دەقی گوتاری سەرۆك .. پارتی ناشكێ‌

سەرۆك گوتی، "بەرەو هەڵبژاردن دەچین، دیسان پیلانگێڕیش سەرلەنوێ دەست پێ دەكاتەوە لە دژی پارتی، نەسیحەتی من بۆ ئەمانە ئەوەیە بە خۆیاندا بچنەوە، جارێك دوو جار سێ جار مرۆڤ دەبێ عیبرەت وەربگرێ، كاكە پارتی بە ئێوە ناشكێ، چ لەناو هەرێم، چ بە هاوپەیمانیی مەجمووعەیەك لە بەغدا".

دەقی گوتاری سەرۆك 

بە ناوی خوای گەورە و میهرەبان

هەڤاڵانی خۆشەویست

كاندیدە بەڕێز و خۆشەویستەكان

زۆر زۆر خۆم بە بەختەوەر دەزانم كە ئەمڕۆ لێرە لەگەڵ ئێوە كۆ دەبمەوە بۆ دەست پێ كردنی بانگەشەی هەڵبژاردن بۆ خولی شەشەمی پەرلەمانی فیدراڵی. هەموو هەڵبژاردنێك گرنگە، لەبەر ئەوە من ناتوانم بڵێم ئەم هەڵبژاردنە زۆر زۆر گرنگە، هەموو هەڵبژاردنەكان گرنگن و هەر هەڵبژاردنێكیش لە هەلومەرجێكی جیاوازدا دێن. من بیستوومە كە بەشێكی زۆر لە خوشك و برایانی عەرەب و توركمان لەنێو لیستی 275ی پارتیدان.

اود ان اعرب عن سعادتي العميقة لوجود عدد من الاخوة والأخوات العرب والتركمان ضمن القائمة الحزب الديمقراطي الكردستاني القائمة 275. هذا الوجود يعزز مباديء الحزب، ويعزز قوة الحزب ويعكس النهج الصحيح للحزب الديمقراطي الكردستاني.

وجودكم في هذه القائمة يضيف القوة الى قوة الحزب الديمقراطي الكردستاني، وأوصيكم جميعا ان تعملوا يدا واحدا للدفاع عن حقوق شعب الكردستان وعن حقوق كل فرد عراقي في كل محافظة وفي كل المنطقة، وان تعتبروا انفسكم نواب عن كل محافظة العراقية وليس فقط الاقليم الكردستان. اتمنى لكم جميعا التوفيق والنجاح والأهم ان تفوز القائمة. كلكم اعزاء وكلكم اخوة والاخوات. المهم ان تفوز القائمة 275، اذا فازت القائمة يعني كلكم فزتم، فلذلك التركيز يجب ان تكون على القائمة، عدا ذلك اي واحد منكم يفوز، بالنسبة لنا نفس الشي، كلكم سواء وكلكم اعزاء، اهلا وسهلا.

بەڕێزان

بە پێویستی دەزانم تۆزێك بگەڕێمەوە بۆ مێژوو. دەوڵەتی عێراق كە دامەزرا دوای جەنگی جیهانیی یەكەم، لەسەر ئەو ئەساسە دامەزرا كە كورد و عەرەب شەریكن لەم وڵاتەدا، ئەمەش دوای ئەوە هات كە دوای ئەوەی لە پەیماننامەی لۆزان ڕێككەوتنی سیڤەر تێكچوو و تەنها مافی بڕیاردان لە چارەنووسی خۆیان كە ئایا لەگەڵ عێراق بن یان لەگەڵ توركیا بن تەنها بە باشووری كوردستان درا، ئەوانەی تر تەقسیم كران هەروەكوو هەموو ناوچەكە دابەش كرا، ئەوكاتە كوردی باشوور دەنگیان دا كە لەگەڵ دەوڵەتی عێراق بن بەڵام بە مەرجێك كە شەریك بن لە حوكمدا. بەداخەوە ئێمە نەك نەبووینە شەریك، مافی هاووڵاتیشمان نەبوو. دوای ئەوە مافی ژیانیشمان نەما، شەراكەتی ئێمە بوو بە ئەنفال و كیمیاباران و وێرانكردنی دێهاتمان و زۆر لەوەش بەداختر، دوای 2003، نانی ماڵ و منداڵی ئەو ئەنفالكراو و كیمیابارانكراوانەیان بڕی، لە جیاتی ئەوەی كە قەرەبووی ئەو قوربانییانە بدەن، نانیان بڕین.

