باڵوێزی پێشتری ئەمەریكا داوا دەكات واشنتن توانای سەربازیی ئەو گرووپانە تێكبشكێنێت و فشار بخاتە سەر سەرۆك وەزیرانی عێراق بۆ كۆتاهێنانیان، وەزیری دەرەوەی پێشووی عێراقیش هۆشداری دەدات لەوەی هێرشەكانی ئەمشەو بۆ سەر بەغدا و هەولێر، نیشانەی دەستپێكردنی جەنگێكی سەرانسەرییە لەلایەن میلیشیا عێراقییەكانەوە، هاوكات شەوی رابردووش هێرشی قورس كرایە سەر ئەو گرووپانە و كوژراوێكی زۆریان هەیە.
زاڵمای خەلیلزاد باڵوێزی پێشتری ئەمەریكا لە عێراق ئەمڕۆ سێشەم 17ی ئاداری 2026، لە هەژماری خۆی لە تۆڕی كۆمەڵایەتی (ئێكس) نووسیویەتی: میلیشیا عێراقییەكانی سەربە سوپای پاسدارانی ئێران، هێرش دەكەنە سەر باڵوێزخانەی ئەمەریكا لە بەغدا و هەرێمی كوردستان و بەرژەوەندییەكانی ئەمەریكا لە هەرێمی كوردستان.
خەلیلزاد رەخنەی لە هەڵوێستی حكوومەتی عێراق گرت و ئاماژەی بەوە كرد، حكوومەت تەنیا راگەیەنراوی سەركۆنەكردن بڵاو دەكاتەوە، بەڵام وا دیارە نەتوانێ یان نەیەوێت رێگریی لەم هێرشانە بكات.
گوتیشی: "كاتی ئەوە هاتووە ئەمەریكا توانای سەربازیی ئەم میلیشیایانە وێران بكات كە ماوەیەكی زۆرە بە ئارەزووی خۆیان وەك بریكاری ئێران كار دەكەن."
هەروەها باڵوێزی پێشتری ئەمەریكا دووپاتی كردەوە، كە دەبێت فشار بخرێتە سەر محەمەد شیاع سوودانی سەرۆك وەزیرانی عێراق، تا بە هێزەوە دژی ئەم بریكارە تیرۆریستانە بجووڵێتەوە و كۆتایی بە چالاكییەكانیان بهێنێت.
هاوكات هۆشیار زێباری هۆشداریی دەدات لەوەی هێرشەكانی ئەمشەو بۆ سەر بەغدا و هەولێر، نیشانەی دەستپێكردنی جەنگێكی سەرانسەرییە لەلایەن میلیشیا عێراقییەكانەوە، بە مەبەستی فراوانكردنی بازنەی ململانێكان و تێوەگلانی تەواوی وڵات لەناو جەنگدا.
هۆشیار زێباری ئەندامی دەستەی كارگێڕیی مەكتەبی سیاسیی پارتی دیموكراتی كوردستان، لە پۆستێكدا لە تۆڕی كۆمەڵایەتیی (ئێكس) رای گەیاند، هێرشەكانی ئەمشەو بۆ سەر هۆتێل رەشید لە بەغدا، باڵوێزخانەی ئەمەریكا لە ناوچەی سەوز، بنكەی پاڵپشتی دیپلۆماسی ئەمەریكا لە فڕۆكەخانەی نێودەوڵەتی بەغدا و هێرشەكانی سەر هەولێر، بە واتای جەنگێكی گشتگیر دێت لەلایەن میلیشیا عێراقییەكانەوە.
ئاماژەی بەوەش كردووە، ئامانجی میلیشیاكان لەم هێرشانە فراوانكردنی مەودای ململانێكانە بۆ ئەوەی تەواوی عێراق پەلكێشی ناو ئەو شەڕە سەربازییەی ئێستە بكەن كە ناوچەكەی گرتووەتەوە.
ئەوە لە كاتێكدایە شەوی رابردوو بەشێكی زۆر لە سەركردەكانی ئەو گرووپانە بەهۆی هێرشی ئەمەریكاوە لە عێراق، كوژراون و هێرشی قورس بۆ سەریان لە زۆربەی ناوچەكانی عێراق كە رۆژانە دەكرێتە سەریان.
دوێنێ شەو بۆ عێراق شەوێكی سەخت بوو، بەغدا بووە مەیدانی جەنگی درۆنەكان و مووشەكی تەمومژاوی. لە شەوی ڕابردووەوە تا ئەم بەرەبەیانییە، بەهۆی هێرشی دەیان درۆن و مووشەكەوە زیانی گیانی و مادیی لێ كەوتەوە.
درەنگانی شەوی ڕابردوو دەنگی چەند تەقینەوەیەكی یەك لە دوای یەك بەغدای پایتەختیان هەژاند. هێرشێكی درۆنی كرایە سەر نهۆمی حەوتی هۆتێل ڕەشید كە بارەگای چەندان نێردەی دیپلۆماسیی وەك یەكێتیی ئەوروپا و باڵوێزخانەكانی سوید و نەمسای لێیە.
لە نیوەشەو و بەرەبەیاندا ئاستی گرژییەكان چوونە قۆناغێكی مەترسیدارتر. چەندان هێرشی درۆنی كرانە سەر باڵوێزخانەی ئەمەریكا لە بەغدا. سیستمی بەرگریی باڵوێزخانەی ئەمەریكا لە بەغدا توانی بەرپەرچی بەشێك لە هێرشە درۆنییەكان بداتەوە.
لەگەڵ هێرشە درۆنییەكان بۆ سەر باڵوێزخانەی ئەمەریكا لە بەغدا، ماڵێك لە گەڕەكی جادرییەی بەغدا بە سێ مووشەك كرایە ئامانج.
بەپێی دواین زانیارییەكان، لەم بۆردمانەدا پێنج كەس كوژراون و دوو كەسی تریش بریندار بوون و بەپێی زانیارییە سەرەتاییەكان، دوو كەسیان ڕاوێژكاری ئێرانی بوون.
بەرپرسێكی باڵای سوپای پاسداران بە دەست و قاچ بڕاوی ڕزگاری بووە و گواستراوەتەوە بۆ نەخۆشخانەیەكی تایبەت لە شارع فەلەستین، دۆخی تەندروستیی ناجێگیرە.
وەزیری ناوخۆی عێراق چووە شوێنی ڕووداوەكە، پشتێنەیەكی تەناهییان دروست كرد و ڕێگە نادەن هیچ كەسێك لەو ناوچەیە هاتوچۆ بكات.
ئەو شەقامەی كرایە ئامانج، ماڵی چەندان كەسایەتیی باڵای تێدایە، وەك عەبدولعەزیز محەمەداوی (ئەبو فەدەك) سەرۆكی ئەركانی حەشد، ماڵی ئەبو ئالا وەلائی ئەمینداری كەتائیبی سەیدولشوهەدا و ماڵی حاج حامید ڕاوێژكارێكی باڵای سوپای پاسدارانی ئێران.
لەگەڵ ڕووداوەكانی ناو پایتەخت، فڕۆكە جەنگییەكان، بارەگاكانی لیوای 47ـی حەشدی شەعبییان لە ناوچەی "جەرف سەخر" لە باشووری بەغدا بۆردمان كرد، هەرچەندە حەشدی شەعبی دەڵێت: "لەو هێرشەدا زیانی گیانییان نەبووە." سەركردایەتیی ئۆپراسیۆنەكانی حەشدی شەعبی ڕای گەیاند، هێزەكانی سوپای عێراق لە بارەگا و خاڵە سنوورییەكانی قائیم پاشەكشەیان كردووە.