بە ئامادەبوونی نێچیرڤان بارزانی، سەرۆكی هەرێمی كوردستان و فەرماندەی گشتیی هێزەكانی پێشمەرگە، ڕێوڕەسمی دەرچوونی خولی 30 پێگەیاندن لە كۆلێژی سەربازیی دوو لە زاخۆ بەڕێوەچوو.
لەو ڕێوڕەسمەدا، كە وەزیری كاروباری پێشمەرگە و ژمارەیەك لە پلەدارانی پێشمەرگە ئامادەی بوون، 359 ئەفسەری گەنجی هەرێمی كوردستان كە خاوەنی بڕوانامەی بەكالۆریۆسن، دوای بەكۆتاهێنانی نۆ مانگ خوێندنی سەربازی، ئەكادیمی و پراكتیكی، بڕوانامەی دەرچوونیان پێبەخشرا و چوونە ناو ڕێزەكانی وەزارەتی كاروباری پێشمەرگە.
لە كۆتایی ڕێوڕەسمەكەدا، نێچیرڤان بارزانی گوتارێكی پێشكەش كرد و تێیدا وێڕای پیرۆزبایی لە دەرچووان و خێزانەكانیان، تیشكی خستە سەر پێگەی یاسایی و نیشتمانیی پێشمەرگە و بارودۆخی سیاسیی عێراق و پێشهاتەكانی ناوچەكە.
ئەمە دەقەكەیەتی:
دەرچوویێن هێژا،
پێشمەرگەیێن قەهرەمان،
ئامادەبوویێن خۆشتڤی،
ڕۆژ باش،
هوین هەمی گەلەك بخێر هاتن، سەرچاڤا، بۆ ڕێورەسمێن دەرچوونا خولا (سیهێ) یا پێگەهاندنێ ل كۆلێژا سەربازی یا دویێ ل زاخۆ. ئەڤ دیمەنە جهێ شانازییا مە و هەمی گەلێ كوردستانێیە.
گەلەك خۆشحالم كو ئەڤرۆ پێكڤە شاهدێن دەرچوونا (359) ئەفسەرێن گەنجێن هەرێما كوردستانێینە. وان پشتی (9) هەیڤا، خویندنا خۆ یا سەربازی، ئەكادیمی و پراكتیكی ب دوماهی ئینا و ئێدی دێ بنە بەشەك ژ هێزێن وەزارەتا كاروبارێن پێشمەرگەی.
جهێ سەربلندیێ و دەستخۆشیێیە، كو پشتی بدوماهی ئینانا خویندنا زانكۆیی و بەدەستڤەئینانا بەكەلۆیۆرسێ، هوین خۆبەخشانە، ب حەز و ڤیانا خۆ هاتنە ناڤ ڕێزێن خویندنا سەربازی؛ داكو ببنە ئەفسەر د ڕێزێن پێشمەرگاتیێدا.
ئەڤە نیشانەیێ دلسۆزی و وەفاداری و بەرهەڤییا هەوەیە بۆ خزمەتكرن و پاراستنا كوردستانێ. ئەڤرۆ د ڤێ ئاهەنگێدا ئەم هەمی دگەل مالباتێن هەوە پشكدارین و ئەم هەمی ڤێكرا ب وە سەربلندین.
ژ دل، ئو ب گەرمی پیرۆزباهیێ ل هەوە و ل مالباتێن وە یێن هێژا دكەم. ل وان و ل هەوە و ل مە هەمیا پیرۆز بیت. هیڤیا سەركەفتنێ ل ژیانێ بۆ هەوە دخوازم.
دەرچوویێن هێژا،
ژ ڕۆژا كو پێشمەرگە هەیە و هەتا ئەڤرۆ، پێشمەرگاتی جهێ شانازیێ و سەرفرازیێ و بەرپرسیاریەتییەكا مەزن بوویە. پێشمەرگاتی و پێشمەرگەبوون، ئەركەكێ گەلەك پیرۆزە و پشكەكا گرنگ یا ناسناما نیشتمانی و نەتەوەیی یا كوردستانێیە. ئەڤە بەردەوامییا خەباتا دویر و درێژە بۆ پاراستنا گەلێ كوردستانێ ب هەمی پێكهاتێن خۆڤە.
لەوما دەرچوونا هەوە یا ئەڤرۆ و سەركەفتنا هەوە د خویندنێدا، نە دویماهییا ڕێكێیە. نەخێر، دڤێت بزانن: ئەوا ئەڤرۆ هوین دەستپێ دكەن، دەستپێكا خزمەت و ئەركێن هەوە یێن نوییە دگەل دەزگەهێن حكوومەتی بۆ خزمەتكرنا كوردستانێ.
