د. ئەحمەدی مەلا كۆمەڵێك شیعری شاعیری دیاری كورد عەبدوڵا پەشێو بۆ فڕەنسی وەردەگێڕێت، دەزگای چاپی ئارمەتانی فڕەنسی بڵاوی دەكاتەوە.
بە گوتەی ئەحمەدی مەلا، كتێبەكە نزیكەی 100 لاپەڕەیە و ئامانج لە كارەكە، هەوڵێكە بۆ ناساندنی شیعرەكانی پەشێو بە خوێنەرانی فڕەنسیزان.
د. ئەحمەدی مەلا كە خۆی نووسەر و شاعیرێكی دیار و گرنگی ناو دنیای نووسینی كوردییە، چەندان كتێبی بۆ زمانی فڕەنسی وەرگێڕاوە، هاوكات چەند دیوانێكیشی بەزمانی كوردی بڵاو كردووەتەوە، ئەوە جگە لەوەی چەندان لێكۆڵینەوەی بەپێزیشی بەزمانی كوردی پێشكەش كردووە.
لەبارەی شیعرەكانی پەشێوەوە د. ئەحمەدی مەلا قسەی بۆ "وشە" كرد و گوتی، "وەرگێڕانی ئەو كۆمەڵە شیعرە گوڵبژێرەی پەشێو كارێكی پێویست بوو، بە هاوكاریی خۆیشی هەوڵمان دا شتێكی جوان پێشكەشی خوێنەری فڕەنسی بكەین."
ناونیشانی ئەو كۆمەڵە شیعرە وەرگێڕدراوە "لە ئاسۆوە: خاكـ"ـە؛ دەزگەی كولتوور و ئەدەبیی ئارمەتانی فڕەنسی، 500 دانەی لێ چاپ دەكات و لە دیدارێكی ئەدەبیدا بڵاوی دەكاتەوە.
شیعرەكانی ناو كتێبەكە ئەمانەن: ئیدیا، بۆ قەرەجێك، نزا، خۆكوشتن، جودایی، كڕێوە، هەڵۆ و درەخت، شادی، دیوار و چەند نامەیەك بۆ منداڵان.
ئەحمەدی مەلا لەبارەی شیعری پەشێوەوە دەڵێت: شیعری ئەو گوزارشت لە پێوەندییەكی سەمیمی لە نێوان خاك و خۆشەویستی، لەم ناوەندە وێنەی ژن پێگەیەكی لە بەرچاوی هەیە. ئەم هەستەوەرییە دەبێتە زەوینەیەك بۆ چەكەرەكردنی فەزای شیعری و سیاسی كە هەر رەگەزێكی دەچێتەوە سەر كێشەی كورد. وەك لە شیعری قەرەج دەردەكەوێت، شاعیر هەم ئاماژە بۆ ئاسمان دەكات هەم بۆ ئەستێرە، تەنانەت خوداش ون دەبێ كاتێك مرۆڤ خاكی نەبێت.
ئەو كارە گرنگانەی تا ئێستە د. ئەحمەدی مەلا كردوونی بە فڕەنسی بریتین لە: زەردك، وەرگێرانی ئیسماعیل دەروێش، دەزگای ئارمەتان، پاریس، 1993.-دیوانی مەحوی بە زمانی فڕەنسی، ئارمەتان، پاریس، ٢٠٠١زاكیرە با، ئارمەتان، پاریس ٢٠١٤شیعری خانمانی كورد، ئارمەتان، پاریس، ٢٠٢١.لە ئاسۆوە : خاك، هەڵبژاردەیەك لە شیعری پەشێو، ئارمەتان، پاریس، ٢٠٢٥.