گۆڕانكاری و داڕشتنەوەی نەخشەی نوێی رۆژهەڵاتی ناوەڕاست لە دوای هێرشەكەی حەماسەوە دەستی پێ كرد، لەو ساتەوە تا ئێستە ئیسرائیل لە شەڕدایە، ئەوەش دوای ئەوەی دەسەڵاتی ئێران گەیشتبووە سەر سنوورەكانی و لە هەموو لایەكەوە میلیشیاكان دەورەیان دابوو، لێرەدا بەرژەوەندییەكانی ئەمەریكا و ئیسرائیل تێكەڵ بوون، لەو ساتەوە خەریكی داڕشتنەوەی نەخشەی هێزن لە ناوچەكە لەسەر بنەمای بەرژەوەندییەكانیان، بەڵام لە شەڕی 40 رۆژەی دوایی چی رووی دا و كێ بردییەوە؟
شرۆڤە و لێكدانەوەیەكی زۆر بۆ شەڕ و هەڵمەتە سەربازییە 40 رۆژییەكەی ئەمەریكا دەكرێت، كە بە رێككەوتنێكی ئاگربەست و كردنەوەی گەرووی هورمز بۆ دوو هەفتە كۆتایی هات، ئەو كۆتاییەی لەگەڵ قەبارەی شەڕەكە و پلانەكانی هەردوو وڵاتی هێرشبەر بۆ سەر ئێران ناگونجێت، چونكە ئەوان بە درێژایی ماوەی هەڵمەتەكە هەزاران ئامانجی سەربازی و ژێرخان و ستراتیجیی ئێرانیان لەناو برد، وەك سەرۆكی ئەمەریكا گوتی شتێكی وایان نەماوە بۆردمانی بكەن.
لەو شەڕەدا تەواوی سەركردە كردەنییەكانی ئێران گۆڕان، كە ئەوەش یەكەم هەنگاوی پلانی ئەمەریكا بوو بۆ دەستەمۆكردنی تاران و گۆڕانكاری لە نەخشەی ناوچەكە، چونكە پلانی ئەمەریكا لەوەی ئیسرائیل جیاوازە و ئەو شەڕی دەسەڵاتی رووسیا و چین دەكات لە ناوچەكەدا، هەوڵی بەستنەوەی سەركردایەتیی نوێی ئێران و كۆنترۆڵكردنی نەوتەكەی دەدات لە گەیشتنی بە چین، وەستانی شەڕەكەش، ئەگەرچی لەگەڵ نزیكبوونەوەی ئاگرەكە بوو لە سعوودیە كە رێككەوتنی بەرگریی هاوبەشی لەگەڵ پاكستان هەیە و ئیسلام ئاباد كەوتە نێوان بژارەی هاتنە ناو شەڕ و رێككەوتنی ئاگربەست، بەڵام ئەمەریكا چاوی لەسەر سەركردایەتیی نوێی ئێرانە بۆ رێككەوتن و رازیبوون بە پێشنیازە 15 خاڵییەكەی.
تاریق ئەبو زەینەب توێژەر و شرۆڤەكاری سیاسی پێی وایە خوێندنەوە بۆ ئەنجامی شەڕەكە دوور لە ئەنجامەكان لەسەر زەوی، بەلاڕێدابردنی رای گشتییە، ئەوەی رووی دا داڕشتنەوەی هاوسەنگیی هێزە لە ناوچەكە، نەك تەنیا گەڕێكی تر لە هێرشی سەربازی، بۆیە قۆناغی داهاتوو لەسەر بنەمای ئەو گۆڕانكارییانە بنیات دەنرێت كە بە زەبری هێز سەپێنراون نەك بە درووشم، بۆیە ئەوەی دەیەوێ بزانێت كێ براوە بووە، دەبێت دیمەنەكە بە تەواوەتی نەك بە بەشكراوی بخوێنێتەوە.
زیاتر گوتی، ئەمەریكا بە چوار ئامانجی روون و راگەندراو دەستی بە هەڵمەتە سەربازییەكە كرد كە مایەی لێكدانەوە نین، لێكهەڵوەشانەوەی بەرنامەی ئەتۆمیی ئێران، كۆتاهێنان بە بەرنامەی مووشەكیی بالیستیی ئەو وڵاتە و لێكهەڵوەشانەوەی میلیشیاكانی لە ناوچەكە و كاریگەری خستنە سەر ناوخۆی ئەو وڵاتە، تا ئێستە ئەوەی بەدی هاتووە بریتییە لە، زیاتر لە 17 هەزار گورزی ئاسمانی بۆ ژێرخانی پیشەسازی بەرگری و بنكە سەربازییەكان و ناوەندەكانی توێژینەوە و پەرەپێدان و سەكۆ و ئەمباری مووشەكە بالیستییەكان و دامەزراوەكانی دروستكردنی درۆن و فەرماندە و بارەگەی سوپای پاسداران و توانا ئابووری و ژێرخانی بەكارهێنانی دووسەرە.
ئەبو زەینەب پێی وایە كە لە بەرانبەردا ئێران هیچ دەستكەوتێكی نییە باس بكرێت، تەنیا هەوڵی ئەو سەركردانەی سوپای پاسداران بوو كە ماونەتەوە بۆ پاراستنی خۆیان و مانەوە بە زیندوویی، ئەوەش پرسیارە راستەقینەكە دەرووژێنێت، ئاخۆ كێ لە شەڕەكە بردییەوە؟
روونی كردەوە، هاوتەریب لەگەڵ ئەوانە پاكستان بە توانایەكی زۆر باش و بە هاوئاهەنگی لەگەڵ سعوودیە توانی رێڕەوی دانوستانەكان بەڕێوە ببات، كە بووە هۆی رێككەوتنێكی كاتیی بۆ ئاگربەست بۆ ماوەی دوو هەفتە و كردنەوەی تەواوەتیی گەرووی هورمز، ئێستەش لایەنەكانی تر لە تاقیكردنەوەدان ئاخۆ دەتوانن رێككەوتنەكە بۆ رێككەوتنێكی تەواوەتی بگۆڕن.
ئەو شرۆڤەكارە دووپاتی كردەوە، ئاماژەكان بەو ئاراستەیەن كە یۆرانیۆمی زۆر پیتێنراوی ئێران رادەستی لایەنێكی تر یان ئەمەریكا دەكرێت، جیا لە لێكهەڵوەشانەوەی میلیشیاكان و سەپاندنی چاودێرییەكی توندی نێودەوڵەتی بەسەر ئێران، سەرەڕای ئەوە سوپای پاسدارانی ئێران هەوڵ دەدات خۆی وەك سەركەوتوو پێشان بدات، رەنگە كەسانێك هەبن پیرۆزبایی لێ بكەن و چەپڵەی بۆ لێ بدەن، بەڵام ئەوە دوور لە خوێندنەوەی وێنەكە بە تەواوەتی و ئەنجامی شەڕەكە لەسەر زەوی.