پشتی کو ئاڤا سکرێ موسل کێم بوی، ب سەرپەرشتیا رێڤەبەریا شینوار و کەلەپورێن کوردی ل دهوکێ باژێرەکێ دیروکی ل سکرێ موسل هاتە دیتن، بریارە ئەڤرۆ ب فەرمانا پارێزگارێ دهوکێ ئەو باژێر بهێتە دەرئینان داکو بهێنە پاراستن.
د. بێکەس بریفکانی، رێڤەبەرێ شینوار و کەلەپورێ کوردی دهۆکێ بۆ "وشە" گوت، تیمەکێ شینوارناسان ب سەرپەرشتیا رێڤەبەرییا شینوار و کەلەپوورێن دهوکێ، باژێرەکێ دیروکی کۆ بۆ بەری پێنج هزار سالان ڤەدگەریت ل سکرێ موسل ڤەدیتی یە.
زێدەتر گۆت، لدیف ئەنجامێن دەسپێکی، گورستانەکا گرنگ برەخ باژێرێ مە ئامەژەپێکری هاتیە دیتن کو ژمارەیەکا زور یا گوران د ناڤدا هاتینە دیتن نێزیکێ 40 گورانە و ب ئاخا قەلاندی هاتینە دروستکرن و بۆ سەردەمێ هلنستی و سلوقی سەدەیا سێیێ بەری زاینێ. ڤەدگەریت، ئەڤ جهە سەر ب ناحیا خانکێ ڤەیە ل قەزا سێمێلێ ل دهۆکێ، کو دکەڤیتە نێزیک گوندێ خانکا کەڤن ب ناڤێ گرێ تحسین لەگ لەگ.
ب ئەگەرێ دروستکرنا سکرێ موسل و بلندبونا ئاستێ ئاڤێ، ئەڤ جهـ هاتبویە ئاڤکرن، پشتی ئەڤ سالە ژ بەر کێم بونا ئاڤا سکرێ موسل، جارەکا دی ئەڤ باژێرە دەرکەفت ڤە، ئەو پارچێن شینواری یێن هاتینە دیتن گرنگیا گری دیار دکەت، ژبەر کو ئاڤەدانی یا بەردەوام بویە هەر ل سەردەمێ نەینەوا پێنچ و چەرخێ برونزی یێ کەڤن و ناڤەراست و چەرخێ میتانی و چەرخێ ئاشورییا نی و چەرخێ هلنستی و تا دوماهیکا سەردەمێ ئسلامی ، رێڤەبەرێ شینوار وکەلەپورێ دهۆکێ هوسا گوت.
د.ً بێکەس بریفکانی دیارکر ژی کو بریارە ئەڤرۆ ب بریارا پارێزگارێ دهۆکێ تیمێن تایبەت بچنە سەر شارستانیا ناڤبری و گۆت ژی، ئەڤ تیمە دێ کار کەت بۆ رزگارکرنا ڤان شینواران و دێ هەمی گور هێنە ڤەگوهاستن بۆ موزەخانا دهوک یا نیشتمانی بۆ هندێ بهێنە پاراستن ژناڤچۆنێ.