ئەڤرۆ باوەرناما هەوە بتنێ دەستكەفتەكێ ئەكادیمی نییە، بەلكی پەیمانەكا شەرەفێ و سیمبۆلا دلسۆزی و وەفادارییا هەوەیە بۆ كوردستانێ. ئەمانەتەكێ مەزنە بۆ خزمەتكرنا گەل و وەلاتێ خۆ، هەروەسا نیشانا ئامادەیی و بەرهەڤییا هەوەیە بۆ هەر قوربانییەكێ د ڕێكا سەرفرازییا وەلاتیدا.
پێشمەرگەی ب درێژاهییا دیرۆكا بزاڤا ڕزگاریخوازا گەلێ كوردستانێ، قوربانیێن گەلەك مەزن داینە. خوینا خۆ دایە و ب گیانێ بەرخودانێ، بەرەڤانی ل ئاخا كوردستانێ و گەلێ خۆ كریە. دیرۆكا پێشمەرگەی یا پڕە ژ قەهرەمان و قوربانیێن مەزن بۆ ئازادیێ و بۆ سەرفرازییا كوردستانێ.
دەمێ كو (داعش) مەزنترین ڕێكخستنا تیرۆرستی ل جیهانێ؛ هێرش كریە سەر عێراقێ و كوردستانێ، پێشمەرگە بوون كو ب سەرۆكاتیا جەنابێ سەرۆك مەسعوود بارزانی، ب گیان و خوینا خۆ، داعش ل بەرۆكێن شەڕی تێكشكاند و نەهێلا كوردستان بكەڤیتە دەستێ وان تیرۆرستا.
ژبەر هندێ، هەتا كورد و كوردستانی بمینن، پێشمەرگە دێ هەر مینین ئیلهامبەخش بۆ گەلێ كوردستانێ و دێ هەر مینن پارێزەر و سیمبۆلێ بەرەڤانی و خۆڕاگریا مللەتێ مە.
د ڤێ هەلكەفتێدا، جارەكا دی سپاس و پێزانینا هەرێما كوردستانێ پێشكێشی هێزێن هەڤپەیمانییا نێڤدەولەتی ب سەرۆكاتییا ئەمەریكا دكەم كو د شەڕێ دژی داعشێدا؛ پشتەڤانییا پێشمەرگەی كرین.
هاریكاریا وان بۆ پێشمەرگەیان و بۆ سوپایێ عێراقێ، پشتەڤانییەكا ستراتیژی و ئێكلاكەر بوو. سپاس پێزانین بۆ هاریكاری و پشتەڤانییا وان یا بەردەوام بۆ پرۆسا چاكسازیێ ل وەزارەتا كاروبارێن پێشمەرگەی.
هەروەسا پێویستە ئاماژێ بدەینە گرنگییا هەماهەنگی و هەڤكارییا ناڤبەرا پێشمەرگەی و هێزێن سوپایێ عێراقێ بۆ بەرهنگاربوونا تیرۆرێ. كارێ هەڤپشكێ هەردولا پێویستە بۆ پاراستنا ئاسایش و ئارامیێ بتایبەتی ل دەڤەرێن ماددێ (140)، چونكی ب باوەرییا مە داعش هێشتا مەترسی و گەفە ل سەر ئاسایش و تەناهییا عێراقێ و ڤێ دەڤەرێ.
د ڤێ ڕۆژێدا، د ڤێ هەلكەفتێدا، سەرێ ڕێزێ بۆ خوینا شەهیدێن خۆ دچەمینین، چ پێشمەرگە، چ یێن سوپایێ عێراقێ، چ حەشدا شەعبی، كو گیانێ خۆ كرینە قوربانی بۆ پاراستنا وەلاتی.
ئامادەبوویێن هێژا،
د ڤێ هەلكەفتێدا پێویستە بێژین كو: پرۆسا ئێكگرتنا هێزێن پێشمەرگەی وەكی پێویست بڕێڤە ناچیت و ئەو پێشكەفتنا كو پێویست بوو، هەتا نها نەبوویە.
گەلێ كوردستانێ ب سالایە لهیڤییا ئێكگرتنا پێشمەرگەیە. دۆستێن مەیێن هەڤپەیمانییا نێڤدەولەتی، پشتەڤانی و پلان و هاریكارییا پێشكێش دكەن، چاڤەڕێنە كو ئەم ئیرادەیەكا سیاسی یا دروست یا بهێز نیشان بدەین. بەلێ مخابن هەتا نۆكە نەهاتیە كرن و ڤێ ئێكێ زیانەكا مەزن گەهاندییە ناڤێ هەرێما كوردستانێ.
ژ هەمیێ گرنگتر، ئەڤ دەرچوویێن گەنج و دلسۆزێن ئەڤرۆ ئەم دبینین، هەژی وێ چەندێنە بچنە ناڤ هێزەكا نیشتمانی یا ئێكگرتی. ئەڤ ڕەوشە هیچ نە یا باشە و ئەم قەت ژێ ڕازی نینە.
