لە ماوەی چەند رۆژەی شەڕی حەلەب، كاتێك تەواوی هێزە تەناهی و سوپا و گرووپە توندڕۆكانی سووریا لە دوای بۆردمان و گەمارۆیەكی سەختی هەردوو گەڕەكی ئەشرەفییە و شێخ مەقسوود، بە تەواویی ئامرازی جەنگی سووریا و بە پاڵپشتیی و توركیا و میدیا و راگەیاندنەكانیان و دوای هەڵكردنی گڵۆپی سەوزی ئەمەریكا، هێرشێكی نابەرانبەریان كردە سەر دوو گەڕەكەكە و بە نەفەسێكی تایفیی داپۆشراو بە ئاین و تێكەڵ بە ساڵانێك لە دڕندەیی و توندڕۆیی كردە سەر گەڕەكە كوردییەكان. یەكێك لە دیمەنە قێزەونەكانی فڕێدانی كچە شەڕڤانێكی كورد بوو، كە باڵادەستیی هزری توندڕیی و توندڕۆیانیان لەو وڵاتە دەرخست.
لە
تۆمارێكی ڤیدیۆییدا كە دنیای هەژاند، لە میانەی شەڕەكەی حەلەب كچە شەڕڤانێك سووكایەتی بە تەرمەكەی دەكرێت و لە باڵەخانەیەك فڕێ دەدرێتە خوارەوە، دواتر دەركەوت ئەو كچە شەڕڤانە قەناسبەدەست بووە و بەر لە كوژرانی 20 چەكداری كوشتووە، دوای ئەوەی یەك فیشەكی پێ دەمێنێت، كۆتایی بە ژیانی خۆی دێنێت، چەكدارێكی توندڕۆی نزیك لە دیمەشقیش، سووكایەتی بە تەرمەكەی دەكات و لە باڵەخانەیەكی بەرز فڕێی دەداتە خوارەوە و ڤیدیۆی ئەو كارە تۆمار دەكەن، ڤیدیۆكە دەنگدانەوەیەكی ناڕەزایی گەورەی لە سۆشیال میدیای جیهانیی لێ كەوتەو، ئەوەش گوشارێكی زۆری كۆمەڵگەی نێودەوڵەتی لەسەر حكوومەتی جۆلانی دروست كردووە و ئێستە ئەوان نازانن چۆن پەردەپۆشی بكەن.
دوای ئەو رووداوە پڕ تراجیدیا و قێزەون و تێكەڵ بە ترسنۆكی و دڕندەیی لە لایەن هێزەكانی سووریا، ئەوان، واتە حكوومەتی سووریا هەوڵ دەدات بابەتەكە بۆ هەڵسوكەوتی تاكەكەسی و توندڕۆكان بگەڕێنێتەوە، ئاماژە دەكات كە ئەوەی كارەكەی ئەنجام داوە سووری نەبووە، بەڵكو توندڕۆیەكی میسرییە و لە ریزی گرووپێكی توندڕۆی سەر بە حكوومەتی سووریایە، وەك هەوڵێك بۆ سووككردنی رووداوەكە و لابردنی تاوانەكە لەسەر سوپای سووریا، كە زادەی رێكخراوەكانی داعش و قاعیدەن و تەنیا جلوبەرگیان گۆڕیوە، بەڵام درێژكراوەی بیری توندڕۆ و شەڕانگێزیی ئەوانن.
ئەو تۆمارە ڤیدیۆییەی لە سۆشیال میدیا لەبارەی كچە شەرڤانەكە هاتە بڵاوكردنەوە، توڕەییەكی گەوەری لەناو كورد و تەنانەت سوورییەكان دروست كرد، چاودێرانی نێودەوڵەتی و رێكخراوە مافپەروەركان سەركۆنەی تاوانەكەیان كرد و وایان لە قەڵەم دا ئەو جۆرە كارانە پێشێلكاریی رێككەوتننامەی جنێڤن پێوەست بە پاراستنی تەرم و كەرامەتی مرۆڤ لەكاتی شەڕەكاندا، هاوكات رووداوەكە هاوكاتە لەگەڵ بوونی رێككەوتنی دیمەشق لە نێوان هەسەدە و حكوومەتی كاتیی سووریا بۆ خۆیەكخستنەوە و تێكەڵبوونەوەیان.
ئەوەی لە حەلەب بەرانبەر بە كورد و هاووڵاتییانی سیڤیل رووی دا، بەشێكە لە رووی راستەقینەی گرووپە توندڕۆ بەناو ئیسلامییەكان، كە ئێستە بەناوی یەكخستنەوەی سووریا كەوتوونەتە وێزەی پێكهاتەكانی ئەو وڵاتە و نەك مافەكانیان زەوت دەكەن، لەبەرچاوی دنیا دەیانكوژن و ئاوارەیان دەكەن، تەنیا بەهۆی ئەوەی داوای مافی رەوای خۆیان لە سووریایەكی نوێ و دیموكراسی دەكەن، رووداوەكانی حەلەب سەلماندیان كە ئەو گرووپانەی بەسەر سووریای نوێ باڵادەستن، نەك باوەڕیان بە دیموكراسی و بەیەكەوە ژیان نییە، بەڵكو لە مامەڵەكردن لەگەڵ پێكهاتەكان باوەڕیان بەو ئاینەش نییە كە بە رووكەش بەرجەستەی دەكەن.
ئێستە دوای ئەوەی رووی دا چاوەڕوان دەكرێت گوشارەكانی سەر حكوومەتی سووریا بۆ كۆنتڕۆڵكردنی ئەو گرووپە توندڕۆیانە زیاتر ببێت، لەوكاتە هەزاران لەوانە خراونەتە ریزەكانی سوپای سووریا، ئەوەش توڕەیی سوورییەكانی زیاتر كردووە بەوەی ئەو چەكدارانە بوونەتە بارگرانیی تەناهی لەو وڵاتە و هێزێكی كۆنترۆڵ نەكراو، پێیان وایە بوونی ئەوان هەڕەشەیە بۆ سەر سووریا و سوورییەكان و رێگری لە سەقامگیربوون و ئاشتەوایی نیشتمانی دەكات.
لە 2025 بە رەزامەندیی تۆم باراك نێردراوی تایبەتی ئەمەریكا بۆ سووریا، 3500 چەكداری توندڕۆی بیانی خرانە سەر سوپای سووریا، كە زۆرینەیان لە ئیگۆرە چینییە توركەكانن، ئەوان خرانە سەر فرقەی 84ی سوپای سووریا، جیا لە دامەزراندنی سەركردەكانیان لە پلەی باڵا لەناو سوپا، ئەوەش نیگەرانیی لای وڵاتانی رۆژئاوا دروست كردووە و بە هەڕەشەیەكی تەناهی دەزانن.
لەوكاتەی بەشێك لە چاودێران پێیان وایە یەكخستنی ئەوانە لەگەڵ سوپای سووریا بۆ ئەوەیە كە رێگرییان لێ بكرێت نەچنە ریزەكانی داعش و قاعیدە، كەچی كورد و عەلەوی و درووزەكان و پێكهاتەكانی تری سووریا وا سەیری ئەوان دەكەن كە وڵاتەكەیان داگیر كردووە و هەمان پێشێلكارییەكانی پێشوو بەرانبەر بە هاووڵاتییانی سووریا ئەنجام دەدەن و لە سایەی باڵادەستیی ئەوانەوە ئەگەری بوونی سووریا بە دەوڵەتێكی توندڕۆی ئاینی هەیە.