ئومێدەوارم كە ئەم هەڵبژاردنە فورسەتێكی تر بێنێتە پێش بۆ هەموو عێراق و ئیتر ئەو هەڵانەی كە كراون، دووبارە نەبنەوە، چ لای ئەوان، چ لای ئێمە.

سەرەڕای هەموو ئەو زوڵم و زۆردارییەی كە لە خەڵكی كوردستان كرا، بەڵام مەردانە و سەربەرزانە لە مەیداندا وەستان و خۆیان نەچەماند و بەرگرییەكی مەردانەیان لە ماف و وجوودی خۆیان كرد.

هەر دەرفەتێك هاتبێتە پێش بۆ ئاشتی، لە دەست نەدراوە، لە ساڵی 1963، لە ساڵی 1964، لە ساڵی 1966، لە ساڵی 1970، لە ساڵی 1991یش، لە هەموو ئەم تاریخانە گفتوگۆ كراوە بۆ ئاشتی، بەڵام دووبارە شەڕ دەستی پێ دەكردەوە، چونكە بڕوایان بە ماف و بە پێكەوەژیان و بە دیموكراتی نەبوو. درووشمی شۆڕشی ئەیلوول (دیموكراتی بۆ عێراق، ئۆتۆنۆمی بۆ كوردستان)، ئەو وەختە دەستنیشانكردنی پارتی زۆر راست و دروست بووە، ئەگەر دیموكراتی لە عێراق نەبێت، نە كورد و نە عەرەب و نە توركمان و نە هیچ دین و مەزهەب و ئایینێك ناتوانێ بە مافی خۆی شاد ببێ، دەبێ دیموكراتیەكی راستەقینە هەبێ، ئەو وەختە مافەكانیش دەستەبەر دەبێ.

چی وایكرد سەرۆك بارزانی زۆر زیاتر شانازی بكات كە یەكێكە لە نەتەوەی كورد؟

سەرۆك بارزانی:

سەرەڕای ئەو هەموو تاوانانەی كە دەرهەق بە خەڵكی كوردستان كرا، بەڵام وەختێك كە فورسەت بۆ خەڵكی كوردستان هاتبێتە پێش، مەردانە و مرۆڤدۆستانە رەفتاریان كردووە. لە ساڵی 1991 كە دوو فەیلەقی سوپای عێراق تەسلیم بوون و ئەو دوو سوپایەش بوون كە ئەنفال و وێرانكردنی دێهات هەمووی لەسەر دەستی ئەمانە بوون، بەڵام یەك نەفەریان نە ئەزیەت كرا، هەمووش ئیزن دران و بە كەیفی خۆیان هەر كەسەی بڕیاری خۆی دا بۆ كوێ بچێت. ئەمە وایكرد كە من خۆم شەخسی زۆر زیاتر لە جاران شانازیی بەوە بكەم كە یەكێكم لەم نەتەوەیە و لەم میللەتە.

دەرفەتی زێڕین ساڵی 2003 بوو، ساڵی 2003 رژێمی بەعس رووخا و دەرفەتێكی زێڕین بۆ هەموو خەڵكی عێراق هاتە پێش، ئێمەش بە نیەتێكی پاك و بە ئیرادەیەكی زۆر زۆر بەهێز چووین بۆ بەغدا، بۆ ئەوەی عێراقێكی تازە دابمەزرێنین هەموو پێكەوە لەسەر سێ بنەما، (هاوبەشی، هاوسەنگی، سازان - الشراكة، التوازن، التوافق)، بە هەموو توانایەكمان هەوڵمان دا كە ئەو عێراقە دروست بكرێ، تا گەیشتە دەستوور لە ساڵی 2005، كەس بەقەد ئێمە ماندوو نەبووە بەم دەستوورە. ئەو وەختەش كە من گەڕامەوە بۆ كوردستان، گوتم ئەمە دەستوور ئەلحەمدولیلا تەواو بوو، ئەوە نییە بڵێی دەستوورێك بێ هەموو تمووحی ئێمەی جێبەجێ كردبێ یان بە دڵی هەموومان بێ، بەڵام ئەگەر تەماشای بكەین بە شێوەیەكی مەنتقی، دەستوورێكی فوق العادة باشە، تا ئاستێكی زۆر مافەكانی ئێمە دەستەبەر دەكات، بێ كەموكوڕی نییە، بەڵام ئیجابیاتی زۆر زۆر زیاترە لە سلبیاتی. ئەگەر ئەو دەستوورە جێبەجێ بكرابایە، عێراق تووشی زۆر لەو كێشانە نەدەبوو، زۆر لە گرفتەكانی نێوان هەرێمی كوردستان و بەغداش روویان نەدەدا، بەداخەوە ئیلتزامی پێوە نەكرا.

