كتێبێكی نوێی سیاسی بووەتە یەكێك لە پڕ فرۆشترین كتێبەكان، ناوەڕۆك و زانیاریی نەزانراو لە ناو كۆشكی سپی لە ماوەی 14 مانگی سەرۆكایەتیكردنی ئەمەریكا لە خولی دووەمی دۆناڵد ترەمپ لە ژێر ناونیشانی "گۆڕانی ڕژێم: لە ناو سەرۆكایەتی ئیمپراتۆرییەتی دۆناڵد ترەمپ" دەخاتە ڕوو.
ئەو كتێبە هەردوو ڕۆژنامەوانی نیویۆرك تایمز ماگی هابرمان و جۆناسان سوان، لە ڕێگەی چاوپێكەوتن لەگەڵ دەیان سەرچاوە و كەسانی ئاگاداری ناو كۆشكی سپی و حكوومەتی دۆناڵد ترەمپ نووسیویانە و وەك رۆمانێكی سیاسی گەورە ناوی دەبرێت.
بەگوێرەی
زانیارییەكان، لە هەفتەی یەكەمی خستنە بازاڕی ئەو كتێبە، 300 هەزار دانەی لێ فرۆشراوە، لە كاتێكدا ترەمپ ڕقی لەو كتێبە دەبێتەوە و دووپات لەوە دەكاتەوە، پڕە لە بابەتی لەخۆوە دروستكراوە، سەرەڕای ئەوەی هەردوو نووسەر لە ڕێگەی چاوپێكەوتنی تایبەت و نهێنییەوە زانیارییەكانیان دەست كەوتووە و لەو كتێبە خستوویانەتە ڕوو.
لە كتێبەكەدا باس لە گەردەلوولی دۆسیەكانی ئاپشتاین لە 17ی تەمووز/یۆلیۆی 2025 دەكات، كە جەی دی ڤانسی جێگری سەرۆك و كاش باتێلی بەڕێوەبەری نووسینگەی لێكۆڵینەوەی فیدراڵی "ئێف بی ئای" و كارۆلین لیڤیتی گوتەبێژی كۆشكی سپی، كۆبوونەتەوە و تاوتوێی لێكەوتەكانی بڵاوبوونەوەی دۆسیەكانی جیفری ئاپشتاینیان كردووە.
بەگوێرەی زانیارییەكان، دی ڤانس زۆر شڵەژاو و ترساو دیار بووە و ویستوویەتی، سەرجەم دۆسیەكانی وەزارەتی داد لەبارەی ئاپشتاین بڵاو بكرێنەوە و بیرۆكەی ئەوەیشی خستەڕوو كە چاوپێكەوتنێكی تەلەڤزیۆنی لەگەڵ هاوبەشی پێشووی گیلین ماكسوێل ئەنجام دەدات، وەك هەوڵێك بۆ دوورخستنەوەی تۆمەتەكان لە دۆناڵد ترەمپی سەرۆكەوە، هەروەها بژارەی لێبخۆشبوونی لە ماكسوێل خستەڕوو، بەڵام سەرجەم بژارەكانی لە ناو كۆبوونەوەكە ڕەت كرانەوە.
لە بەشێكی تردا باس لە نائارامی خانمی یەكەم میلانیا ترەمپ لە گۆڕانكارییە ڕیشەییەكانی بارەگای سەرۆكایەتی دەكات، بەتایبەت دوای ئەوەی بەشێكی كۆشكی سپی بوو بە ناوچەی بنیاتنانەوە، میلانیا ڕەخنەی لە پڕۆژەی فراوانكردنی نوێی كۆشكی سپی و هەڵگرتنی بەشی ڕۆژهەڵاتی كۆشكی سپی گرتووە، هاوكات بە خۆپارێزییەوە مامەڵەی لەگەڵ مانەوەی ئیلۆن ماسكی ملیاردێر لە كۆشكی سپی كردووە، لەو كاتەی وەزیری لێهاتووییەكان بوو لە حكوومەتی ترەمپ، سەرەڕای ئەوەی ترەمپ ڕەزامەندی لەسەر ئەوە داوە، بۆیە چەندان شەو میلانیان لە ژووری لینكۆلنی مێژووی لە كۆشكی سپی ماوەتەوە.
هەردوو نووسەر ئاماژەیان بە دۆسیەی دروستكردنی دەروازەیەك كە بە كەوانی ترەمپ ناسراوە كردووە، كە ترەمپ بیرۆكەكەی لە دەروازەی سەركەوتنی پاریس وەرگرتووە، سەرۆك بیری لەوە كردووەتەوە پەیكەرێك لە ترۆپكی دەروازەكە دابنێت، تەنانەت لەبارەی دیزاینەكەی گفتوگۆی لەگەڵ ئیمانوێل ماكرۆنی سەرۆكی فڕەنسا كردووە، هەروەها مەترسیی نامۆی لەبارەی سەلامەتییەوە هەبووە و گوتوویەتی، ئایا شووشە لە سەرەوە فڕێ دەدەنە خوارەوە؟ ئایا خەڵك دەتوانن بچنە سەری؟.
بەخشینی فراوانی گیراوان بەهۆی ڕووداوەكانی شەشی یەنایەر، لەوكاتەی خەڵكی هێرشیان كردە سەر تەلاری كاپیتۆڵی ئەمەریكا بابەتێكی ترەوە، ترەمپ دوای هاتنە سەر حوكم، بڕیاری لێخۆشبوونی بۆ هەزار و 500 كەس دەركرد كە لە ڕووداوی هێرشكردنە سەر كاپیتۆل لە شەشی كانوونی دووەم/یەنایەری 2021 تێوەگلابوون، دوای ئازادكردنیان ترەمپ بیرۆكەی ئەوەی هەبووە بەشێكیان بانگهێشتی كۆشكی سپی بكات، بەڵام دواتر دركی بە مەترسیی سیاسی ئەو هەنگاوە كردووە و لێی پەشیمان بووەتەوە.
تەندروستی ترەمپ بووەتە كۆدێكی نەكراوە و هەردوو نووسەر شكستیان هێناوە لەوەی سەرچاوە و ئەو كەسانەی چاوپێكەوتنیان لەگەڵ كردوون، زانیاری لەسەر تەندروستی ترەمپ بدركێنن، كەسانی نزیك لە ترەمپ خۆیان دوور دەخەنەوە لە دركاندنی زانیاری لەبارەی تەندروستی سەرۆكەوە، سەرەڕای ئەوەی لە ماوەی ڕابردوودا 72 پزیشكی پسپۆر لە بوارە جیاجیاكان سەردانیان كردووە، زانیارییەكان لە دوای تووشبوونی بە ڤایرۆسی كۆڤید 19 زۆر زیادیان كردووە، بەڵام وەك كەسانی نزیكی باسی لێ دەكەن، زانینی ناتەندروستی لەلایەن خەڵكەوە، لەلایەن ترەمپەوە وەك نیشانەیەكی لاوازی بۆ خۆی هەژمار دەكات و نایەوێ هیچ زانیارییەكی لەسەر بگوترێت.
كتێبەكە وێنەیەكی چڕوپڕ زانیاری و جێی مشتومڕ لەبارەی ویلایەتی دووەمی ترەمپ دەخاتە ڕوو، لە نێوان بڕیارە سیاسییە هەستیارەكان و ململانێی ناوخۆی و پرۆژە سیمبۆلییەكان، تا دەگات بە پرسیاری كراوە لەبارەی تەندروستی سەرۆك، ئەمانە گفتوگۆ لەبارەی سروشتی دەسەڵات لە واشنتن بەچڕی دروست دەكەن.