ئێرانییەكان هاتوونەتە هەرێمی كوردستان و باسی دۆخی ناوخۆی ئێران دەكەن

لەگەڵ كرانەوەی دەروازەی سنوور لە نێوان ئێران و هەریمی كوردستان، هاووڵاتییانی ئێران دێنە ناو هەرێمی كوردستانەوە بۆ كڕینی كەلوپەلی خۆراك بە نرخی هەرزان و پێوەستبوون بە ئینتەرنێت و قسەكردن لەگەڵ كەسوكاریان، دوای ئەوەی ماوەی دوو هەفتەیە بە تەواوی ئینتەرنێت لە وڵات پچڕاوە، ئەو هاووڵاتییانەی پەڕیونەتەوە باس لەوە دەكەن، لەسەر زەوی دۆخەكە وەك خۆیەتی و لە ژێر كۆنترۆڵی ڕژێمە لەسەر زەویدا.

ئاژانسی ئەسیۆشەیتد پرێس قسەی لەگەڵ دەیان هاووڵاتیی ئێرانی كردووە كە لە سنوور پەڕیونەتەوە ناو خاكی هەرێمی كوردستان، لە یەكەم ڕۆژی كردنەوەی سنوور لە دوای ئەوەی لە سەرەتای هێرشی ئەمەریكا و ئیسرائیل بۆ سەر ئێران سنوورەكان داخران، ئەو هاووڵاتییانەی ئێران بۆ كڕینی خواردن و كەلوپەلی خۆراك بە نرخێكی هەرزانتر بە بەراورد بە نرخی كاڵاكان، لە ئێران هاتوونەتە ناو عێراقەوە و جیا لەوەیش دەیانەوێ مۆبایلەكانیان پێوەست بكەن بە ئینتەرنێتەوە و لەگەڵ كەسوكاریان لە دەرەوە قسە بكەن، یانیش بە ئامانجی دەستكەوتنی كار هاتوونەتە ناو خاكی هەرێمی كوردستانی عێراق.

هاووڵاتییانی ئێران گوتوویانە، بۆردمانی ئاسمانی بەردەوامی هەیە و نرخی كەلوپەلی خواردن بە شێوەیەكی یەكجار زۆر بەرز بووەتەوە و وایكردووە كە ژیانكردن لە ئێران زۆر قورس ببێت، دوای كردنەوەی سنووریش بارهەڵگری گەورەی پڕ لە خۆراك لە هەرێمی كوردستانەوە چوونە ناو ئێران و خواردن دەگەیەننە ئەو وڵاتە.

هەرێمی كوردستان شادەماری ژیانی زۆر لە هاووڵاتییانی كوردی ئێرانی ناوچە سنوورییەكانە، بۆ ئێرانیش ڕێگەیەكی گرنگە كە ئێستە بە بەردەوام بۆردمان دەكرێ و پەلامار دەدرێت. ئەسیۆشەیتد پرێس دەڵێ، تەواوی ئەو هاووڵاتییە كوردانەی ئێران كە قسەیان لەگەڵ كراوە، داوایان كردووە ناویان بڵاو نەكرێتەوە، لە ترسی ئەوەی كە دوای گەڕانەوەیان بۆ ئێران لەلایەن ئیتڵاعاتی ئێرانەوە لێكۆڵینەوە و لێپێچینەوەیان لەگەڵ بكرێت، چونكە هەر كەسێك قسە بۆ میدیاكان بكات، بە دڵنیاییەوە لێپێچینەوەی لەگەڵ دەكرێت.

ژنێكی كوردی خەڵكی پیرانشار كە هاتبووە هەرێمی كوردستانەوە و دەڵێ، هاتووم تا لەگەڵ كەسوكارم قسە بكەم و پێویستییە سەرەكییەكانی ژیان بكڕم، مەودای 15 كیلۆمەترم بڕیوە تا گەیشتوومەتە عێراق، دۆخی ناوخۆی ئێران ناخۆشە و خەڵكی هەست بە ئاسایش و ئارامی ناكەن و نرخی كاڵاكان زۆر گەرانە، خەڵك ناتوانن لە ماڵەكانیان بچنە دەرەوە.

