ساڵێك زیاترە رژێمی بەشار ئەسەد رووخاوە و هێشتا سووریا سەقامگیر نەبووە، كێشەی حكوومەتی نوێی سووریا ئەوەیە هێشتا ناتوانێت وەك دەوڵەت رەفتار بكات و لەژێر كاریگەریی وڵاتانە و تەنیا نواندنی بەدەوڵەتبوون دەكات، ئەو بێمتمانە و پێنەگەیشتووە و كێشەی لەگەڵ هەموو پێكهاتەكانی ئەو وڵاتە هەیە لە كورد و درووز و عەلەوییەكان، توركمانەكان سەر بە توركیان و كریستانەكانیش لەبەر رۆژئاوا خۆی لە ململانێ لەگەڵیان دەپارێزێت، ئێستە شەڕ لە حەلەب گەرمە و وریایی لە هەمان سیناریۆی كەناراوەكان و سوێدا لە و شارە لە دژی كورد دەدرێت.
لەوكاتەی ئەمڕۆ وەزارەتەكانی دەرەوە و بەرگریی توركیا پاڵپشتیی خۆیان بۆ حكوومەت و سوپای سووریا لە دژی هەسەدە دووپات كردەوە و داوای چۆڵكردنی هەردوو گەرشەكی شێخ مەقسوود و ئەشرەفیەیان لە حەلەب لە لایەن هەسەدەوە كرد، مەزڵووم عەبدی فەرماندەی گشتیی هەسەدە رای گەیاند كە بەردەوامبوون لە شەڕ و زمانی جەنگ بۆ سەپاندنی چارەسەری تاكلایەنە، شتێكی قبووڵ نەكراوە و پێشتر لە كەناراوەكانی سووریا و سوێدا بووەتە هۆی كۆمەڵكوژی، كە دەچێتە خانەی تاوانی جەنگ، دووپاتی كردەوە كە ئەم هەنگاوانە زەوینە بۆ گۆڕانكاریی دیموگرافیی مەترسیدار خۆش دەكەن و ئەو مەدەنییانەی لە شێخ مەقسوود و ئەشرەفیە گیریان خواردووە، دەخاتە بەردەم مەترسیی كۆمەڵكوژی.
دوێنێ لە گەرمەی شەڕی حەلەب، سەرۆك بارزانی پەیامێكی راگەیاند، ئەو بارودۆخە مەترسیدار و ئەو شەڕ و توندوتیژییەی لە شاری حەلەب هەیە، جێگەی نیگەرانییەكی زۆرە و مەترسی لەسەر ژیانی خەڵكی سڤیل و هاووڵاتییانی بێتاوان دروست كردووە و هەڕەشەی پاكتاوی رەگەزی لە دژی كورد لەو ناوچەیە هەی، داوای لە دەسەڵاتدارانی سووریا كرد ناكۆكیی سیاسی نەكرێتە ناكۆكیی نەتەوەیی و لەو كێشە و گرفتانەی لە ناوچەی حەلەبدا هەن رێگە نەدرێ هاووڵاتییانی كورد تووشی گوشار و زەبروزەنگ و دەركردنیان لە شوێنی باب و باپیرانیان و پاكتاوی ڕەگەزی ببنەوە، داوای لە لایەنە كوردییەكان، بە تایبەتی هەسەدە كرد ئەوەی لە توانایاندا بێت بیكەن لەپێناو راگرتنی شەڕ و پێكدادان و رێگرتن لە خوێنڕشتنی زیاتر و هەردوولا كار بۆ گرتنەبەری رێگەی دیالۆگ و گفتوگۆ بكەن بۆ چارەسەركردنی كێشەكان.
د. غازی فەیسەڵ توێژەری سیاسی لە لێدوانێكی تەلەڤزیۆنی دەڵێت، ئەوەی ئەمڕۆ لە سووریا دەیبینین لە ئەنجامی كەڵەكەبوونێكی مێژوویی و سیاسی و كۆمەڵایەتیی قووڵە، چەندان ساڵە كورد لە سووریا دووچاری سیاسەتێكی رێكخراوی فەرامۆشكردن دەبنەوە، لە ناسنامە و خوێندن بە زمانی خۆیان و مافە كولتووری و نەتەوەییە سەرەكییەكان بێبەش كراون، ئەمڕۆش دوای زیاتر لە 10 ساڵ لە شەڕی ناوخۆی سووریا و گۆڕانی دەوڵەتێكی داپڵۆسێنەر بۆ دەوڵەتێكی دیموكراسی، ئاسان نییە و بەپەلە ناكرێت.
زیاتر گوتی، جیاوازیی نێوان كورد و دیمەشق لە دید و میكانیزمەكانە نەك لە بەهای نیشتمانی، كورد بە بۆچوونی خۆیان وای دەبینن كە ئەو ساتە مێژووییە هەلێكە بۆ مسۆگەركردنی مافەكانیان لە دەستووری سووریا، جا لە رێگەی لامەركەزیی سیاسی یان ئیداری بێت، نەك لە رێگەی جیابوونەوە وەك باس دەكرێت، لە بەرانبەردا دەوڵەتی سووریا ترسی لەوە هەیە كە ئەو لامەركەزیەتە وەك سەرەتایەك بۆ لێكهەڵوەشانەوە لێكدانەوەی بۆ بكرێت، ئەگەرچی ئەزموونی دنیا دووپات لە پێچەوانەیی ئەو بابەتە دەكاتەوە، چەندان وڵات پەنایان بۆ فیدرالیەت و لامەركەزی بردووە بۆ بەهێزكردنی یەكپارچەیی دەوڵەت نەك لێكترازانی، بۆیە كێشە راستەقینەكە لە دنیای عەرەبی بریتییە لە لاوازیی رۆشنبیریی سیاسی بەرانبەر بەو نموونانە.
سەبارەت بە رێككەوتنی 10ی ئاداری دیمەشق لە نێوان هەسەدە و حكوومەتی سووریا و هۆكاری جێبەجێنەكردنی گوتی، رێككەوتنەكە وەك چوارچێوەیەكی گشتی كراوە، بەڵام كێشە لەسەر میكانیزمەكانی جێبەجێكردنی هەیە، كورد دەیانەوێ پەلە لە جێبەجێكردنی داواكارییەكانیان بكرێت، لەوكاتەی حكوومەتی كاتیی سووریا وای دەبینێت هەر هەنگاوێكی حسێب نەكراو هەڕەشە لە یەكپارچەیی دەوڵەتی سووریا دەكات، بۆیە ناكۆكییەكە لەبارەی مافەكان نییە، بەڵكو لەبارەی سنوور و كات و شێوەی ئیدارەدانیەتی، ئەوەی لە سووریا روودەدات مەترسییەكی راستەقینەیە لە دروستبوونی پشێوییەكی تەناهی، بەتایبەتی لەبارەی گرتووخانەكانی داعش، چونكە هەر بۆشاییەكی تەناهی لە سووریا لە لایەن داعشەوە سوودی لێ دەبینرێت، بۆیە ئەمەریكا لێرە رۆڵی دەبێت و توانای گوشاركردنی لە هەردوولا هەیە و دەتوانێت دۆخەكە بەرەو گفتوگۆ لە بری چەك هان بدات و رێگە لەبەردەم گەڕانەوەی تیرۆر بگرێت.