هەرچەندە ئەو قانونەی كە ئێستا هەڵبژاردنی پێ دەكرێت، نە دادپەروەرانەیە، نە یاسایەكی وەهاشە كە مافی هەر كەسێك بەپێی قەبارە و سەنگی خۆی پێ بدات، سنووردار كراوە، هەر كەسێك، هەر لایەنێك، هەر حزبێ، لەبەر ئەوە ئومێدەوارین لە هەڵبژاردنەكانی داهاتوودا دەبێ ئەم یاسایە بگۆڕدرێ.

ئێستاش من دەمەوێ بۆ ئەو كەسانەی كە لە بەغدا دژی هەرێم بوون و كێبڕكێیان دەكرد لەوەی كە كێ زیاتر دژایەتیی هەرێم دەكات، كێ زیاتر هەرێم ئەزیەت دەدات، بە تایبەتی لەناو پەرلەمان. بەبیریان بێنمەوە كە چەند بڕگەیەك لە ناو دەستوور هەیە، با ئەو بڕگانە بخوێننەوە، ئەو وەختە دەزانن ئایا هەرێم موخالەفەی كردووە یان غەدر لە هەرێم كراوە؟

لە دیباجەی دەستوور (نحنُ شعبُ العراق الذي آلى على نفسه بكلِ مكوناته وأطيافه ان يقرر بحريته واختياره الاتحاد بنفسه، وأن يتعظ لغده بأمسه، وأن يسُنَّ من منظومة القيم والمُثُل العليا لرسالات السماء ومن مستجدات علمِ وحضارةِ الانسانِ هذا الدستور الدائم. إنّ الالتزام بهذا الدستور يحفظُ للعراق اتحاده الحر شعبا وأرضاً وسيادةً)، با ئەوانە باش ئەو بڕگەیە بخوێننەوە ئنجا گلەیی لە هەرێم بكەن.

مادەی یەكەم دەڵێت، (العراق دولة اتحادية)، من نامەوێ بچمە وردەكارییەوە، عێراق دەوڵەتێكی فیدرالییە نەك دەوڵەتێكی مەركەزی، دەوڵەتی مەركەزی نەما، لە دوای 2003 بەپێی ئەو دەستوورە و ئەو ڕێككەوتنەی كردوومانە، دەوڵەتی مەركەزی نەماوە، هەر رەفتارێك بە شێوەی دەوڵەتی مەركەزی، نایاساییە و نادەستوورییە. چ ئەوانەی لە شوێنەكانی تری عێراق كرابێت، چ ئەوانەی دەرهەق بە هەرێمی كوردستان كرابێت.

مادەی سێ دەڵێ: (العراق بلد متعدد القوميات والأديان والمذاهب)، زۆر لەسەر ئەم مادەیەش ئیشمان كرد، مانای وایە كە بە یەك پێكهاتە عێراق ئیدارە ناكرێت، دەبێ ئەمانە هەمووی شەریك بن، ئەو پێكهاتانە هەمووی دەبێ شەریك بن.

زۆر باسی ئەوە دەكرێ مەسەلەی نەوت و غاز، دیسان ئەمەش هەفتەیەك زیاتر لە بەغدا گفتوگۆمان كردووە لەسەر ئەو دوو مادەیە، مادەی (111) كە دەڵێ: (النفط والغاز هو ملك كل الشعب العراقي في كل الاقاليم والمحافظات)، هیچ خیلافمان نییە لەسەر ئەم دوو مادەیە.