ئەو ژنە دوای نیو سەعات پێویست بوو بگەڕێتەوە ئەودیوی سنوور كە دوو كیسەی پلاستیكی پڕ لە كەلوپەلی خواردەمەنی تێدابوو و دەیگوت، منداڵەكانی لە ماڵەوە چاوەڕوانی دەكەن.

دۆخی ئێران هێندە خراپ و قورس بووە، كرێكارێكی پێشووی كارگەی پیشەسازی كە ئێستە ڕووی لە هەریمی كوردستان كردووە و لێرە كار دەكات، داوای لە ئەندامانی خێزانەكەی لە ورمێ كردووە كە ئێران جێبهێڵن و بێنە كوردستانەوە و لەگەڵ ئەو بژین كە ژنەكەی و سێ منداڵی هەیە، ئەوان لە چێشتخانەیەكی سەر ڕێگە دانیشتبوون و پشوویان دەدا، ئەو كرێكارە دەیگوت، هێزەكانی تەناهیی ئێران ئێستە چیتر لە ناو بنكە و بارەگا فەرمییەكانی خۆیان نامێننەوە و شوێنەكانی خۆیان دەگۆڕن.

ماوەی چەندان ساڵە ئێران بە دەست تەنگژەیەكی قووڵی ئابووری دەناڵێنێت، بەهۆی سزا و گەمارۆ قورسەكانی ئەمەریكا بۆ سەر ئەو وڵاتە، هەر ئەمەیش وایكرد كە چەندان جار خەڵكی ئەو وڵاتە بەهۆی گرانیی نرخی كەلوپەلی خواردن و پێویستییە بنەڕەتییەكانی ژیان، ڕژانە سەر شەقام و خۆپێشاندانی گەورە و فراوانیان ساز كرد.

بەوهۆیەوە ساڵانە هاووڵاتییانی كوردی نزیك لە سنووری هەرێمی كوردستان ڕۆژانە بۆ كاركردن و كرێكاری لە سنوور دەپەڕنەوە، تا ئێوارە كار دەكەن و دواتر دەگەڕێنەوە ماڵەكانی خۆیان لە ئێران، بەو هیوایەی تا ئێوارە بڕێك دیناری عێراقییان دەست بكەوێت كە بەهاكەی بەراورد بە تمەن زۆر زیاترە و دەتوانرێ بەو بڕە پارەیە، بژێوی ڕۆژێكی ژیانیانی پێ دەستەبەر بكەن.

ئێستەیش سەرەڕای بەردەوامی ئەو تەنگژە ئابوورییە، ئەو بڕە نەوتەی پێشتریش ئێران بە چینی دەفرۆشت و بە پارەكەی دۆخی ئابووری وڵاتی پێ ڕاگرتبوو، بەهۆی جەنگ و هێرشی ئەمەریكا و ئیسرائیل بۆ سەر ئێران وەستاوە، بەردەوامیش ژێرخان و دامەزراوە گرنگەكانی ئێران بۆردمان و خاپوور دەكرێن.

ئەمەریكا چاوەڕوانە كە برسێتی و بێكاری و هەژاری، خەڵكی ئێران هان بدات تا لە دژی ڕژێمی ئێستەی وڵات ڕاپەڕن و كۆتایی بە سیستمی ئیسلامی لە ئێران بهێنرێت، بەڵام بەهۆی توندوتیژی هێزەكانی ڕژێم و كوشتوبڕ و ڕەشبگیری خەڵكی سڤیل تا ئێستە جووڵەی خەڵك نەیتوانیوە ڕژێم بهەژێنێت و كۆتایی بە دەسەڵاتەكەی بهێنێت.