بەهۆی نائارامی و ململانێی ئاین و مەزەوییەوە، بەشی هەرەزۆری مەسیحییەكان عێراقیان جێهێشتووە و بەپێی دواین ئامار، مەسیحییەكان لە پێش 2003وە ژمارەیان لە ملیۆنێك و 500 هەزار كەسەوە بۆ 250 هەزار كەمی كردووە.
هەموو ساڵێك لە یادی لەدایكبوونی مەسیحدا باسی مەسیحییەكانی عێراق دێتەوە ناو گوتاری بەرپرسەكان، بەڵام لە ئەرزی واقیعدا عێراق شوێنێكی ئارام نەماوە و زۆرینەی مەسیحییەكان كۆچیان كردووە و چیتر بۆ ئەوان نیشتمان نییە.
لە هەرێمی كوردستان بابەتەكە بەپێچەوانەوەیە، بەهۆی كاری رژدی حكوومەتی هەرێم و روانگەی پارتی بۆ پێكەوەژیان، هەر لە سەرەتای راپەڕینی ساڵی 1991وە هەلومەرجی پێكەوەژیان رەخسێنرا و تەواوی ئاین و ئاینزاكانی كوردستان، دەرفەتی ژیانێكی ئارام و پڕ لە تەناهییان هەبووە، بۆیە ژمارەی مەسیحییەكانی هەرێم زیادی كردووە.
هەموو كاتێك پارێزراوترین شوێنی عێراق بۆ مەسیحییەكان كوردستان بووە، لە كاتی شەڕی داعش و پەلاماری سنووری مووسڵ، مەسیحییەكان زۆرینەیان روویان لە هەرێمی كوردستان كرد، بەشی زۆریان تا ئێستە نەگەڕاونەتەوە و بەیەكجاری لە كوردستان نیشتەجێ بوون.
بەپێی راپۆرتی كۆمسیۆنی مافی مرۆڤ لە عێراق لە ئاداری 2021، لە عێراقدا تەنیا 250 هەزار مەسیحی ماونەتەوە، لە كاتێكدا ژمارەیان پێش 2003 نزیكەی ملیۆنێك و 500 هەزار كەس بووە.
ئەمەش دەریدەخات چیتر عێراق وڵاتی ئاینە جیاوازەكان نەماوە و هیچ كەسێك كە ئاینێكی جودای لە ئیسلامی شیعە و سوننی هەبێت، ناتوانێت سەلامەت بێت.
لە كاتێكدا مەسیحییەكان كۆنترین پێكهاتەی ئاینین لە وڵاتی نێوان دوو رووبار، مەسیحییەكان لە سەرەتای سەدەی یەكەمی زاینییەوە هاتوونەتە ناوچەكە، زیاتر بە سریانی و ئاشووری و ئەرمەنی ناسراون، بوونی خۆیان لە شارە كۆنەكانی وەك مووسڵ و دەوروبەری، لەگەڵ بەغدا و بەسرە و هەولێر پاراستبوو، ساڵانێك ئەوان رۆڵی گرنگیان هەبوو لە ژیانی رۆشنبیری و فێركردن و ئابووری عێراق.
راپۆرتەكان ئاماژە بەوە دەكەن، لە نێوان ساڵانی 2003 تا 2014، هەزار و 315 مەسیحی لە عێراق كوژراون، نزیكەی 130 هەزار مەسیحیش ئاوارە بوون و 161 كەسیشیان لە سەردەمی دەسەڵاتی داعش لە مووسڵ لە نێوان ساڵانی 2014 تا 2017 رفێنراون.