بەپێی راپۆرتێكی ئەمەریكی، واشنتن گەیشتووەتە قەناعەت كە تەنگژەی عێراق تەنیا پێوەست نییە بە گرووپە چەكدارەكانەوە، بەڵكو پێوەندی بە سروشتی رژێمی سیاسی ئەو وڵاتەوە هەیە، كە ساڵانێكە واشنتن پاڵپشتی دەكات و دەیپارێزێت، بۆیە ئەمەریكا خەریكی هەڵسەنگاندنی سیاسەتەكانیەتی لە عێراق و ئەگەری گۆڕینی شێوازی مامەڵەكردنی هەیە.
وەك لە راپۆرتێكی پەیمانگەی "كۆڕبەندی رۆژهەڵاتی ناوەڕاست"ی ئەمەریكی هاتووە، ئێستە ئیدارەی ئەمەریكا رەتی دەكاتەوە محەمەد شیاع سوودانی ببێتەوە سەرۆك وەزیران، باڵوێزخانەی ئەمەریكا لە بەغدا وای دەبینێت كە حكوومەتەكەی نەیتوانی هێرشی میلیشیاكان لە ناو عێراق یان ئەوانەی لەسەر خاكی ئەو وڵاتەوە دەكرێن، كەم بكاتەوە.
راپۆرتەكە ئاماژە دەكات كە ئەو هەڵوێستەش ئاماژەیە بۆ گۆڕانی گوتاری واشنتن و رەنگە هۆكارەكەی ئەوە بێت كە دركی بە راستییەكە كردووە، كە ماوەیەكی دوورودرێژە سەرەڕای زیانی گەورەی گیانی و مایەكی و زیانگەیاندن بە ناوبانگی دامەزراوە سەربازی و دیپلۆماسییەكانی پشتگوێی خستبوو، سیاسەتی ئەمەریكا لە عێراق لە دوای 2003 لەسەر دوو بنەما بنیات نرابوو، یەكەم، پاڵپشتیكردنی حزبە ئیسلامی و كوردییەكان، كە بەر لە رووخانی رژێمی سەدام حوسێن رێكخراو بوون، بەو پێیەی دەتوانن بۆشاییە سیاسییەكە پڕ بكەنەوە، كە نەیانتوانی.
هەروەها دەڵێت، دووەم لە دوای كشانەوەی ئەمەریكا لە عێراق لە 2011، واشنتن لە بنیاتنانی رژێمەكە بەرەو پاراستنی هەنگاوی نا، تەنانەت لەگەڵ زیادبوونی دەسەڵاتی ئێران لەناو دامەزراوەكانی دەوڵەتی عێراقی، ئەوەش بووە هۆی لاوازبوونی سەروەریی عێراق.
راپۆرتەكە ئاماژەی بۆ چەند رووداوێكی دیاری عێراق كرد، لەوانە ناڕەزایەتییەكانی تشرین لە 2019 و دەركەوتنی رێكخراوی داعش، وای لە قەڵەم دا كە سیاسەتی حزبەكانی فەرمانڕەوا لە عێراق بەشێك بووە لە هۆكاری قووڵكردنەوەی دابەشبوون و لاوازیی متمانەی هاووڵاتییان بە دەوڵەت، لەوكاتەی واشنتن تەنیا هەڵوێستی زارەكی هەبوو، بێ پەنابردن بۆ هەنگاوی راستەقینەی چاكسازی، ئەوە سەرەڕای گۆڕانكارییەی سیاسییەكان لە عێراق.
راپۆرتەكەی پەیمانگەی "كۆڕبەندی رۆژهەڵاتی ناوەڕاست"ی ئەمەریكی دووپاتی كردەوە، سەرەڕای هەموو ئەوانە ئەمەریكا لە پاراستنی رژێمی ئێستەی عێراق بەردەوام بوو، ئەوەش وای لە میلیشیاكان كرد باوەڕیان وا بێت كە واشنتن دەست بۆ بنیاتی سیاسی وڵاتەكە نابات، كە رێگە بە گەشەكردنی ئەو گرووپانە دەدات، ئەوە سەرەڕای كردنەئامانجی ناوە ناوەی هەندێك لە سەركردەكانی.
راپۆرتەكە زیاتر دەڵێت، ئەگەری هەیە بۆ لەمەودوا ئەو هاوكێشەكە گۆڕنكاری بەسەردا بێت، ئەگەری هەیە واشنتن چاو بە پاڵپشتیكردنی رژێمی ئێستەی سیاسی لە عێراق بخشێنێتەوە، بەتایبەتی ئەگەر وای دابنێت بەردەوامبوونی بووەتە هەڕەشەیەكی گەورە بۆ سەر بەرژەوەندییەكانی، راپۆرتەكە داوا دەكات كە دەبێت هەر گۆڕانكارییەكی راستەقینە بریتی بێت لە پێداچوونەوە بە پێوەندی لەگەڵ هێزە سیاسییەكان، كە دەسەڵاتیان قۆرخ كردووە و چەترێكیان بۆ میلیشیاكان دابین كردووە.
راپۆرتەكە دووپاتی كردەوە كە نابێت گۆڕانكاری لە رێگەی سەپاندنی چارەسەری لە دەرەوە بێت، بەڵكو دەبێت بە لابردنی پارێزبەندیی سەر ئەو هێزانە بێت، هاوكات پەرەسەندنی دۆخی عێراق مەترسی هەیە و رەنگە هەندێك لایەنی پاڵپشتیكراو لە لایەن ئێران پەنا بۆ توندوتیژی ببەن، ئەوەش وڵاتەكە بەرەو ململانێ و شەڕی ناوخۆیی دەبات، بەڵام رەنگە ئەو جۆرە سیناریۆیە زۆر بەردەوام نەبێت، لە سایەی رەتكردنەوەی مەرجەعیەتی باڵای نەجەف بۆ گەندەڵی و ئەگەری پاڵپشتیكردنی بۆ بژارەی چاكسازی بەتایبەتی ئەگەر لایەنگری جەماوەری هەبێت.
عێراق لەوەتەی هەیە بەدەست چەندان تەنگژەی قووڵەوە دەناڵێنێت، هۆكارەكەشی ئەو سیستمە سیاسییەی هەیە، كە لەسەر بنەمایەكی تایفی و حزبی و لاگیری بۆ دەرەوە دامەزراوە، تا ئێستە حكوومەتە دوای یەكەكانی عێراق لە هەمان بازنەدا دەخولێنەوە و نەیانتوانیوە لەوەی پێشوویان زیاتر بكەن، وڵاتەكە بە هەمان عەقڵیەت و بەرنامە و ئامانج بەڕێوە دەچێت، بۆیە ئەگەری هەیە لە چوارچێوەی نەخشەی نوێی ناوچەكە و گۆڕانكارییەكانی، سیستمی سیاسیی عێراق بێتە گۆڕان.