رۆژی پێنجشەم رێوڕەسمی بڵاوكردنەوەی كتێبی "جیاوازییەكان" لە یەكێتیی نووسەرانی كورد لقی هەولێر بەڕێوە دەچێت.
رۆژی پێنجشەم سێ تەمووز، یەكێتیی نووسەرانی كورد لقی هەولێر، رێوڕەسمی بڵاوكردنەوەی كتێبی "جیاوازییەكان"ی عەباس عەبدوڵا یوسف و سمكۆ محەمەد بەڕێوە دەبات.
هەردوو نووسەر لەم كتێبەدا گفتوگۆیەكی درێژ لەبارەی ئەزموونی ئەدەبی و سەرهەڵدانی شیعری نوێ و قوتابخانە فكرییەكانی ساڵانی حەفتاكان و هەشتاكان و تا دواتر دەكەن.
عەباس عەبدوڵا یوسف یەكێكە لە دیارترین شاعیرانی نوێی هەولێر و خاوەن چەندان دیوانە، هاوكات دەورێكی گرنگی لە یاخیبوونی شیعری نوێ لە چەند دەیەی رابردوودا هەبووە. وەك مامۆستای نەوەی هەشتاكان و نەوەتەكانی شاعیرانی هەولێر دێتە ناسین.
سمكۆ محەمەد رۆژنامەنووس و نووسەری چەندان كتێبی فكری، ماوەیەكە خەریكی گفتوگۆ و دواندنی نووسەرانی دیار و بەئەزموونە و لەم كارەشیدا رووناكی خستووەتە سەر كاری شاعیران و نووسەرانی كوردستان سوودی زۆری بە بڵاوبوونەوەی فكری ئەو نووسەرانە گەیاندووە.