دوو كتێبی تری سدیق سەعید ڕواندزی بە ناوەكانی "گەشت بە نێو كتێب" و "چیڕۆكی خۆشەویستی" لە چەند ڕۆژی داهاتوودا، چاپ و بڵاو دەكرێنەوە.
سدیق سەعید ڕواندزی لەبارەی ناوەرۆكی كتێبەكانیەوە بۆ"وشە" گوتی، كتێبی یەكەمیان خوێندنەوە و ڕانانی 22 كتێبە كە تێیدا بە دیدگەیەكی ڕەخنەییەوە خوێندنەوەم بۆ كتێبەكان كردووە، كە كتێبی مێژوویی، ئەدەبی، سیاسی، زمانەوانی، هزری و ڕۆشنبیری گشتییان تێدایە.
ئەوەشی گوت، ئەم كتێبە كتێبی سێیەمە لە زنجیرەی ئەو كتێبانەی كە بڕیار وایە دوای خوێندنەوەیان، ڕانان و خستنەڕوویان بۆ بكەم. "هەموو ئەو كتێبانە مەرج نییە بناسرێن، پێوەر لێرەدا ئەوەیە كە ناوەڕۆكی كتێبەكان چەند دەتوانن كۆمەكی خوێنەران بكەن لە بە بڕشتكردنی پاشخانی ڕۆشنبیرییان".
"لە دوای كتێبی یەكەم بە ناوی "پەیڤەكان دەدوێن" كە ڕانانی 29 كتێب و كتێبی دووەم بە ناوی "لە سێبەری كتێبدا" كە ڕانانی 22 كتێب بوو، ئەمە سێیەمین كتێبی ئەو زنجیرەیە، كە نیازمانە چەند كتێبێك هەڵبژێرین و خوێندنەوە و ڕانانیان بۆ بكەم، بە مەبەستی ناساندنیان بە خوێنەران، دوای پێنچ ساڵ لە كتێبی دووەم كە لە پلانمدایە، دوای یەكتریدا بڵاویان بكەینەوە، بڵاو دەبێتەوە".
نووسەر باسی لەوەش كرد، كتێبی دووەمیان بە ناوی "چیڕۆكی خۆشەویستییە" كە ڕامانێكە لە پێوەندی خۆشەویستی. ساڵانێكی زۆر و درێژ بوو، دەمویست چەند پەیڤێك لەبارەی خۆشەویستییەوە وەك پێوەندییەكی كاریگەر و ڕۆحی بەهێز لە ژیانی مرۆڤەكاندا بنووسم. بەو مانایەی خۆشەویستی چییە؟! ئایا پێوەندیی ئێمە بە هەر مرۆڤێكەوە دەچێتە خانەی خۆشەویستییەوە بە مانا سۆزداریی و ڕۆمانسییەكەی؟ بۆچی مرۆڤەكان بەرگەی گەورەترین ئازار، سەختترین ڕۆژگار، كۆستی گەورەی لە دەستدانی ئازیزان و نزیكترین كەسیان دەگرن، كەچی بەرگەی لە دەستدانی خۆشەویستەكەیان ناگرن و كۆتایی بە ژیانی خۆیان دێنن؟
ئەو پرسیارانەی لەم كتێبەدا وەڵام دراونەتەوە، ئەوەیە بۆچی كوڕێك خۆی لە پێناو باوك، دایك، برا، خوشك و هاوڕێ ناكوژێت، بەڵام لە دوای مەرگی خۆشەویستەكەی، ئامادە نییە یەك چركەش بژیت و كۆتایی بە ژیانی خۆی دێنێت؟ پرسیارانە و زیاتریش لای نووسەر ساڵانێكە بوونەتە جێی بیركردنەوە و ڕاما و دەڵێت: لەم كتێبەدا بە وردبوونەوەمان لەو ئەزموونانەی بیستوومانە، لە پێوەندیی خۆشەویستی بە كورتی دەدوێین و ناچمە ناو وردەكارییەكانی خۆشەویستییەوە. بۆ ئەمەش دەمەنەوێت بە زمانێكی سادە و ڕوون ئەوە دەربخەم كە خۆشەویستی چییە؟ ئەو سیحر و هێزە لە كوێوە دێت كە بە چەند چركەیەك و نیگاكردنێك ژیانی مرۆڤ بە جۆرێك دەگۆڕێت و بەرە و چارەنووسێكی نادیاری دەبات، كە هەرگیز ئەو مرۆڤەی پێش ئەزموونی خۆشەویستی نەبێت و دەبێتە مرۆڤێكی تری جیاواز و بە جۆرێك ڕوون دەبێت، وەك شووشە بە كەمترین بەركەوتن دەشكێت و درز دەبات و هەستەكانی هێندە مرۆییانە دەبن، وەك ئەوەی مرۆڤێكی تر بێت، نەك هەمان مرۆڤەكەی پێشوو. بۆیە دەبینین كەسانی عاشق، وەك كەسانی مرۆڤدۆست، پاك، ڕوحانی، بەخشندە و زەریایەك لە هەست و سۆز و بەزەیی، وەسف دەكرێن و جیاواز دەكەونەوە لە مرۆڤەكانی تر. بێگومان ئەمەش دەرەنجامی ئەو گۆڕانە كەسی و فسیۆلۆجی و دەروونی و كۆمەڵایەتییەیە، لە میانەی ئەزموونی عشق و خۆشەویستیدا بە سەر ئەو مرۆڤانە دادێت كە ئەو پێوەندییە لە ژیانیاندا ئەزموون دەكەن.
شایانی ئاماژەكردنە سدیق سەعید ڕواندزی، ساڵی 1972 لە شاری ڕواندز لە دایك بووە و ساڵی 1993_ 1994، بەشی كوردی پەیمانگەی مەڵبەندی مامۆستایان لە هەولێر تەواو كردووە، تا ئێستە 19 كتێبی نووسیوە و ئێستەش وەك مامۆستایەكی قۆناغی بنەڕەتی، وانە بە منداڵە چاوگەشەكانی گوندێكی دۆڵی ئاكۆیانی سنووری ڕواندز دەڵێتەوە.