئەو نمایشە هێزەی لە مانگی تەممووزدا ئەنجامیان دا بە ئامانجگرتنی دامەزراوە نەوتییەكان لە هەرێمی كوردستان.
چارەنووسی نادیار
لە كۆتاییدا، ڕاپۆرتەكە دەڵێت، هەرچەندە خۆبەدوورگرتن لە پێكدادانی ڕاستەوخۆ لە بەرژەوەندیی زۆربەی هێزە عێراقییەكاندایە، بەڵام ئەگەری نوێبوونەوەی ڕووبەڕووبوونەوەی نێوان ئێران، ئیسرائیل و ئەمەریكا هێشتا لە ئاسۆدا دیارە. ئەگەر پێكدادانێكی وا ڕووبدات، ڕوون نییە كە ئایا بەغدا دەتوانێت پارێزگاری لە هەڵوێستە بێلایەنە تەمومژاوییەكەی بكات یان نا.