كتێبی "بۆ مێژووی سەرۆك مەسعوود بارزانی" باس لە رووداوە جیهانییە گەورەكانی مێژووی دوور و نزیك لەبارەی كورد و كوردستان دەخاتە ڕوو. وەرگێر دەڵێ، ئەم كتێبە سوودی زۆر بە مێژوو و كورد و كوردستان دەگەیەنێت و دەبێتە سەرچاوەیەكی باش بۆ ئەم كەس و لایەنانەی توێژینەوەی زانستی لەسەر كورد و كوردستان دەكەن.
ئەمڕۆ شەموو 30 ئەیلوول، دكتۆر دانەر ئەبوبەكر توێژەر و وەرگێڕ، بە "وشە"ی راگەیاند، ئەم كتێبە زۆر بە باشی باسی سەرەتای سەرهەڵدانی پرسی كورد دەكات، كاریگەریی ڕووداوە گەورە جیهانییەكانی مێژووی دوور و نزیك لەبارەی كورد و كوردستان دەخاتە ڕوو. كتێبەكە سوودی زۆر بە مێژوو و كورد و كوردستان دەگەیەنێت، دەبێتە سەرچاوەیەكی باش بۆ ئەم كەس و لایەنانەی توێژینەوەی زانستی لەسەر كورد و كوردستان دەكەن.
ئەو زیاتر دەڵێ، ئەو كەسانەی دەگەڕێن بە دوای ڕاستییەكان و چارەنووسی گەلی كورد بەگشتی و لە هەرێمی كوردستان بەتایبەت، وەرگێڕانی ئەم كتێبە بۆ سەر زۆربەی زمانەكانی دنیا، پێویستییەكی هەنووكەییە، كە تێیدا ڕاستی و دروستی ڕووداوەكان خراونەتە سەر كتێب و لەسەر زاری یەكێك لە هەرە دیارترین سەكردە مێژووییەكانی كورد دەگێڕێنەوە و باس دەكرێت. ئەمە لە خۆیدا مێژووی دروست كردووە و تازە كەس ناتوانێت ئەم بابەتانە بە لاڕێدا بەرێت، چونكە توێژەر و كەسایەتییە زانستییەكان، كە توێژینەوە لەسەر پرسە دیاریكراوەكانی خۆیان دەكەن، پشت بە سەرچاوەی یەكەم دەبەستن و بەكاری دەهێنن لە كاتی توێژینەوەكانیاندا.
لەسەر فەرمانی خاوەنی كتێب، سەرۆك مەسعوود بارزانی، فۆكسی زیاتر خراوەتە سەر چاپە ئینگلیزییەكەی
باسی لەوەش كرد، زمانی ڕووسی یەكێكە لە پێنچ زمانە فەرمییەكانی ئەنجوومەنی ئاسایشی نێودەوڵەتی و زیاتر لە نیو ملیار خەڵك لە دنیادا قسەی پێ دەكەن. لە هەمان كاتدا ژمارەیەكی زۆر كورد كە بە كوردانی سۆڤییەت ناسراون و نزیكەی 2%ی كوردانی هەموو دنیا پێكدێنن، بە زمانی ڕووسی دەنووسن و دەخوێننەوە و بەردەوام ئەو پرسیارانە دەورووژێنن، كە وەڵامەكانیان لەم كتێبەدا هاتووە، بۆیە وەرگێڕانی ئەم كتێبە بۆ سەر زمانی ڕووسی زۆر گرنگ و پێویست بوو.
"ئەم كتێبە لەسەر فەرمانی خاوەنی كتێب، سەرۆك مەسعوود بارزانی، فۆكسی زیاتر خراوەتە سەر چاپە ئینگلیزییەكەی، بەڵام زۆر بابەت و ناو و ناونیشانی تری هاتوو لەم پەرتووكەدا بەتایبەتی چەمكە سیاسی و ئیداری و یاساییەكان، ناوی كەس و دەزگا و گوند و دێهات و چەند زانیاریی تر لە چاپە ئەسڵەكەوە وەرگێڕاوە، بەهۆی هەندێك كەموكورتی لە چاپە ئینگلیزی و گونجاوتر وەرگێڕانی لە چاپە كوردییە ئەسڵییەكەیەوە، هەر لەبەر ئەم هۆكارەشە ناونیشانی پەرتووكەكە لە چاپە ئینگلیزییەكەوە وەرگیراوە نەك چاپە كوردییەكەی، بێگومان ئەمەش دوای وەرگرتنی ڕەزامەندی و وتوێژیكردن لەگەڵ چەند كەسایەتیی زمانزان و شارەزا لە زمانە جیهانییەكان. دەستەی وەرگێڕان و خاوەنی پڕۆژەكە، خۆشحاڵن كە ئەم پەرتووكە بووەتە جێی ڕەزامەندیی كەسایەتییە سیاسی و زانستییەكان و لە دیارترین كەسایەتیی زانستی لە پەیمانگەی ڕۆژهەڵاتناسی ڕووسیا (زانستی ئەكادیمیای ڕووسیا) و زانكۆی باڵی ئابووری كە دوو لە دیارترین دەزگا زانستی و مەعریفییەكانن، هەڵسەنگاندنیان بۆ ئەم پەرتووكە كردووە و ئاراستەی سەرۆك بارزانیان كردووە". دكتۆر دانەر وا دەڵێ.
توێژەر ئەوەشی روون كردەوە، ''ئێمە دڵنیاین وەرگێڕانی ئەم پەرتووكە بۆشاییەكی گەورە لە گەیاندنی ڕاستییەكان و بوونی زانیاری نوێ لە ناو چاپەمەنییە ڕووسییەكان پڕ دەكاتەوە. ''
جێی ئاماژەپێدانە وەرگێڕانی ئەم پەرتووكە لەلایەن دامەزراوەی پێشخستنی پێوەندییە كولتووری و كۆمەڵایەتییە گشتییەكانی كورد و رووس، سەرپەرشتی كراوە و ئەنجام دراوە كە لەلایەن دکتۆر دانەر ئەبوبەكرەوە سەرۆكایەتیی ئەم دامەزراوەیە دەكرێت. لە هەمان كاتدا ئەم دامەزراوەیە چەندان كاری زانستی تری لە شێوەی نووسینی پەرتووك و وەرگێڕان و لە چاپدان لە ڕووسیا ئەنجام داوە بۆ خزمەتی كورد و كوردستان و پێشخستنی پێوەندییەكانی كورد و كوردستان و ڕووسیا بە گشتی.