مادەی (112)، دەڵێ: (اولا:- تقوم الحكومة الاتحادية بإدارة النفط والغاز المستخرج من الحقول الحالية مع حكومات الاقاليم والمحافظات المنتجة على ان توزع وارداتها بشكل منصف يتناسب مع التوزيع السكاني في جميع انحاء البلاد، مع تحديد حصة لمدة محددة للأقاليم المتضررة والتي حرمت منها بصورة مجحفة من قبل النظام السابق والتي تضررت بعد ذلك بما يؤمن التنمية المتوازنة للمناطق المختلفة من البلاد ،وينظم ذلك بقانون. ثانيا:- تقوم الحكومة الاتحادية وحكومات الاقاليم والمحافظات المنتجة معا برسم السياسات الاستراتيجية اللازمة لتطوير ثروة النفط والغاز بما يحقق اعلى منفعة للشعب العراقي معتمدة احدث تقنيات مبادئ السوق وتشجيع الاستثمار.) لێرەدا مەبەستیان ئەوەیە وشەی (معا)، یەك هەفتە موناقەشە بوو لەسەر ئەوەی (بالتنسیق) یان (معا)، لە كۆتاییدا (معا) جێگیر بوو، واتە هەرچی دەكرێ دەبێ پێكەوە بێت، نابێ وەزیری نەوت یان وەزیرێكی تر لەوێ بە كەیفی خۆی بڕیار بدات و حیسابی بۆ نەكات، هەرێم بەمە پابەند بووە، بەڵام خەڵكی تر ئیلتزامی پێ نەكردووە.

مادەیەكی تر مادەی (115)یە: (كل ما لم ينص عليه في الاختصاصات الحصرية للسلطات الاتحادية يكون من صلاحية الاقاليم والمحافظات غير المنتظمة في اقليم والصلاحيات الاخرى المشتركة بين الحكومة الاتحادية والاقاليم تكون الأولوية فيها لقانون الاقاليم والمحافظات غير المنتظمة في اقليم في حالة الخلاف بينهما.) ئەمەش دیسان حەقێكی زۆر بە هەرێم دەدات، بەڵام دیسان ئیشی پێ نەكرا.

زۆری تر هەیە، مادەی 121 باسی دەسەڵاتی هەرێم دەكات، نامەوێ زۆر وەختی ئێوە بگرم بەمە، بەڵام لێرەدا دەمەوێ بۆ ئێوە و بۆ هەموو خەڵكی عێراق روون بكەمەوە:

لە شوباتی 2007 لێرە لە پیرمام چەندین كۆبوونەوە كرا لە نێوان شاندی هەرێم و شاندی حكوومەتی فیدرال و پسپۆڕی شارەزا لە وڵاتانی تر وەكوو كەنەدا و زۆر لە وڵاتانی تر، بە ئامادەبوونی باڵیۆزی ئەمەریكا و باڵیۆزی بەریتانیاش، ئێمە گەیشتینە رێككەوتنێكی زۆر ڕێكوپێك، ئەو یاسایە رۆیشت بۆ ئەنجوومەنی وەزیران، وەزیرێك لە وەزیرەكان گوتبووی كورد نازانن جیاوازی لە نێوان ئاو و نەوت بكەن، ئێمە بۆ خۆمان تووشی ئەو پابەندییانە دەكەین؟ نەیانهێشت ئەو یاسایە بڕوات. ئیتر ئەگەر كێشەیەك لەسەر نەوت و غاز هاتۆتە پێشەوە، خەتاكە لە بەغدایە نەك لە هەرێم. ئەگەر ئەو وەختە ئەو قانونە بەڕێوە بچووبا، زۆر شتێكی باش بوو و ئەو كێشانە زۆریان روویان نەدەدا.

ئێستاش دوای ئەوەی كە ئەو ڕێككەوتنەی چەند ڕۆژێك لەمەوبەر لە نێوان حكوومەتی هەرێم و حكوومەتی فیدرال و كۆمپانیاكانی نەوت، ئومێدەوارم ئەمە بەردەوام بێ و ئەمە ببێتە هۆكاری ئەوەی كە ئەو قانونە، ئنجا چ هەمواری پێویست بێ یان وەكوو بنەمایەك بۆی بگەڕێنەوە، یان یاسایەكی تر، هەرچی زووترە یاسای نەوت و غاز لەسەر ئەم بنەمایانە بكرێ، ئێمە هیچ دوودڵ نین و ئامادەشین بۆ ئەو ڕێككەوتنانە، بەڵام تەفسیراتی هەڵە بۆ بەندەكانی دەستوور قابیلی قەبووڵ نییە.