دگەل هندێ ژی، دیسا دبێژم: ئێكگرتنا پێشمەرگەی پێویستییەكا چارەنڤیسسازە بۆ هەرێما كوردستانێ و پێدڤییە سەركەڤیت. ئەم ل سەرۆكاتیا هەرێما كوردستانێ و حكوومەتا هەرێمێ دێ بەردەوام بین، دێ ئەركێ خۆ بینین بۆ هندێ ئەڤ كارە بێتە ئەنجامدان و ئەڤ پرۆسەیە سەركەڤیت. بۆ ڤێ چەندێ دگەل دۆستێن مە ل هەڤپەیمانییا نێڤدەولەتی دێ بەردەوام بین.
پێشمەرگە بەشەكە ژ سیستەمێ بەرەڤانیێ یێ عێراقێ. ئەڤ كۆلێژە بخۆژی ل زاخۆ وەكی كۆلێژەكا سەر ب وەزارەتا بەڕەڤانیێ یا عێراقێ، نیشانا ڤێ چەندێیە. ژبەر هندێ دڤێت عێراق هەمی ئەرك و پێگیری یێن خۆیێن یاسایی و دەستووری بەرامبەر پێشمەرگەی بجی بینیت و هاریكاری و پشتەڤانی و چەك و تەقەمەنییا بۆ پێشمەرگەی دابین بكەت.
پێشمەرگە نە مەترسییە، بەلكی پارێزەرێ وەلاتییە و بەرێ ژی ل شەڕێ ئازادییا عێراقێ، ل پاراستنا ئاسایشا بەغدا و ل شەڕێ دژی داعشێ، ئەڤە ب ڕۆنی پێشمەرگەی یا سەلماندی كو پارێزەرێ وەلاتییە.
ئامادەبوویێن هێژا،
دەڤەرا مە ئەڤرۆ د ڕەوشەكا گران و ئالۆزدا دەرباز دبیت. گرژیێن هەرێمی، كاریگەرییا خۆ لسەر هەمیا كریە. ئەم ل هەرێما كوردستانێ تەئكیدێ لسەر هەلویستێ خۆ یێ جێگیر دكەین كو ئەم دگەل چارەسەری یێن ئاشتیانەینە بۆ هەمی كێشە و ناكۆكییا. مە نەڤێت عێراق و هەرێما كوردستانێ ب چ ڕەنگەكێ ببیتە بەشەك ژ ڤان كێشە و ئالۆزیا.
د ڤێ چارچۆڤێدا، ئەم ب گەشبینی چاڤەڕێی كاركرنێینە دگەل حكوومەتا بهێت ل بەغدا و دگەل سەرۆكوەزیرێ دەستنیشانكری ڕێزدار (عەلی زەیدی)، ب گیانێ هەڤپشكییا نیشتمانی یا ڕاستەقینە و لەسەر بنەمایێ دەستوورێ عێراقێ ئەم ئامادەینە پێكڤە كار بكەین بۆ خزمەتكرنا هەمی عێراقێ، ب شێوەیەكێ كو سیستەمێ فیدرالی و مافێن دەستووری یێن هەرێما كوردستانێ و یێن هەمیا، بهێنە پاراستن و تەناهی و گەشەپێدان و ئاڤەدانی، بۆ هەمی عێراقێ بێ جوداهی بێنە مسۆگەركرن.
هەرێما كوردستانێ یا فیدرالی پشكەكا گرنگا عێراقێیە. پاشەڕۆژا عێراقێ و یا هەرێما كوردستانێ پێكڤە گرێداییە. سەركەفتنا مە ئێكە، تەحەددی و چارەنڤیسێ مە ژی، هەڤپشكن. بهێزییا بەغدا، ئانكو بهێزییا هەرێما كوردستانێ، بهێزییا هەرێما كوردستانێ، هێزەكە بۆ بەغدا.
ژبەر هندێ كارێ هەڤپشك یێ لسەر بنەمایێ دەستووری و ڕێزگرتنا دولایەنە و هەڤپشكییا نیشتمانی، بتنێ ڕێكە بۆ ئاڤاكرنا عێراقەكا بهێز و تەنا كو خزمەتا هەمی وەلاتیێن خۆ بكەت. ئەم د ئیرادەیا خۆدا جددینە بۆ چارەسەریا هەمی كێشە و ناكۆكییا لسەر بنەمایێ دەستووری.
