لە یادی شەهیدبوونی شێخ حوسێن بەرزنجی، دۆكیۆمێنتاریی (ئەی ڕەقیب، سروودی بەرخودان و ژیان)ـی لە شاری هەولێر نمایش كرا، خەڵكێكی زۆر ئامادەی بوون.
ئێوارەی دوێنێ چوارشەم لە هەولێر، لە یادی ساڵوەگەڕی شەهیدبوونیدا رێز لە شێخ حوسێن گیرا كە لە مێژووی بزووتنەوەی رزگاریخوازی كورددا كەسێكی گرنگ و دیارە، هاوكات هونەرمەندێكی دەنگخۆش و ئاوازدانەرێكی بەسەلیقەش بوو.
ڕێوڕەسمەكە بە ئامادەبوونی د. سالار عوسمان، ئومێد خۆشناو، ماڵباتی شەهید و ژمارەیەكی بەرچاو لە ڕۆشنبیران، نووسەران، هونەرمەندان و كەسایەتییە دیارەكان بەڕێوەچوو.
لەبارەی كارەكەوە د. سالار عوسمان گوتی، گرنگیی بەرهەمهێنانی ئەم جۆرە كارە دۆكیۆمێنتارییانە بۆ دۆكیۆمێنتكردنی مێژوو و پاراستنی بیرەوەریی نیشتمانی بۆ نەوەكانی داهاتوو. هەروەها بە وردی تیشكی خستەسەر گرنگی و پێویستیی بە دۆكیۆمێنتكردنی هێماە نیشتمانی و كولتوورییەكانی كوردستان.
ئاماژەی بەوە دا كە پاراستنی ئەم هێما و سەروەرییانە لە ڕێگەی كاری هونەری و بەڵگەفیلمەوە، ئەركێكی نیشتمانی و مێژووییە بۆ هێشتنەوەی ناسنامە و خەباتی پڕ لە قوربانیدانی گەلەكەمان، بە مەبەستی ئاشناكردن و گواستنەوەیان بۆ نەوەكانی داهاتوو.
لەبارەی كارەكەوە د. نیاز لەتیف دەرهێنەری بەڵگە فیلمی (ئەی ڕەقیب، سروودی بەرخودان و ژیان) بۆ "وشە" گوتی، ئەو ڕێوڕەسمە و ڕێزگرتن لە مێژووی پڕ شكۆی شێخ حوسێن بەرزنجییە كە زۆری بۆ كوردستان كردووە.
شێخ حوسێن هەم بەرپرسی شارەوانیی ئەوكاتی كەركووك بووە و هەمیش كەسێكی شۆڕشگێر بووە، بەردەوامیش گۆرانیی گوتووە و ئاوازیشی بۆ شیعرە بەناو بانگەكەی دڵداری شاعیر "ئەی رەقیب" داناوە، كە ئێستە بووەتە سروودی نیشتمانی لە كوردستانی گەورەدا.