بەگوێرەی نوێترین داتاكانی دەزگای ناوەندیی ئامار و ڕاپۆرتە ژینگەییەكان، ڕووبەری ئەو زەوییانەی لە عێراقدا مەترسیی بەبیابانبوونیان لەسەرە، گەیشتووەتە نزیكەی 96.5 ملیۆن دۆنم كە دەكاتە 55.5%ی كۆی ڕووبەری وڵاتەكە. سەرۆكی رێكخراوی ئایندەش دەڵێت، ئێستە رێژەی بیابانبوون 14%ی رووبەری خاكی عێراقی داپۆشیوە.
مەعرووف مەجید سەرۆكی رێكخراوی ئایندە بۆ پاراستنی ژینگە، چاودێریی دۆخی وشكەساڵی و بەبیابانبوونی لە عێراق و دنیا كردووە و رای گەیاند، بەپێی دوایین ئامار، رێژەی بیابانبوون 14%ی رووبەر و خاكی عێراقی داپۆشیوە.
ئێستە عێراق پێداویستی بە چاندنی زیاتر لە 15 ملیار نەمام هەیە بۆ رووبەڕووبوونەوەی بەبیابانبوون، چونكە پێشبینی دەكرێت تا ساڵی 2050، 20%ی سەرچاوە ئاوییەكانی لە دەست بدات، هەموو ئەوە كێشە و گرفتە ژینگەییانەش وای لە عێراق كردووە لە ریزبەندی پێنجەمین وڵاتانی دنیا دابنرێت كە زۆرترین كاریگەریی گۆڕانی كەشوهەوای لەسەرە.
لەبارەی هەرێمی كوردستانیش سەرۆكی ئەو رێكخراوە دەڵێت، چەند دەستكەوتێك لە بواری پاراستنی ژینگە بەدەست هاتوون كە لە ناوچەكانی تری عێراقدا نین، لەوانەش بەكارهێنانی گازی هاوەڵ بۆ بەرهەمهێنانی كارەبا و سوودوەرگرتن لە وزەی پاك بۆ هەمان مەبەست.
عێراق ساڵانە بەهۆی سوێربوونی خاك، خزانی بیابان و تێكچوونی بەپیتیی زەوی، نزیكەی 100 هەزار دۆنم زەوی كشتوكاڵی لە دەست دەدات. ئەم پاشەكشەیە بووەتە هۆی كۆچی هەزاران خێزانی گوندنشین و جووتیار لە ناوچەكانی خۆیانەوە بەرەو سەنتەری شارەكان، دوای ئەوەی سەرچاوەی بژێوییان لە دەست داوە.
پارێزگاكانی زیقار، میسان، بەسرە و دیوانییە لە پێشەنگی ئەو ناوچانەن كە زۆرترین كاریگەریی بەبیابانبوون و وشكەساڵییان لەسەرە. هاوكات ناوچەكانی زۆنگاوەكان بەهۆی دابەزینی ئاستی ئاوەوە لە بارودۆخێكی مەترسیداردان، ئەمەش بووەتە هۆی مرداربوونەوەی ڕێژەیەكی زۆر لە ماسی و سامانی ئاژەڵی.
ڕوانگەی سەوزی عێراق ئاماژە بەوە دەكات كە بەردەوامبوونی تێكچوونی ژینگە و نەبوونی چارەسەری ڕیشەیی، ژمارەی ڕۆژەكانی خۆڵبارین لە ساڵدا زیاد دەكات. بەپێی خەمڵاندنە ژینگەییەكان، ئەگەر دۆخەكە بەردەوام بێت، ئەگەری هەیە ژمارەی ڕۆژە خۆڵاوییەكان لە عێراقدا بگاتە نزیكەی 200 ڕۆژ لە ساڵێكدا.