دەرچوویێن خۆشتڤی،
ژبیر نەكەن: كۆلێژا سەربازی پەروەردەكرن و پێگەهاندنا هەوە، گرتیە سەر ملێ خۆ، داكو وەك فەرماندەیێن خودان شیان، ئەرك و بەرپرسیاریەتییا خۆ بجی بینن. داكو دگەل پاراستنا كوردستانێ، بەرەڤانیێ ل دادپەروەریێ و مرۆڤایەتیێ بكەن. بنەما و بەهایێن بلندێن نیشتمانی و قوربانیدان و دیسپلین، بنەمایێن سەرەكینە؛ كو پێویستە هەردەم د هزر و دلێ هەوەدا بن.
هوین پێشمەرگە، سوپایێ هەمی كوردستانێنە ب هەمی پێكهاتێن خۆڤە. ڕۆلێ هەوە بتنێ د مەیدانێن شەڕیدا نییە. ڕۆلێ هەوە نە بتنێ فێربوونا هونەر و تەكنیكێن سەربازییە، بەلكی دڤێت ئەركێ هەوە بەرفرەهتر بیت بۆ ئاڤاكرنا جڤاكێ تەنا و ئارام. بۆ ڕەتكرنا تونڕەویێ، دەمارگیریێ و تیرۆرێ.
بەرپرسیاریەتییا پاراستنا بەهایێن ئازادی، ئاشتی، دیموكراسی، مافێن مرۆڤی و جڤاكا مەدەنی یا ڤەكری، پێكڤەژیانێ و قەبوولكرنا ئێكودو، لسەر ملێن هەوەیە. ببنە سەركردە و ببنە نموونە، بۆ پاراستنا دادپەروەریێ و بەرەڤانیكرنێ ل مافێن هەمی وەلاتیێن هەرێما كوردستانێ و عێراقێ.
باوەرییا مە هەمیا ب هەوە دهێت كو هوین دێ شێن بەرەنگاری تەحەدییا ببن و د ئەركێن خۆدا سەركەڤن، داكو ب باشترین شێوە خزمەتا وەلاتێ خۆ بكەن. ببنە هێزا نیشتمانی یا كوردستانێ د چارچۆڤێ وەزارەتا كاروبارێن پێشمەرگەیدا. چ جارا نەبنە بەشەك و لایەنەكێ كێشە و ململانێ یێن سیاسی.
ل دوماهیێ،
ب گەرمی سپاسی و دەستخۆشیێ پێشكێشی ڕێزداران ڕاگر و مامۆستا و بەرپرس و ڕێڤەبەرێن كۆلێژا سەربازی یا زاخۆ دكەم. كار و خزمەت و دلسۆزییا وان؛ جهێ پێزانینەكا مەزنە.
ئەركێ وان؛ یێ پیرۆز و ڕۆڵێ وان گەلەكێ گرنگە بۆ باشتركرن و پێشڤەبرنا ئەركێن پێشمەرگەی و پێگەهاندنا نڤشەكێ نوی ژ پارێزەرێن وەلاتی، كو لسەر زانستێن سەربازی و ڤیانا نیشتمانی پەروەردە بووینە. سپاسیا هەوە هەمیا دكەم، دەستخۆشیێ ل هەوە هەمیا دكەم، ل ڕاگرێ كۆڵێژێ و هەمی ئەفسەرێن وە.
سلاڤ و ڕێز بۆ گیانێ پاقژێ هەمی شەهیدێن كوردستانێ، یێن كو خەبات كرین و گیانێ خۆ بۆ كوردستانێ كریە قوربان دا ئەم ئەڤرۆ پێكڤە ڤێ ئاهەنگێ بگێڕین. سلاڤ بۆ شەهیدێن زیندی، بۆ هەمی وا قەهرەمانێن كو د ئەركێ پاراستنا كوردستانێدا، بریندار بووین. ژ ڤێرێ، سلاڤ و ڕێزێن من قەبوول بكەن، دەسێ وان ماچی دكەم. هیڤییا ساخبوونێ ب ئانەهییا خودێ بۆ وان هەمیا دخوازم.
جارەكا دی ب گەرمی و ژ دل پیرۆزباهیێ ل هەوە هەمیا دكەم دەرچوویێن هێژا. هیڤیا سەركەفتن و سەرفرازیێ بۆ هەوە هەمیا دخوازم. هیڤی دكەم خودێ هاریكارێ هەوە بیت دڤێ ژیانا وە دەستپێ كری. ب ئانەهییا خودێ هەوە ببینم ب خۆشی و سەلامەتی و سەركەفتن.
دڤێت سپاسییا ئیدارا سەربخۆ یا زاخۆ ژی بكەین كو هاریكاریا كۆلێژێ كریە و ئەم وان پێشكەفتنان ژی دبینین یێن كو ل باژێرێ زاخۆ ئەنجام دای. هیڤیا ئەمە ئەوە هەمی لا بەردەوام و سەرفراز و سەركەفتی بن. كوردستان هەر ئاڤەدان بیت و هوین ژی پارێزەرێن كوردستانێ سەرفراز و سەركەفتی بن.
زۆر سپاس.