خاڵی تر كە زۆر گرنگە، مادەی 140ە، مادەی 140 دەڵێ ئەو ناوچانە (تطبيع، احصاء، استفتاء)، تا ئێستا خۆیان لەمانە دزیوەتەوە، مانای وا نییە كە پێیانوابێت كات ئەمە لەبیر خەڵكی كوردستان دەباتەوە، ئەم مەسەلەیە دەبێ چارەسەر بكرێت بەپێی ئەم بنەمایانەی كە لە دەستووردا هاتووە، بۆ ئەوەی عێراق سەقامگیر ببێت، بۆ ئەوەی هەموومان پێكەوە ئیتر نەوەی داهاتوو تووشی ئەم مەشاكیلانە نەبن لەوانەی ئێمە و ئەوانەی پێش ئێمە تووش بوون، با بۆ خۆیان ژیانێكی بەختەوەر و ژیانێكی ئاسوودە ببەنە سەر، هەر خەریكی ئەم مەشاكیلانە بن خوا قەبووڵ ناكا.

مادەیەكی تر كە زۆر گرنگە، مادەی (65) كە دەڵێ: (اولاً: يتم انشاء مجلس تشريعي يدعى ب (مجلس الاتحاد ) يضم ممثلين عن الاقاليم والمحافظات غير المنتظمة في اقليم، وينظم تكوينه وشروط العضوية فيه ،واختصاصاته، وكل ما يتعلق به بقانون يسن بأغلبية ثلثي أعضاء مجلس النواب.) لێرەدا گلەیی لە خۆشمان دەكەین، لە كورد و نوێنەرانی كورد لە بەغدا و حكوومەتی هەرێم و ئەحزابی هەرێمیش هەموویان، ئێمەش ئەم مادەیەمان ئیهمال كردووە كە شتێكی زۆر زۆر گرنگە بوو، لەبەر ئەوە ئەمە ئەركی ئێوەیە لەگەڵ لایەنەكانی تریش هەوڵ بدەن دەبێ ئەم مادەیە جێبەجێ بكرێت، چونكە ئەمە گەرەنتییەكە بۆ ئەوەی ئیتر هەر كەسێك و هەر وەزیرێك و هەر دادگایەك نەیەت بە كەیفی خۆی پێشێلی یاسا بكات و بە ناوی یاسا خەڵكەكە سزا بدات.

ئەوانەی تر، ئەوەی دادگای فیدرالی، مادەی (92) دەڵێ: (اولا :- المحكمة الاتحادية العليا هيئة قضائية مستقلة ماليا واداريا. ثانياً:- تتكون المحكمة الاتحادية العليا من عدد من القضاة وخبراء في الفقه الاسلامي وفقهاء القانون، يحدد عددهم وتنظم طريقة اختيارهم، وعمل المحكمة، بقانون يسن باغلبية ثلثي اعضاء مجلس النواب.) ئەمەش دیسان پێشێلكارییەكی دەستوورە، ئەم دادگایە تا ئێستا دروست نەكراوە، ئەم دادگایەی ئێستا ئەو دادگایە نییە كە لە دەستووردا هاتووە. ئەمەش دەبێ چارەسەر بكرێت بۆ ئەوەی لەمەودوا نە هەرێم و نە خەڵكی تری عێراق تووشی غەدر نەبن بە ناوی قانون و بە بڕیاری یاسایی بەسیاسیكراو.

بەڕێزان

ئێستاش ئەوە خۆمان ئامادە دەكەین بەرەو هەڵبژاردن بۆ خولی شەشەمی پەرلەمانی عێراق، من داوا دەكەم هەڵبژاردنێكی زۆر زۆر لەسەرەخۆ و هێمن و بێ كێشە، هەتا ئەگەر وێنەی ئێوە لە شوێنێك بدڕێنن، ئێوە ئەو كارە هەڵەیە نەكەن، ئەوە كارێكی هەڵەیە و ئێوە بەرزتر بن لەوە. قسەیەكی ناشرین، وەڵامیان نەدەنەوە، ئەگەر شتی وا كرا كە بوختان دەرهەق بە هەرێم كرا، ئەو كاتە دەبێ بە شێوەیەكی رەوا وەڵام بدرێتەوە، بەڵام بەو شێوەیەی كە (فعل و رد فعل) خۆتان مەهێننە ئەم ئاستە.

