نووسەر و رووناكبیرانی كورد، لەبارەی كۆكردنەوەی ئەمەریكا و كورد لەسەر مێزی گفتوگۆ لەلایەن سەرۆك بارزانییەوە، روانینی خۆیان دەدەن و ئاماژە بۆ ئەوە دەكەن ئەوەی كرا گورزێكی كەمەرشكێنە بۆ وڵاتانی دوژمن.
ئاشكرایە كە ئەمڕۆ سەرۆك بارزانی لە پیرمام كۆبوونەوەیەكی مێژوویی بۆ هەریەكە لە تۆم بارك نێردەی ترەمپ، مەزڵووم عەبدی و لایەنەكانی رۆژئاوای كوردستان لەبارەی دۆخی سووریا رێكخست. ئەو كۆبوونەوەیە دڵخۆشی كوردی رەسەنی بەدوای خۆیدا هێنا و وەك هەنگاوێكی گەورە بۆ یەكگرتوویی كورد دەبینرێ.
پێشتر "وشە" وێنەی كۆبوونەوەكەی وەك وێنەی مێژوو بڵاو كردەوە و بە خێرایی تۆڕە كۆمەڵایەتییەكانی تەنی، ئێستەیش روانینی خەڵك و نووسەران لەسەر كۆبوونەوەكە بەردەوامە.
بەكر شوانی، نووسەر، لەبارەی كۆبوونەوەكەوە نووسیویەتی، لە كۆی نۆ ئەندامی شاندی كوردستانی، سێ ئەندامیان ئافرەتن، ئەم دیاردە و ئەزموونە جیاوازە گورزێكی كەمەرشكێنە بۆ دەوڵەتانی كۆنەپەرست و پیاوسالاری ناوچەكە، بۆیە بە هەموو توانای خۆیانەوە هەوڵ دەدەن بۆ لەباربردنی ئەزموونی خۆئیدارەدانی كوردی.
هاوكات هیوا موسا، نووسەر، بۆچوونی خۆی نووسیوە و دەڵێ، كاتێك دەمانگوت هەرێم ئەو شتەیە كە نابێت سازشی لەسەر بكرێت، بە هەموو كەم و كورتییەكانیەوە دەبێت بپارێزرێت و سەروەرییەكەی پێشكەشی بەغدا نەكرێت، ئێمە بیرمان لەم ڕۆژە دەكردەوە.
ئەو دووپات دەكاتەوە، شێخ مەقسوود هەم گورزێكی گەورە بوو لە ئیسلامی سیاسی و سەلەفییەت، هەم درزە ئایدۆلۆجییەكانی نێوان باشوور و ڕۆژئاوای كاڵ كردوە لەپێناو دۆزێكی گەورەتر كە ئەویش مافی نەتەوەیەكە.
یەكێك لە كاردانەوەكانی تر لەسەر رووداوەكانی سووریا، مەرسوومەكەی دوێنێی ئەحمەد شەرع بوو، كە بەدران ئەحمەد حەبیب، نووسەری دیاری كورد، لەبارەی ئەو پرسەوە نووسیویەتی، ئەو بڕیارەی دوێنێی ئەحمەد شەرع دەری كرد و ددانی بە زۆر مافی بنەڕەتیی كوردی رۆژئاوادا هێنا "هەموو دەزانین ئەو مافانە باشن بەڵام دەترسین فێڵ و كڵاو لەسەرنان بێت".
ئەو پێی وایە، دەبێ لایەنی كوردی داوا بكات هەر بەو شێوەی دوێنێ، شەرع بڕیاری سیستمی فیدراڵیزمیش بۆ هەرێمی كوردستانی رۆژئاوا بدات، ئەم حكوومەتە كاتییە، ماوەی پێنج ساڵی لە پێشە بۆ هەڵبژاردنی حكوومەتێكی تر لە لایەن گەلی سووریاوە، پێنج ساڵ زۆرە بۆ رۆژئاوا چاوەڕوان بێت تاكو دەستوور؛ سیستمی فیدراڵیزم بڕیار دەدات یان نا، ئەگەر بە بڕیاری سەرۆكایەتی، وەك ئەوەكەی دوێنێ، ئەم فیدراڵیزمەیش بسەلمێنێ، لەوانەیە چارەسەرێكی گونجاو بێت.
هاوكات شێرزاد مامەسێنێ، لەوبارەیەوە بڕوای وایە كە ئێستە دۆزی كورد لە رۆژئاوای كوردستان لە دەستێكی ئەمیندایە، ئەوەیش بە ئاماژەدان بە كۆبوونەوەكەی ئەمڕۆی پیرمام.
مەسعوود عەبدولخالق خاوەنی دەزگای ستاندەر، سەرباری دەستخۆشی و سەرسامی بۆ كۆبوونەوەكەی ئەمڕۆ، نووسیویەتی، ئەوە هێمایە بۆ ئەوەی هەموولا تێگەیشتوون مەترسییەك هەیە.