جێگری پێشووی فەرماندەی فەرماندەیی ناوەندی سوپای ئەمەریكا پێشینەی سەربازی ئەمەریكا لە ناوخۆی ئێران و گورزە پێشبینیكراوەكان بە گوێرەی ڕیزبەندی ئامانج و گرنگی پێكانیان لەلایەن سوپای ئەمەریكاوە دەخاتە ڕوو و پلانی ورد بۆ تێكشكاندنی توانا سەربازییەكانی ئێران و ڕێگرتن لە دەستكردنەوەی هێزەكانی ئێران دەخاتە ڕوو.
لەبارەی گرنگترین ئامانجەكان كە لە سەرەتای هێرشەكە ئەمەریكا دەیگرێتەبەر
بۆب هاروارد جێگری پێشووی فەرماندەی فەرماندەیی ناوەندی سوپای ئەمەریكا لە چاوپێكەوتنێكی لەگەڵ سی ئێن ئێن گوتی، یەكەم ئامانجی سوپای ئەمەریكا پێویستە مووشەكی بالیستیكی ئێرانی بێ، ئەوە بەهێزترین چەكیانە و توانایان پێ دەبەخشێت، كە هەژموونی خۆیان ببسەپێنن، لەبەر ئەوە پێویستە سوپای ئەمەریكا بە چڕی سەرجەم سەكۆكانی هەڵدانی مووشەك و ناوەندەی هەڵگرتنی مووشەك و دروستكردنی وەك كاری یەكەم و لە پێشینەی خۆی لە سەرتاسەری ئێران بە چڕی بۆردمان بكات و توانا مووشەكییەكانی ئێران بە تەواوی تێكبشكێنێت، ئەمە وا دەكات جەنگەكە تەنیا لە ناوخۆی ئێران بمێنێتەوە و تاران نەتوانی لە دوورەوە پەلاماری هێزەكانی ئەمەریكا بە مووشەك بدات.
لەبارەی ئامانجی دووەمەوە، بۆب هاروارد هێمای بۆ ئەوە كرد، كە دوای توانا مووشەكییەكانی ئێران، پاراستنی گەرووی هورمز و تێكشكاندنی هێزی دەریایی ئێران لە ڕیزبەندی دووەم دێ لە ڕووی گرنگییەوە، بۆ ئەوەی بە خێرایی جەنگەكە یەكلایی بكرێتەوە، بەمشێوەیە توانای ئێران لە چاندنی بۆمبی ئاوی لە ڕێڕەوە ئاوییەكان لەناو دەبرێ و هێزی دەریایی ئێرانیش توانایان نامێنێ كە هەڕەشە لە كەشتییە زەبەلاحەكانی گوێزەرەوەی نەوت و كاڵاكان لە ئاوەكانی كەنداو بكەن، كە ئەمەیش مەترسییەكی زۆر گەورە لەسەر ئابووری جیهان لا دەبات، چونكە لە ئەگەری گرتنی گەرووی هورمز كە 25%ی نەوتی جیهانی لێ هەناردە دەكرێ، نرخی نەوت بەرزبوونەوەیەكی خەیاڵی بەخۆیەوە دەبینێت، كە ئەمەیش زیانی گەورە بە ئەمەریكا و وڵاتانی تری كڕیاری نەوت دەگەیەنێت.
ڕوونی كردەوە، كە ئەو دوو ئامانجەی باسم لێوە كردن، وەك ئامانجی لە پێشینە و سەرەتا و سەرەكی لە كاتی دەسپێكی جەنگ پێویستە جێبەجێ بكرێن و هیچ مۆڵەتێك بە تاران نەدرێت، دەست بكاتەوە و جموجۆڵی ئێران بە تەواوی كۆتوبەند بكرێت، لە پاش پێكانی ئەو دوو ئامانجە وەك جیگری پێشووی فەرماندەی فەرماندەیی سوپای ئەمەریكا باسی لێوە دەكات، دوای ئەوانە نۆرەی سوپای پاسداران دێت، پێویستە سەرجەم مۆڵگە و ناوەند و شوێنەكانی مانەوە و فەرماندەییەكانیان و شوێنی مانەوەی سەركردەكانیان بە وردی یەك لە دوای یەك بە ئامانج بگیرێن و خاپوور بكرێن، چونكە ئەوان بوون دەستی باڵایان لە كوشتوبڕی و ڕەشبگیری خۆپێشاندەران هەبوو. هاروارد دەڵێ، ئەگەر سەركردایەتی هێرشەكە لە ژێر دەستی من بووایە، من ئەو هەنگاوانەم دەگرتەبەر و یەك لە دوای یەك جێبەجێم دەكردن.
لەبارەی ئەوەی كە سوپای ئەمەریكا توانای ئەوەی نییە كە ئەو سێ هەنگاوە لە یەك كاتدا جێبەجێ بكات، واتە لە یەك كاتدا هەموو توانا مووشەكییەكانی ئێران، هەم هێزی دەریای، هەمیش بنكە و بارەگەكانی پاسداران بكاتە ئامانج و سەرجەمیان وێران بكات، بۆب هاروارد دەڵێ، بابەتە پێوەستە بە چۆنیەتی وەڵامدانەوەیان، ئێمە دەزانین كە هێزە چەكدارەكانی ئەمەریكا پێشڤەچوونێكی گەورە و بەرچاویان هەیە بە بەراورد بە هێزی زۆربەی وڵاتانی تر، زۆرێك لە تواناكانمان پێشخراون و بەهێزكراون، بەڵام ڕانەگەیەنراون، هەروەها بڕی گولـلە و زەخیرەیش كە دەگەیەنرێتە ناوچەكە لەو كاتەدا ڕۆڵێكی گەورە دەگێڕێت، چونكە كاتەكە كەمە و هەرچەند زەخیرە و مووشەكیش زۆرتر بگاتە ناوچەكە، چارەنووسی جەنگەكە زووتر یەكلایی دەبێتەوە و كۆتایی بە ڕژێمی ئیسلامی ئێران دەهێنرێت.
لەسەر پرسیاری هەڵگەڕانەوەی ژیان بە ڕووی ڕژیمی ئیسلامی ئێران لە ڕێی چوونی هێزی سەربازی ئەمەریكی بۆ ناو خاكی ئێران، بۆب هاروارد جێگری پێشووی فەرماندەی فەرماندەیی ناوەندی سوپای ئەمەریكا ڕایگەیاند، ناردنی هێزی سەربازی بۆ پشتیوانی گەلی ئێران، پێویستە پێوەست بێ بە كارلێك و كاردانەوەكان لە ناوخۆی ئێران، وەك بینیمان خەڵكی سەبر و ئارامیان لە دەستداوە، چونكە ئەو ڕژیمە دەیان هەزار خەڵكی لە ماوەی چەند هەفتەیەك كوشت، كە ئەمە ئەگەر پێوانەی بكەی بە ماوەی جەنگی عێراق - ئێران دەكاتە زیاتر لە ژمارەی كوژراوانی ئەو جەنگە، لەبەر ئەوە جارێكی تر دەیڵێمەوە، پێویستە پشتیوانی گەلی ئێران بكرێ و توانا و ویستی پشتیوانیان بۆ پێشان بدرێت، لەو بڕوایەدام ئەگەر بەمشێوەیەی من باسم كرد، سوپایش هەمان نەخشەڕێ جێبەجێ بكات و پشتیوانی گەلی ئێران بۆ ڕووخانی ڕژێمی دەسەڵات لە وڵاتەكە بكات، ئەوا زۆر كاریگەر و یەكلاكەرەوە دەبێت.