داوا لە هەموو خەڵكی كوردستان دەكەم كە بە گەرمی بچنە سەر سندووقی دەنگدان و دەنگ بدەن.

لێرەدا ناچارم بە راشكاوانە ئەمەش بڵێم، هەموو جارێ كە بەرەو هەڵبژاردن دەچین، دیسان پیلانگێڕیش سەرلەنوێ دەست پێ دەكاتەوە لە دژی پارتی. نەسیحەتی من بۆ ئەمانە ئەوەیە بە خۆیاندا بچنەوە، جارێك دوو جار سێ جار مرۆڤ دەبێ عیبرەت وەربگرێ، كاكە پارتی بە ئێوە ناشكێ، چ لە ناو هەرێم، چ بە هاوپەیمانیی مەجمووعەیەك لە بەغدا، لە هەر شوێنێك بیر لەوە بكەنەوە بە هاوپەیمانیی خۆتان هەرێم دەشكێنن، وەڵاهی هەرێم ناشكێ و پەشیمانیش دەبنەوە، پارتی بە ئێوە ناشكێ، پارتی زۆر زۆر گەورەترە لەوەی بە هاوپەیمانیی ئەم و ئەویتر بشكێ. ئێمە دەمانەوێ هەموو كێشەكان چارەسەر بكرێن، كورت و پوخت، ئەگەر باوەڕییان بەم مادە دەستوورییانە هەیە كە عێراق وڵاتێكی ئیتیحادییە، نەخشەڕێگەیە بۆ چارەسەری هەموو كێشەیەك، ئەگەر هەرێم یەك داوای زیاتر لەوەی لە دەستووردا هاتووە داوای كرد، پێی بڵێن نابێت چونكە لە دەستووردا ڕێگە نادات، بەڵام یەك مادەش لە دەستوور كەمتر یان هەڵسوكەوتی تێدا بكرێت و شایستەی هەرێم و شایستەی گەلی كوردستان، بەخوا ئێمە قەت قەبووڵی ناكەین. ئنجا ئەگەر نیەتی چارەسەری كێشەكان هەبێت، وەڵاهی زۆر زۆر ئاسانە، گەڕانەوەیە بۆ دەستوور، بەبێ كەموزیاد دەستوور جێبەجێ بكرێ، كێشەكان هەموو چارەسەر دەبن.

ئەم ماوەیە ئەزموونێكی زۆریش پەیدا بووە، هەم لە هەرێم و هەم لە بەغداش، ئێمە ئامادەین بەپێی دەستوور هەموو كێشەكان كۆتاییان پێ بێت، هەقیشە كۆتاییان پێ بێت، لە كوێ هەرێم هەڵەی كردووە، دەبێ بە خۆیدا بچێتەوە، هەرچەندە غەدر لە هەرێم كراوە، بەڵام ئەگەر لە شوێنێكدا، بەڵام بەغداش دەبێ بگەڕێتەوە بۆ دەستوور، ئەگەر بیانەوێ عێراق سەقامگیر ببێت و ئەو پێكەوەژیان و برایەتییەی هەیە، بمێنێت.

لە كۆتاییدا من جارێكی تر تەمەننای سەركەوتنتان بۆ دەكەم، دوعای سەركەوتنتان بۆ دەكەم، خۆتان بە نوێنەری هەموو خەڵكی عێراق بزانن، لەوێ لەگەڵ لایەنەكانی تر، لەگەڵ پەرلەمانتارانی تر، پەیوەندییەكی رێكوپێك و دۆستانە دروست بكەن، پێكەوە بەرگریی لە كورد بكەن، لە عەرەب بكەن، لە توركمان بكەن، لە ئێزدی بكەن، لە هەموو كەسێك بكەن، كێ مەزڵوومە بەرگریی لێ بكەن، نەچن لەوێ خۆتان عەزل بكەن، یان موزایەدە، ئەوەی خراپە لە دونیا موزایەداتە، لە موزایەدات مەترسن، لە كەسیش مەترسن چونكە ئێوە چیاكانی كوردستانتان لە پشتە، پارتیتان لە پشتە.

ئیشەڵا رۆحی شەهیدەكان شاد دەكەن، دڵی خەڵكی كوردستانیش شاد دەكەن، ئێوەش سەركەوتوو بن، والسلام علیكم